कीर्तिपुरका बसमा मेट्रो कार्ड
काठमाडौँ — कीपु बस सेवा कम्पनीले कीर्तिपुर नगरपालिकासँगको समन्वयमा मेट्रो कार्ड अर्थात् डिजिटल पेमेन्ट स्किम ल्याएको छ ।
कार्ड लागू भएसँगै यात्रु ठगिन, बिल, खुद्रा पैसा फिर्ता नपाउने, चालक सहचालकसँग हुन सक्ने विवादलगायत समस्या समाधान भएको कम्पनीले बताएको छ । कार्ड उपत्यकाका तीनै जिल्लामा सञ्चालनमा रहेका सार्वजनिक यातायातमा क्रमशः लागू गर्दै जाने योजना रहेको कम्पनीका व्यवस्थापक महेश्वर महर्जनले जानकारी दिए । ‘उक्त कार्ड वृद्धभत्ता वितरणलगायत बहुमुखी प्रयोजनमा ल्याउने पनि योजनामा छौं,’ उनले भने ।
कम्पनीले पहिलो चरणमा ५० र १ सय रुपैयाँ रिर्चाजसहित दुई सय वटा कार्ड निःशुल्क वितरण गरेको छ । दोस्रो चरणमा थप वितरण गर्दै जाने कम्पनीको योजना छ । कार्ड सामान्य, विद्यार्थी र ज्येष्ठ नागरिक तथा असक्तता भएका व्यक्तिलाई लक्ष्य गरी बनाइएको छ । विद्यार्थी र ज्येष्ठ नागरिकले यात्रा गर्दा राज्यले दिएको सुविधा कार्डमा समावेश गरिएको कम्पनीले बताएको छ ।
यातायातलाई थप व्यवस्थित बनाउन खाल्डाखुल्डी पुर्ने र सडक विस्तार गर्ने कीर्तिपुर नगरपालिकाका मेयर रमेश महर्जनले प्रतिबद्धता जनाए । ‘कार्डले चुवाहट नियन्त्रण गर्न पनि मद्दत गर्नेछ,’ उनले भने । कीर्तिपुर क्षेत्रमा दैनिक १ सय ७५ वटा सार्वजनिक यातायातबाट २० हजारभन्दा बढी यात्रु ओहोरदोहोर गर्छन् । कार्डका लागि कम्पनीले पहिलो चरणमा २५ लाख लगानी गरेको बताएको छ ।
प्रकाशित : फाल्गुन २, २०७७ ०६:४९