भक्तपुरमा गोठमा आगलागी, तीन गाई र एक बाछा मरे

कान्तिपुर संवाददाता

भक्तपुर — सूर्यविनायक–८ सिपाडोल तौडोलकी पार्वती थापाको गाई गोठमा बुधबार आगलागी हुँदा तीन गाई र एक बाछा मरेका छन् ।

गोठमा लामखुट्टे भगाउन बालेको धूपबाट आगो सल्किएको हो । आगलागीबाट दुई वटा गर्भवती गाई, बाछा र दुहुनो गाई मरेका प्रहरीले जनाएको छ । प्रहरीका अनुसार आगलागीबाट करिब साढे ४ लाख रुपैयाँ बराबरको क्षति भएको छ ।

आगो स्थानीयको सहयोगमा राती नै निभाइएको छ ।

आगलागीबाट आयको स्रोतसमेत गुमेकोपछि पार्वतीले गुनासो पोखिन् । ‘मैले १५ वर्षदेखि गाईकै आम्दानीबाट घर खर्च धान्ने, छोराछोरी पढाउने गर्दै आएकी थिएँ,’ उनले रुँदै भनिन्,‘सम्पूर्ण सम्पत्ति गुम्यो ।’ पार्वतीले तीन वटा गाईबाट उत्पादन हुने आम्दानीको आशाले भूकम्पले क्षतिग्रस्त घर उभ्याइन् । ‘१५ लाख रुपैयाँभन्दा बढी त ऋण नै छ, दुई वटा गाई ब्याएपछि बेचेर केही ऋण तिर्ने विचार गरेकी थिएँ,’ उनी बताउँछिन्,‘एउटा गाई भर्खरै ब्याएको थियो, माउबाछा नै मर्‍यो । घरकै बाछी हुर्काएर माउ बनाएकी थिएँ ।’

पार्वतीका अनुसार दैनिक १५ देखि २० लिटर दूध बेच्न थालिएको थियो । आगलागीबाट मरेका गाई छिमेकीहरुले खाल्डा खनेर गाडीदिएका छन् ।

प्रकाशित : असार ११, २०७७ २३:४०
प्रतिक्रिया
पठाउनुहोस्

अस्ट्रेलियाका दस हजार परिवारमा कोरोना परीक्षण गरिने

(एजेन्सी)

मेलबर्न — अस्ट्रेलियामा स्वास्थ्यकर्मीहरूले घरघरमा गएर कोरोना परीक्षण गर्ने भएका छन् । कोरोना भाइरस (कोभिड–१९) बाट पछिल्लो समय मेलबर्नलगायत स्थानमा संक्रमितको संख्या बढेपछि यस्तो योजना बनाइएको हो । अधिकारीहरूका अनुसार तत्काल मेलबर्नका करिब १० हजार घरपरिवारमा पुगेर स्वास्थ्यकर्मीले भाइरस परीक्षण गर्नेछन् ।

अस्ट्रेलियामा कोभिड–१९ को संक्रमण नियन्त्रणमा आएको जनाएको केही समयमै फेरि संक्रमण बिस्तार हुन थालेको हो । गत बिहीबार भिक्टोरिया राज्यका ३३ जनामा भाइरसको संक्रमण पुष्टि भएको थियो । अस्ट्रेलियामा तीन महिनायता पहिलो पटक यति धेरै संख्यामा संक्रमित भेटिएका हुन् ।

अधिकारीहरूले संक्रमण फैलिएको क्षेत्र निकै चुनौतीपूर्ण भएको जनाएका छन् । संक्रमण फैलिएको क्षेत्रमा सरकारले एक हजार सैनिकसमेत परिचालन गरिएको जनाएको छ ।

परीक्षण कार्यमा संलग्न प्रिमियर ड्यानियल एन्डु्रजले दैनिक १० हजार जनाको परीक्षण गरिने योजना रहेको जनाए । यही दरमा भाइरसको परीक्षण कार्य करिब १० दिनसम्म जारी रहने उनको भनाइ छ ।

नागरिकप्रति राज्यको दायित्वका रूपमा सबै परीक्षण नि:शुल्क गरिने उनले बताए । परीक्षण कार्यमा खटिएका स्वास्थ्यकर्मीलाई सेनाले सहयोग गर्ने जनाइएको छ । अस्ट्रेलियामा अहिलेसम्म ७ हजार ५ सय जना कोभिड–१९ बाट संक्रमित भइसकेका छन् भने १ सय ४ जनाको मृत्यु भएको छ ।

प्रकाशित : असार ११, २०७७ २३:१९
पूरा पढ्नुहोस्
प्रतिक्रिया
पठाउनुहोस्
×