चाँगुनारायण नगरको प्रशासनिक भवन निर्माण सुरु- उपत्यका - कान्तिपुर समाचार
कान्तिपुर वेबसाईट
AdvertisementAdvertisement

चाँगुनारायण नगरको प्रशासनिक भवन निर्माण सुरु

कान्तिपुर संवाददाता

भक्तपुर — चाँगुनारायण नगरपालिकाले आफ्नै प्रशासनिक भवन निर्माण थालेको छ । चाँगुनारायण–५ छालिङ घुमाउनेमा मंगलबार उक्त नगरपालिकाको भवन नगरप्रमुख सोमप्रसाद मिश्र, जिल्ला समन्वय समितिका संयोजक नवराज गेलाललगायतले शिलान्यास गरेका हुन् ।

करिब ३० रोपनी क्षेत्रफलमा बन्न लागेको ६ तले प्रशासनिक भवनमा एमईओसी भवन, ६ वटा सहायक भवनहरु, क्यान्टिन, सुरक्षाकर्मी भवन हुनेछन् । भवन निर्माणका लागि जिल्ला समन्वय समिति भक्तपुरको ३ करोड रुपैयाँ र नगरपालिकाले चालू आर्थिक वर्ष ०७७/७८ मा १० करोड रुपैयाँ विनियोजन गरेको नगरप्रमुख मिश्रले बताए ।

नगरपालिकाका इञ्जिनियर रुपेश गेलालका अनुसार भवन निर्माणका लागि ४१ करोड ३४ लाख २५ हजार रुपैयाँ लागत इष्टमेट तयार भएको र निर्माण व्यवसायीले ३४ दशमलव ५ प्रतिशत कम २५ करोड ४६ लाख २५ हजार रुपैयाँ लागतमा भवन निर्माणको कबोल गरेका छन् ।

भवन निर्माणका लागि सिनर्जी/ब्राइट/ज्ञानज्योति जेभीसँग सम्झौता भई काम सुरु भएको छ । उक्त निर्माण कम्पनीले आगामी २०८० वैशाख २५ भित्र भवन निर्माण सम्पन्न गरिसक्नुपर्छ । उक्त प्रशासनिक भवनको बाहिरी बनावट मौलिक शैलीको हुने जनाएको छ ।

प्रकाशित : फाल्गुन ४, २०७७ १९:३८
प्रतिक्रिया
पठाउनुहोस्

अग्रिम भुक्तानी दिएर खोप खरिद गर्ने मन्त्रिपरिषद्‌को निर्णय

मकर श्रेष्ठ

काठमाडौँ — सरकारले कोरोना भाइरसविरुद्धको खोप खरिदमा अग्रिम भुक्तानी दिन सक्ने निर्णय गरेको छ । मंगलबार साँझ बसेको मन्त्रिपरिषद्को बैठक भारतमा बनेको कोभिसिल्ड भाक्सिन खरिद गर्दा अग्रिम भुक्तानी दिने निर्णय गरेको हो । भारतको सिरम इन्स्टिच्यूटसँग एक डोज खोपको ४ डलरमा खरिद गर्ने सहमति भए पनि भुक्तानीको विषयलाई लिएर खरिद प्रक्रिया अघि बढ्न सकेको थिएन । 

खरिद ऐन र नियमावलीअनुसार खरिद गर्न लागेको सामानको ८० प्रतिशतमात्रै अग्रिम भुक्तानी दिन सक्ने मात्रै प्रावधान छ । तर सिरम इन्स्टिच्यूटले जति मूल्यको खोप खरिद गर्ने हो त्यसको अग्रिम भुक्तानी भएपछि मात्रै ब्याच नम्बर जारी गर्ने अडान राखेका थियो । यो समस्या समाधान गर्न मन्त्रिपरिषद्ले बाधा अड्काउ फुकाउ गरेको स्वास्थ्य तथा जनसंख्यामन्त्री हृदयेश त्रिपाठीले जानकारी दिए ।

सरकारले सिरमसँग २० लाख डोज भ्याक्सिन खरिद गर्न लागेको छ । 'यी खरिद गर्न लागेको भ्याक्सिनको मूल्यको ८० प्रतिशत राष्ट्र बैंकमार्फत अग्रिम पठाउँछौं, त्यसपछि कम्पनीले ब्याच नम्बर हाल्न सुरु गर्छ,' उनले भने, 'सामान पठाउनुअघि २० प्रतिशत रकम पनि भुक्तानी गरिसक्छौं'

मन्त्रिपरिषद्को यो निर्णयले तत्काल खोप खरिद गरेर ल्याउने बाटो अघि बढेको उनले बताए । मन्त्री त्रिपाठीले भारतसँग सहुलियत दरमा खोप खरिद गर्न लागिएको पनि प्रस्ट पारे ।

प्रकाशित : फाल्गुन ४, २०७७ १९:२८
पूरा पढ्नुहोस्
प्रतिक्रिया
पठाउनुहोस्
×