बैंकिङ कसुर मुद्दाका २ फरार अभियुक्त पक्राउ 

कान्तिपुर संवाददाता

काठमाडौँ — बैंकिङ कसुर मुद्दाका २ फरार अभियुक्तलाई केन्द्रीय अनुसन्धान ब्यूरोले पक्राउ गरेको छ । पक्राउ पर्नेहरुमा काठमाडौं महानगरपालिका–१८ ताम्सिपाखाकी ४८ वर्षीया सुनिता चित्रकार र  काठमाडौं–१४ कलंकीका ४९ वर्षीया मनोजलाल सिंह सुवाल रहेका छन् । 

उनीहरुले आफ्नो खातामा पर्याप्त मौज्दात रकम नभई विभिन्न बैंकहरुको चेक काटी दिएकोमा बैकिङ कसूरजन्य अपराध गरेको ठहर गरी २०७६ फागुन २६ गते उच्च अदालत पाटनबाट सुनितालाई ३ दिन कैद, ६ लाख ५० हजार रुपैयाँ जरिवाना र मनोजलाललाई ७ दिन कैद र १० लाख रुपैयाँ जरिवाना सजाय हुने फैसला भएको थियो ।

उक्त सजाय बेरुजु रही फरार रहेका प्रतिवादीहरुमध्ये सुनितालाई बिहीबार स्वयम्भूबाट र मनोजलाललाई शुक्रबार रविभवनबाट पक्राउ गरेको ब्यूरो प्रमुख डिआईजी सहकुल थापाले बताए । पक्राउ परेका दुवै जनालाई फैसला कार्यान्वयनको लागि जिल्ला अदालत काठमाडौंमा पेस गरेको उनले बताए ।

प्रकाशित : असार २६, २०७७ १९:०६
प्रतिक्रिया
पठाउनुहोस्

पहिरोबाट गण्डकी प्रदेशमा ११ को मृत्यु, १२ बेपत्ता

रासस

काठमाडौँ — बिहीबार राति परेको पानीका कारण गण्डकी प्रदेशमा ११ जनाको मृत्यु भएको छ भने १२ जना बेपत्ता भएका छन् । अविरल रुपमा परेको पानीका कारण पहिरोमा परी कास्कीमा ७, लमजुङमा ३ र म्याग्दीमा १ गरी ११ जनाको मृत्यु भएका छन् । पहिरोमा १६ जना घाइते भएका छन् ।

प्रदेश प्रहरी कार्यालय गण्डकीका प्रहरी नायब उपरीक्षक राजेन्द्रबाबु रेग्मीका अनुसार बाढीपहिरोका कारण म्याग्दी जिल्लामा १२ जना बेपत्ता भएका छन् । पोखरा महानगरपालिका–१८ सराङकोटस्थित गोठादीमा घरमाथिबाट आएको पहिरोले घरपुरिँदा घरधनी ५० वर्षीय टङ्कबहादुर थापा, निजकी श्रीमती ४५ वर्षीया सोममाया थापा, तनहुँ दमौलीका आठ वर्षीय शीतल श्रेष्ठ, ११ वर्षीया इशिका थापामगर र ६ वर्षीय सुवान थापाको मृत्यु हुनुका साथै आठ जना घाइते भएका छन् ।

त्यसैगरी पोखरा महानगरपालिका–२५ हेमजाको मेलबोटमा पहिरोले घर पुरिँदा ७० वर्षीय हिमकली अधिकारी र पोखरा–२६ पैतेडाँडामा घर पुर्दा ३५ वर्षीय दुर्गाबहादुर सुनारको मृत्यु भएको प्रहरीले जनाएको छ । अविरल वर्षाका कारण म्याग्दी जिल्लाको रघुगङ्गा गाउँपालिका–६ स्थित रापुखोलामा आएको बाढीले बगाएर ठाँडाखानीका ५० वर्षीय नलिमान छन्त्यालको मृत्यु भएको छ भने धवलागिरी गाउँपालिका–६ का चार घर पुरिँदा १० जना तथा मालिका गाउँपालिका–७ निमदुलेका ४० वर्षीया विष्णु पौडेल र चार वर्षीया छोरी ईशा पौडेल बेपत्ता भएका छन् ।

प्रहरी नायब निरीक्षक रेग्मीका अनुसार लमजुङ जिल्लाको बेँसीशहर नगरापलिका–७ सातबिसेस्थित पहिरोले घर पुरिँदा घरधनी ३२ वर्षीय दीपक तामाङ, निजकी श्रीमती २६ वर्षीय बिमाया तामाङ र ९ वर्षीय छोरा छैवाङ तामाङको मृत्यु भएको हो । सोही पहिरोका घाइते तीन जनाको स्थानीय अस्पतालमा उपचार भइरहेको छ ।

पहिरोमा परी विभिन्न जिल्लामा बङ्गुर, बाख्रा, भैँसी, गोरुलगायतका २३८ भन्दा बढी चौपाया मरेको प्रहरीले जनाएको छ । वर्षाका कारण अधिकांश सडक अवरुद्ध हुनुका साथै किसानले खेतमा लगाइएको धानबालीमा समेत ठूलो क्षति पुगेको छ ।

प्रकाशित : असार २६, २०७७ १९:०२
पूरा पढ्नुहोस्
प्रतिक्रिया
पठाउनुहोस्
×