भक्तपुरमा ट्यांकरको ठक्करबाट भ्यान चालकको मृत्यु, ३ जना घाइते
भक्तपुर — जिल्लामा ट्यांकरको ठक्करबाट मिनिभ्यान चालकको मृत्यु भएको छ । सहचालकसहित ३ जना घाइते भएका छन् ।
अरनिको राजमार्गअन्तर्गत बाँसघारीस्थित जगातीबाट साँगातर्फ जाँदै गरेको बा ३ ख ५३२२ नम्बरको तेल बोक्ने ट्याङ्करले विपरीत दिशातर्फबाट आइरहेको बा २१ च ८८०५ नम्बरको मिनिभ्यानलाई ठक्कर दिँदा चालक झापा अर्जुनधारा नगरपालिका–२ का २६ वर्षीय मिलन मगरको मृत्यु भएको प्रहरीले जनाएको छ । ठक्करबाट सख्त घाइते मगरको उपचारको क्रममा डा. इवामुरा मेमोरियल अस्पताल सल्लाघारीमा मृत्यु भएको महानगरीय प्रहरी वृत्त जगाती प्रमुख डीएसपी चक्रराज जोशीले बताए । दुर्घटनाबाट मिनिभ्यानका सहचालकसहित ३ जना घाइते भएका छन् ।
घाइते हुनेमा सहचालक मोरङ अमरदहका १५ वर्षीय विवेक राजवंशी, मिनिभ्यानमा सवार काभ्रेपलाञ्चोक बनेपा नगरपालिका–६ साँगाकी २२ वर्षीया सिर्जना तामाङ र उनका १९ महिने छोरा मेडिड छन् । घाइतेहरुको डा.इवामुरा अस्पताल सल्लाघारीमा उपचार भइरहेको प्रहरीले जनाएको छ । सहचालक राजवंशीको अवस्था गम्भीर रहेको डीएसपी जोशीले बताए ।
प्रकाशित : भाद्र ११, २०७७ १७:४६