भक्तपुरमा धारिलो हतियार प्रहार गरी युवकको हत्या, एक प्रक्राउ - उपत्यका - कान्तिपुर समाचार

भक्तपुरमा धारिलो हतियार प्रहार गरी युवकको हत्या, एक प्रक्राउ 

कान्तिपुर संवाददाता

भक्तपुर — सूर्यविनायक नगरपालिका–८ सिपाडोल मूलबाटोस्थित गाई फार्ममा धारिलो हतियार प्रहार गरी एक युवकको हत्या भएको छ ।

प्रहरीका अनुसार बिहीबार सूर्यविनायक नगरपालिका–८ सिपाडोल मूलबाटोस्थित कविराज बस्नेतको जग्गामा टहरा बनाई गोकुलबहादुर खुलालले सञ्चालन गरेको गाई फार्मको टहरामा सोलुखुम्बु घर भई मनोहरा सुकुम्बासी बस्तीमा बस्ने २० वर्षीय ईश्वर राईको हत्या भएको हो ।

राईको हत्या गरी भाग्दै गरेको भन्ने सूचनाको आधारमा महानगरीय प्रहरी वृत्त जगाती प्रमुख डीएसपी राजेश थापाको टोलीले घेराबन्दी गरेर एक जनालाई पक्राउ गरेका छन् । प्रहरीले हत्याको आरोपमा फार्म सञ्चालक गोकुलबहादुर खुलालका छोरा काठमाडांै कागेश्वरी मनोहरा नगरपालिका–९ गोठाटारका २० वर्षीय आशिष खुलाललाई पक्राउ गरेको भक्तपुर प्रहरीका प्रवक्ता डीएसपी दीपक गिरीले बताए ।

महानगरीय प्रहरी परिसर भक्तपुर प्रमुख तारादेवी थापासमेत घटनास्थलमा पुगी अनुसन्धान गर्दा जस्ताको टहरामा भित्रबाट चुकुल लगाएको र झ्याल खुल्ला रहेको भुईंमा धारिलो हतियारले घाँटी टाउको लगायतका स्थानमा काटेको अवस्थामा राईको शव फेला गरेको जनाएको छ ।

प्रहरीका अनुसार मृतक ईश्वर राईले बिहीबार बिहान आशिष खुलाललाई फोन गरी सिपाडोल आउने जानकारी दिएका थिए । ईश्वर राईले महोत्तरी घर भई मनोहरा सुकम्बासी बस्ती बस्ने युनिस योञ्जन र सुनिल बललाई समेत लिएर खुलालकोमा आएको पनि प्रहरीले बताएको छ । उनीहरुले खुलाललाई भेटी गाई फार्मको टहराभित्रबाट चुकुल लगाएर चारै जना कुराकानी गरेको र वादविवाद भई झै–झगडा हुँदा खुलालले खुकुरी प्रहार गरेको पाइएको छ ।

खुलालले राईलाई खुकुरी प्रहार गर्न थाले पछि युनिस योञ्जन र सुनिल बल झ्यालबाट भाग्न सफल भएको तथा राईको घटनास्थलमा नै मृत्यु भएको प्रारम्भिक अनुसन्धानमा खुलेको डीएसपी गिरीले बताए । घटनास्थलबाट रगत लागेको खुकुरी फेला परेको प्रहरीले जनाएको छ ।

प्रकाशित : वैशाख २, २०७८ २०:२८
प्रतिक्रिया
पठाउनुहोस्

डढेलो निभाउने क्रममा  भीरबाट खसेर म्याग्दीमा एक जनाको मृत्यु 

घनश्याम खड्का

म्याग्दी — खरबारीमा सल्केको डढेलो निभाउने क्रममा म्याग्दीमा एक जनाको मृत्यु भएको छ ।

जिल्ला प्रहरी कार्यालय म्याग्दीका अनुसार बिहीबार दिउँसो ३ बजे बेनी नगरपालिका–४, थामडाँडामा लागेको डढेलो निभाउने क्रममा भिरबाट लडेर ६० वर्षीय मनबहादुर गुरुङगको घटनास्थलमै मृत्यु भएको हो ।

पर्वतको जलजला गाउँपालिका, ५ धौलापाराका गुरुङ ज्याला मजदुरी गर्ने क्रममा थामडाँडामा बस्थे । अन्य गाउँलेसँगै वनमा लागेको डढेलो निभाउन गएका गुरुङ तलबाट डढेलोको लप्का आएपछि भाग्ने क्रममा भीरबाट खसेको प्रहरीले जनाएको छ ।

स्थानीय तमबहादुर विकले आफ्नो बारीमा लगाएको जिलौटो पोल्ने क्रममा आगो अनियन्त्रित भई छिमेकी धनबहादुर गुरुङको खरबारी हुँदै थामडाँडा सामुदायिक वनमा डढेलो फैलिएको थियो । डढेलो ४ बजेपछि वर्षा भएपछि आफै नियन्त्रणमा आएको थियो ।

प्रकाशित : वैशाख २, २०७८ २०:०९
पूरा पढ्नुहोस्
प्रतिक्रिया
पठाउनुहोस्
×