हटाइए काठमाडौं प्लाजाका पसल

लामो समयदेखि बहालमा रहेको काठमाडौं महानगरपालिकालाई उक्त भवन नयाँ दरअनुसार भाडामा दिइने गत वर्ष नै सरकारले निर्णय गरिसकेको छ । महानगरपालिकालाई एउटै भवनमा सबै कार्यालय हुँदा आफ्ना काम अघि बढाउन सजिलो हुने अपेक्षा गरिएको छ । झन्डै पाँच वर्षदेखि महानगर पूरै बहालको घरमा छ ।

२०५० सालमा राजदरबार सम्पत्ति व्यवस्था विभागले प्लाजालाई २७ वर्षका लागि कम्पनीलाई भाडामा दिन सम्झौता गरेको थियो । नेपालमा अन्तरिम संविधान लागू भएसँगै २०६४ मा नेपाल ट्रस्टको कार्यालय स्थापना भएर विभागअन्तर्गत सम्पत्ति ट्रस्टमा गएको थियो । त्यसैका आधारमा काठमाडौं प्लाजाको सम्पत्ति २०६५ मा नै ट्रस्टअन्तर्गत भएको थियो । ट्रस्टले पनि २०७७ असारसम्मका लागि सम्झौतालाई निरन्तरता दिएको ट्रस्टका प्रवक्ता तुलसी गौतमले बताए ।

उनका अनुसार विभागको सम्झौता ट्रस्टले त्यतिबेला नवीकरण गरेको थियो । उक्त अवधि गत असार २ गतेसम्म रहेको थियो । ट्रस्टले गत वर्ष नै अवधि पुगेको भन्दै नयाँ मूल्य दिन सूचना जारी गरेपछि कम्पनीले पुरानो दरमा नै गर्न माग गरेको थियो ।

उपप्रधानमन्त्री तथा तत्कालीन रक्षामन्त्री ईश्वर पोखरेलको अध्यक्षताको सञ्चालक समितिले पुरानो मूल्यमा दिन नसकिने भन्दै पुनः नयाँ मूल्यका बारेमा सोच्न कम्पनीलाई भनेको ट्रस्टले जनाएको छ । ‘कम्पनीले नयाँ भाडा दरमा नजाने भनेपछि नै उसलाई खाली गर्न भनिएको थियो,’ उनले भने ।