तीनथानास्थित गोल्फुथलीमा आउटडोर जिम- उपत्यका - कान्तिपुर समाचार
कान्तिपुर वेबसाईट
AdvertisementAdvertisement

तीनथानास्थित गोल्फुथलीमा आउटडोर जिम

तस्बिर : बिजु महर्जन

काठमाडौँ — चन्द्रागिरि नगरपालिकास्थित गोल्फुथली चोकमा बनाइएको आउटडोर जिममा आइतबार बिहान ६६ वर्षीया भवानी आचार्य व्यस्त थिइन् । उनी रबर ब्याण्ड एक्सरसाइज गर्दै थिइन् । हात काम्ने समस्या भएकाले उनले रबर ब्याण्डको सहायतमा एक्सरसाइज गरिरहेकी बताइन् । नगरपालिकास्थित वडा नम्बर १५ ले सार्वजनिक जग्गामा आउटडोर जिम सञ्चालन गरेपछि उनी खुसी छिन् ।

‘आफ्नै घर नजिकै बनाइ दिएको छ,’ उनले भनिन्, ‘अब धेरै हिँड्नु पर्दैन, यही आएर कसरत गरे पुग्छ ।’ आचार्य जस्तै वडा–१५ कै रमन नकर्मी पनि खुसी छन् । लकडाउन अगावै दैनिक जिम जाने गरेपनि अहिले मर्निङ वाक गरेर बसिरहेका थिए । तर वडाले निर्माण गरेको आउटडोर जिम सञ्चालनमा आएपछि बाहिर जिम जानु नपर्ने उनले बताए । ‘अबदेखि मर्निङ वाक गरेर आएर यही एक्सरसाइज गर्न सक्छौं,’ उनले भने, ‘बाहिर जिममा गएर पैसा पनि खर्च गर्नु पर्दैन ।’ नकर्मीले टुइस्टर र साइक्लिङ गरेको बताए ।

वडा नम्बर १५ का अध्यक्ष उत्तमबहादुर राउतले ६ लाख रुपैयाँ खर्च गरेर गोल्फुथली आउटडोर जिम सञ्चालन गरेको बताए । ५ सय स्क्वायर जमिनमा ५ किसिमका आउटडोर जिम सामग्री राखिएको छ । शनिबारदेखि सञ्चालनमा आउने उक्त जिम महिला तथा ज्येष्ठ नागरिकलाई लक्षित गरेर ल्याइएको उनले बताए । फिजियाथेरापी गर्नेुपर्ने व्यक्तिहरु तथा मर्निङ वाक गर्न चाहने तर धेरै लामो बाटो हिँड्न नसक्ने ज्येष्ठ नागरिकका लागि यो उपयुक्त हुन्छ । ‘महिला तथा ज्येष्ठ नागरिकलाई लक्षित गरेर ल्याएपनि जुनसुकै उमेर समूहकाले एक्सरसाइज गर्न पाइनेछ,’ उनले भने ।

उक्त जिममा टुइस्टर, राइड(साइक्लिङ), पुल चेयर, पुल अप, रबत्र ब्याण्डलगायतको सामग्रीहरु राखिएका छन् । सानो ठाउँ भएकाले हाल एकपटकमा ९ जनाले मात्र गर्न मिल्ने गोल्फुथली आउट डोर समितिका अध्यक्ष हरिसरण कार्कीले बताए । हाललाई बिहान ६ बजेदेखि ९ बजेसम्म र साँझ ५ बजेदेखि ७ बजेसम्मको सञ्चालन गरिएको छ । वडाले गोल्फुथली चोकसँगै भिराडिल साँकुरा पार्क, विष्णुदेखि मन्दिर, रामेश्वर मन्दिर र बुद्धस्थान तिनथानामा पनि यस्तै आउटडोर जिम सञ्चालन गर्ने जनाएको छ । दसैं–तिहार लगत्तै उक्त स्थानमा पनि आउटडोर जिम निर्माण गरि सञ्चालनमा ल्याउने योजना रहेको वडाध्यक्ष राउतले बताए ।

प्रकाशित : कार्तिक ३, २०७७ १७:१७
प्रतिक्रिया
पठाउनुहोस्

पहिरो पीडितलाई २५ लाख सहयोग

आश गुरुङ

काठमाडौँ — पहिरोबाट घरबारबिहीन लमजुङको मर्स्याङ्दी गाउँपालिका-३ तरापु पल्लोटारीबासीका लागि लमजुङ समाज युकेले २५ लाख ९० रुपैयाँ सहयोग गरेको छ ।

गत साउन पहिलो साता भारी वर्षासँगै आएको बाढीपहिरोले पल्लोटारीका २१ घर पुरिएका थिए । ५० घर उच्च जोखिममा छन् । पहिरो पीडितका लागि दीर्घकालीन बासास्थान बनाउन लमजुङ घर भइ बेलायतमा बसोबास गर्दै आएका स्थानीयले राहत सहयोग गरेका हुन् ।

लमजुङ समाज युकेका सल्लाहकार, तमु धीं युके साथै गैरआवासीय नेपाली संघ बेलायतका पूर्वअध्यक्ष मुछेत्र गुरुङ र लमजुङ समाज युकेका आजीवन सदस्य क्या. मीनजंग गुरुङले उक्त रकम बराबरको चेक तरापु पल्लोटारी विपद् व्यवस्थापन समितिका अध्यक्ष तथा मस्र्याङ्दी ३ का अध्यक्ष प्रेमबहादुर बस्नेतलाई हस्तान्तरण गरे । राहत संकलनका संयोजक क्या. देवबहादुर घलेले २ सय ८४ जनाबाट राहत रकम संकलन गरी पहिरोपीडितका लागि पठाएको बताए । ‘तरापु पल्लोटारीमा पहिरो गएर घरबार लगेपछि हामी बैठक बस्यौं ।

पूर्व सांसद जमीन्द्रमान घलेले पल्लोटारीमा पहिरो गएपछि देशविदेशमा सहयोग माग गरिएको बताए । ‘देशविदेशबाट सहयोग आइरहेको छ । सरकारले तत्काल राहतका लागि रकम उपलब्ध गराओस् । गाउापालिकाले छिट्टै जग्गाको टुंगो लगोओस् । अनि हामी सवै घर बनाउन जुटौंला’ उनले भने ।

गाउँपालिकाका अध्यक्ष अर्जुन गुरुङले पीडितलाई तत्कालका लागि अस्थायी टहरामा बसोबासको व्यवस्था मिलाएको बताए । ‘स्थायी रुपमा बसोबासका लागि हामी अघि बढेका छौं । संघ र प्रदेशसँग पनि सहयोग मागेका छौं । छिट्टै जग्गा व्यवस्थापन गर्छौं । बर्खा अगाडि सवैलाई स्थायी बसोबासका लागि स्थानान्तरण गराउँछौं’ उनले भने ।

प्रमुख जिल्ला अधिकारी कृष्णप्रसाद शर्माले संघीय सरकारबाट हरेक घर निर्माणको लागि ३ लाख रुपैयाा प्राप्त हुने बताए । प्रदेश सरकारबाट १ लाखदेखि डेढलाख रुपैयाँसम्म सहयोग प्राप्त हुने अनौपचारिक खबर आएको बताए ।

प्रकाशित : कार्तिक ३, २०७७ १७:०९
पूरा पढ्नुहोस्
प्रतिक्रिया
पठाउनुहोस्
×