'ओलीको कदम जुनसुकै दृष्टिकोणबाट पनि असंवैधानिक'- उपत्यका - कान्तिपुर समाचार
कान्तिपुर वेबसाईट
AdvertisementAdvertisement

'ओलीको कदम जुनसुकै दृष्टिकोणबाट पनि असंवैधानिक'

कान्तिपुर संवाददाता

काठमाडौँ — संविधानविद प्रा.चन्द्रकान्त ज्ञावालीले प्रतिनिधिसभा विघटन गर्ने प्रधानमन्त्री केपी ओलीको कदम जुनसुकै दृष्टिकोणबाट पनि असंवैधानिक रहेको दाबी गरेका छन् । 

अनेरास्ववियूले शनिबार राजधानीमा गरेको सडक बहस कार्यक्रममा ज्ञवालीले वर्तमान संविधानले प्रधानमन्त्रीलाई प्रतिनिधिसभा विघटनको कुनै अधिकार नदिएको दाबी गरेका हुन् । यस्तै पूर्वमहान्यायाधिवक्ता रमणकुमार श्रेष्ठले ओली सरकार संविधानको धारा ७६ ( २) अन्तर्गत बनेकाले उनले कुनै हालतमा प्रतिनिधिसभा विघटन गर्न नसक्ने बताए । उनले ओली सरकार दुई वा सो भन्दा बढी दल मिलेर बनेकोले प्रधानमन्त्रीले एक्लै संसद् विघटन गर्न नसक्ने ठोकुवा गरे ।

नेपाल वार एसोसिएसनका पूर्वउपाध्यक्ष गोविन्द वन्दीले सर्वोच्चले प्रतिनिधिसभा पुन:स्थापना गर्ने विश्वास व्यक्त गर्दै फेरि/फेरि त्यस्तो असंवैधानिक कदम नचालियोस् भन्नका लागि आन्दोलन जारी राख्नुपर्ने बताए ।

कार्यक्रममा नेकपाकी नेतृ रचना खड्काले प्रधानमन्त्री ओलीको कदम राजनीतिक र संवैधानिक दुवै दृष्टिले घातक रहेको बताइन् । नेता रमेश मल्लले ओलीको कदमले परिवर्तनका उपलब्धि संकटमा पर्न सक्ने बताए । यस्तै अनेरास्ववियूका नेता सुरेन्द्र बस्नेतले संविधानअनुसार प्रतिनिधिसभा विघटन हुनै नसक्ने भएकाले अवरुद्ध संसद् तत्काल सुरु गर्न माग गरे ।

पुष्पकमल दाहाल र माधवकुमार नेपाल पक्ष नेकपा निकट अनेरास्ववियूकले पुस २१ देखि थालिएको दोस्रो चरणको आन्दोलनअन्तर्गत शनिबार सडक बहस संचालन भएको हो । प्रधामन्त्री केपी ओलीले पुस ५ गते प्रतिनिधिसभा विघटन गराएको विरोधमा चरणबद्ध आन्दोलन गरिरहेको अनेरास्ववियूले आइतबार बयलगाडा प्रदर्शन गर्ने कार्यक्रम छ भने शुक्रबार जिल्ला प्रशासन कार्यालय कार्यालयमा ज्ञापनपत्र तथा धर्ना दिइएको थियो ।

प्रकाशित : पुस २५, २०७७ १६:०९
प्रतिक्रिया
पठाउनुहोस्

नेकपा एकता राष्ट्रिय अभियानमा संगठित हुन गौतमको अपिल

रासस

काठमाडौँ — नेपाल कम्युनिष्ट पार्टी (नेकपा) का उपाध्यक्ष वामदेव गौतमले कुनै पनि पक्षमा नलागी नेकपा एकता राष्ट्रिय अभियानमा संगठित हुन नेकपाका सबै नेता कार्यकर्तामा अपिल गरेका छन् ।

नेकपा एकता राष्ट्रिय अभियानको संयोजकका रुपमा शनिबार अपिल जारी गर्दै उनले नेकपाका सम्पूर्ण नेता कार्यकर्तालाई आफू आबद्ध रहेकै ठाउँबाट नेकपाको एकता अभियानका नाममा संगठन खडा गर्न आग्रह गरेका हुन् ।

पार्टी विभाजनमा ढल्केका नेता कार्यकर्तालाई सम्झाउन आग्रह गर्दै उनले कुनै पनि समूहका नेता कार्यकर्तालाई गालीगलौजको शैलीमा विरोध नगर्न पनि अनुरोध गरेका छन् । उनले सबैलाई सम्मान गर्ने कसैलाई पनि अपमान नगर्ने समाजवादी शैली अपनाउन र एकताको सन्देश दिने पर्चा पोष्टर छापेर बाँड्न पनि आह्वान गरेका छन् । “यसो गर्नुभयो भने पार्टी र पार्टीका सबै नेतालाई एकै ठाउँमा ल्याउन सकिनेछ र पार्टीलाई पुनःएकीकरण गर्न सकिनेछ”, उनले भनेका छन् ।

एकअर्कालाई दोष दिँदै, सामान्य मान मर्यादा उल्लंघन गर्दै आफ्ना ऐतिहासिक योगदानलाई च्याँखे थापेर देश र विदेशका कम्युनिष्ट विरोधीलाई हसाउने कार्य तुरुन्त बन्द गर्न आग्रह गर्दै उपाध्यक्ष गौतमले पार्टीभित्रको अन्तरविरोधलाई अन्त्य गरेर पुनर्मिलन गर्न आह्वान गरेका हुन् । “हजारौँ शहीदको बलिदानबाट विकसित भएको पार्टीलाई मिलेर पुनर्गठन गरौँ, ऐतिहासिक शिक्षा लिएर पार्टीलाई व्यवस्थितरुपमा सञ्चालन गरौँ र पार्टीमा उत्पन्न भएका सबै अन्तरविरोधलाई पार्टी पद्धतिअनुरुप सम्मानजनक ढङ्गबाट हल गरौँ”, गौतमले अपिलमा भनेका छन् ।

पार्टी एकता जोगाउन वा पुनःएकीकरण गर्ने उद्देश्य लिएर आफू केपी शर्मा ओली र पुष्पकमल दाहालको समूहलाई समर्थन नगरी नेपाल कम्युनिष्ट पार्टी (नेकपा) एकता राष्ट्रिय अभियानको संयोजक बनेर सबैका सामु खडा भएको उनले उल्लेख गरेका छन् । उनले पार्टी विभाजनमा सामेल हुने र विभाजनलाई नेतृत्व गर्ने कुनै पनि नेता पुनःएकीकरणको अवस्थामा सामेल नभए लोकतान्त्रिक मूल्यमान्यतामा आधारित समृद्ध समाजवाद निर्माणलाई समर्थन गर्ने नेपाली जनताले कहिल्यै माफी नदिने पनि बताएका छन् ।

सरकार सञ्चालनको एउटा कार्यकाल र पार्टी एकीकरणको तीन वर्ष पनि व्यतित नहुँदै नेकपा विभाजनबाट क्षतविक्षत हुने दिशातर्फ अग्रसर हुनु अत्यन्त दुःखद् र पीडादायी भएको उल्लेख गर्दै उपाध्यक्ष गौतमले पदीय जिम्मेवारी र व्यक्तिवादी कार्यशैली, सरकार सञ्चालन, पार्टी र सरकारको सम्बन्ध कस्तो हुने भनेर उत्पन्न अन्तरविरोधको समाधान गर्न नसक्नाका कारण विभाजनउन्मुख हुनु पार्टीका शीर्षस्थ नेताहरुको अयोग्यताको द्योतक हो भनेका छन् ।

प्रकाशित : पुस २५, २०७७ १५:३०
पूरा पढ्नुहोस्
प्रतिक्रिया
पठाउनुहोस्
×