ललितपुरमा पहिरो जाँदा घाइते भएकाको अझै उद्धार भएन- उपत्यका - कान्तिपुर समाचार
कान्तिपुर वेबसाईट
AdvertisementAdvertisement

ललितपुरमा पहिरो जाँदा घाइते भएकाको अझै उद्धार भएन

प्रशान्त माली

काठमाडौँ — बुधबार साँझ ५ बजे पहिरोमा परेर घाइते भएका ५ जनाको अझै उद्धार हुन सकेका छैनन् । केही दिनदेखि परेको अविरल वर्षाका कारण दक्षिण ललितपुरको वाग्मती गाउँपालिका–३ कान्ति लोकपथ खण्ड, भट्टेडाँडास्थित पाङदुर गहिरोमा गएको पहिरोमा परेर उनीहरु घाइते भएका थिए ।

घाइतेमध्ये कुमार नगटकोटीको दाँया खुट्टा भाँच्चिएको र सुरेन्द्र थापा मगरको ढाडमा गम्भीर चोट लागेको छ । सरुख अलाम, सागर घले, केशव विक भने सामान्य घाइते भएका छन् । महानगरीय प्रहरी प्रभाग भट्टेडाँडा प्रमुख प्रहरी निरीक्षक सन्तोष बरालले घाइतेहरुको बगुवास्थित एक व्यक्तिको पसलमा राखेर सामान्य उपचार भइरहेको बताए ।

वाग्मती गाउँपालिका प्रमुख वीरबहादुर लोप्चनले घाइतेको उद्धार हेलिकप्टरमार्फत गर्न गृहमन्त्रालयमा कुराकानी भइसकेको बताए । ‘बाक्लो कुहिरोको कारणले गर्दा हेलिकप्टर पुग्न सक्ने अवस्था छैन । निरन्तर वर्षाका कारण पहिरो पन्छाएर घाइतेको सडकमार्फत अस्पताल पुर्‍याउने सक्ने अवस्था पनि छैन,’ उनले भने, ‘मौसम अनुकुल भएपछि हेलिकप्टर उद्धार तयारीमा छ ।’

पहिरोको कारणले दुईटा ट्रिपरको अगाडिको भाग र एउटा मोटरसाइकल पुरिएको छ । घाइते हुनेहरु भने पैदल यात्री हुन् । अविरल वर्षाका कारण वाग्मती, कोञ्ज्योसोम र महाकाल गाउँपालिकाका छोटो तथा लामो दूरीका सडकका विभिन्न खण्डमा पहिरो गएका कारण आवतजावत ठप्प भएको छ । कतै बिजुलीका पोल ढलेका कारण विद्युत आपूर्ति बन्द भएको छ भने गाउँबाट नियमित रुपमा बजार आउनुपर्ने दूध तथा तरकारीलगायत कृषिजन्य वस्तुहरु गाउँमै अड्किएका छन् ।

प्रकाशित : आश्विन ८, २०७७ १३:३१
प्रतिक्रिया
पठाउनुहोस्

नेपाल-चीन सीमाबारे स्थलगत रिपोर्ट नआउँदै सरकारले हतारमा टिप्पणी गर्‍यो : कांग्रेस

कान्तिपुर संवाददाता

काठमाडौँ — हुम्लामा नेपाल र चीनबीचको सीमा मिचिएको हो वा होइन भन्नेबारे सरकारले हतारमा टिप्पणी गरेको कांग्रेसले आरोप लगाएको छ । बिहीबार कांग्रेस प्रवक्ता विश्वप्रकाश शर्माले स्थलगत अध्ययनको विवरण आउनुपूर्व नै सरकारले यसबारे टिप्पणी गरेको बताएका हुन् ।

‘हुम्ला जिल्लास्थित नेपाल र चीनको सीमासम्बन्धी प्रश्नमा सीमा मिचिएको हो या होइन भन्ने विषय स्थलगत अध्ययनको विवरण आउनु पूर्व नै ‘सीमा मिचिएको छैन’ भनेर परराष्ट्र मन्त्रालयले धारणा सार्वजनिक गरेको प्रति नेपाली कांग्रेसको ध्यानाकर्षण भएको छ,’ प्रवक्ता शर्माद्वारा जारी विज्ञप्तिमा भनिएको छ ।

प्रमुख जिल्ला अधिकारी, नेपाल प्रहरी र नेपाली सेनासमेतको टोलीको स्थलगत अध्ययन जारी रहँदै, स्थलगत भ्रमण पूरा गरेर सदरमुकाम फर्कनुपूर्व नै सरकारले धारणा सार्वजनिक गर्नु युक्तिसंगत नदेखिएको कांग्रेसको आरोप छ ।

अध्ययन टोलीले ११ नम्बर पिल्लर बुधबार मात्रै भेटेको र चीनले निर्माण गरेको संरचना १२ नम्बर पिल्लरबाट बाहिर या भित्र भनेर अध्ययन टोलीको स्थलगत अध्ययन निष्कर्षपछि सीमा मिचिएको हो/होइन भन्ने बारे निष्कर्षमा पुग्न सकिने स्थितिलाई पनि सरकारले हेक्का नराखेको प्रवक्ता शर्माले बताएका छन् ।

सीमासम्बन्धी गम्भीर प्रश्नमा स्थानीय प्रशासन, राजनीतिक दल र सञ्चार माध्यमसमेतको ठोस अध्ययन र अवधारणाको जगमा धारणा सार्वजनिक गर्नु जिम्मेवार र परिपक्व हुने आफूहरुको बुझाइ रहेको कांग्रेसले बताएको छ ।

‘बिहीबार साँझसम्म स्थलगत अध्ययन टोली सीमाबाट हुम्लाको सदरमुकाम फर्किएपश्चात सीमा मिचिएको ठहर भए चीन सरकार समक्ष कडा विरोध जनाउादै संवादको कूटनीतिक प्रक्रियामार्फत् समाधानमा पुग्न सरकारलाई प्रतिपक्षी दलका तर्फबाट सचेत गराउँदछौं,’ कांग्रेसद्वारा जारी विज्ञप्तिमा भनिएको छ ।

स्थलगत अध्ययनको धारणा आउनुपूर्व नै ‘सीमा मिचिएकै छैन’ भनेर ठोस अध्ययनको आधार बेगर धारणा सार्वजनिक गर्नु परराष्ट्र मन्त्रालयको कमजोरी रहेको पनि कांग्रेसले आरोप लगाएको छ ।

बुधबार परराष्ट्रमन्त्रीसमेत रहेका सरकारका प्रवक्ता प्रदीपकुमार ज्ञवालीले नेपाल र चीनबीच सीमा समस्या नभएको बताएका थिए । हुम्लामा नेपाली भूमि मिचेर चीनले भौतिक संरचना निर्माण गरेको भनेर आएका समाचारप्रति सरकारको ध्यानाकर्षण भएको भन्दै मन्त्री ज्ञवालीले त्यसमा सत्यता नभएको बताएका थिए ।

लामो समयदेखि हराएको भनिएको नेपाल–चीन सीमा छुट्याउने ११ नम्बर सीमास्तम्भ बुधबार भेटिएको थियो । हुम्लाका प्रमुख जिल्ला अधिकारी चिरन्जीवी गिरीको नेतृत्वमा गएको टोलीले बुधबार स्तम्भ भेट्टाएको जानकारी नाम्खा गाउँपालिकाका अध्यक्ष विष्णुबहादुर लामाले दिए ।

सम्बन्धित समाचार

प्रकाशित : आश्विन ८, २०७७ १३:१२
पूरा पढ्नुहोस्
प्रतिक्रिया
पठाउनुहोस्
×