पाटन संग्रहालयको प्रदर्शन कक्ष साढे पाँच वर्षपछि खुल्दै

भूकम्पको दुई महिनापछि संग्रहालय खुलेपनि गोल्डेन ढोकाको माथिल्लो तलामा रहेको दरबारको यो भाग भने बन्द थियो । यो कक्षमा सर्वसाधारणले पनि संग्रहालयसँग भाडामा लिएर आफ्ना संकलनमा रहेका तस्बिर तथा मूर्तिहरु प्रर्दशनमा राख्न सकिन्छ ।

पाटन संग्रहालय अधिकृत सुरेश लाखेका अनुसार पुरात्तात्विक महत्त्वको तस्बिर माघ १८ सम्म प्रदर्शनीमा राखिनेछ । ‘दोस्रो चरणमा काष्ठकला, धातुकला, प्रस्थरकलाका उमामेश्वर, विष्णु, विश्वेश्वरजस्ता देवीदेवताका मूर्तिहरु प्रदर्शनीमा राख्ने योजनामा छौ,’ उनले भने, ‘प्रदर्शनीले संग्रहालय अवलोकनमा आउने पर्यटकहरुले फरक चिजको अनुभव पाउन सकिन्छ ।’

^{प्रर्दशनीमा राख्न लागिएका पाटन दरबार क्षेत्रका एक सय वर्ष पुराना तस्बिरहरु ।}

प्रदर्शनीमा राखिने तस्बिरहरुमा भीमफेंदीबाट उपत्यकामा गाडी बोकेर ल्याइरहेको, पाटन दरबार, हनुमानढोका दरबार, कालभैरव, धरहरा, बाघ दरबार, बौद्ध स्तुप र वर्ल्डफिल्डले सन् १८५३ मा बनाएको पाटन दरबार क्षेत्र भण्डारखाल बगैंचाको स्केचलगायत छन् ।

यी बाहेक पर्यटकले १७ औं शताब्दीका राजा सिद्धिनरसिंह मल्लका पालामा बनेको सुन्दरी चोक, हात्तीको दाँतबाट बनेको ऐतिहासिक झ्याल, माटोको भित्तामा बनाइएको पाटन सहरको चित्र, काठका ५ सय वटा शिव लिंग, ढुंगाका ७२ वटा छुट्टाछुट्टै शिवको मूर्ति, मूलचोक, काठमाडौदेखि गोसाइकुण्ड रुटको पौवाचित्रलगायत अवलोकन गर्न सकिन्छ ।