भक्तपुरका संक्रमित‍को परिवारको कोरोना रिपोर्ट नेगेटिभ- उपत्यका - कान्तिपुर समाचार

भक्तपुरका संक्रमित‍को परिवारको कोरोना रिपोर्ट नेगेटिभ

कान्तिपुर संवाददाता

भक्तपुर — भक्तपुरका कोरोना संक्रमित पुरुषको परिवारसहित १२ जनाको रिपोर्ट नेगेटिभ देखिएको छ । कोरोना भाइरस (कोभिड–१९) संक्रमण पुष्टि भएका ती पुरुषको ११ जना परिवार र १ स्थानीयको रिपोर्ट नेगेटिभ आएको हो ।

भक्तपुर नगरपालिका–५ भेलुखेलका ४२ वर्षीय पुरुषमा गत मंगलबार कोरोना भाइरस संक्रमणको पुष्टि भएको थियो । उनी काठमाडौं महानगरपालिकाका सवारी चालक हुन् ।

बुधबार ती संक्रमितको ११ जना परिवार सदस्य र प्रत्यक्ष सम्पर्कमा रहेका १ जना गरी १२ जनाको ‘नोजल स्वाब’ संकलन गरेर राष्ट्रिय जनस्वास्थ्य प्रयोगशालामा परीक्षणका लागि पठाइएको थियो ।

यसैबीच भक्तपुर नगरपालिकाका ७१ जनाको पीसीआर परीक्षणको रिपोर्ट नेगेटिभ आएको छ । नगरपालिकाले र्‍यापिट डाइग्नोस्टिक टेष्ट (आरडीटी) परीक्षण गराउँदा २ जना कर्मचारीमा आरडीटी रिपोर्ट पोजिटिभ देखिएपछि जनप्रतिनिधि, कर्मचारीलगायत १ सय ४३ को पीसीआर परीक्षण गराएको थियो ।

जसमध्ये ७१ जनाको रिपोर्ट नेगेटिभ आएको नगरपालिकाले जनाएको छ । अन्यको रिपोर्ट आउन बाँकी रहेको वडा नम्बर ९का वडाध्यक्ष रविन्द्र ज्याख्वले बताए । आरडीटी रिपोर्ट पोजिटिभ आएका दुवैजना कर्मचारीको पीसीआर रिपोर्ट नेगेटिभ आएको उनले बताए ।

जनप्रतिनिधि र कर्मचारीको कोरोना भाइरस परीक्षणका क्रममा शुक्रबार वडा नम्बर ९ की वडा महिला सदस्यलाई कोरोना संक्रमण पुष्टि भएको थियो । संक्रमित महिलालाई पाटन अस्पतालमा भर्ना गरिएको छ ।

उनको स्वास्थ्य अवस्था सामान्य गरेको नगरपालिकाले जनाएको छ । कोराना भाइरस संक्रमण पुष्टि भएकी महिलाको परिवारसहित प्रत्यक्ष सम्पर्कमा रहेका १९ जनाको स्वाब परीक्षणका लागि राष्ट्रिय जनस्वास्थ्य प्रयोगशाला टेकु पठाइएको छ ।

प्रकाशित : जेष्ठ १२, २०७७ १४:२६
प्रतिक्रिया
पठाउनुहोस्

कोरोना रोकथाम गर्न उच्च अदालत तुलसीपुरको ११ बुँदे आदेश

मधु शाही

बाँके — उच्च अदालत तलुसीपुर, नेपालगन्ज इजलासले कोरोना रोकथाममा पर्याप्त सावधानी अपनाउन आदेश दिएको छ । यससँगै अदालतले सोमबार ११ बुँदे आदेश जारी गरेको हो ।


आदेशअनुसार क्वारेन्टाइन आइसोलेसन सञ्चालन, वृद्धवृद्धाका लागि घर दैलोमा सामाजिक सुरक्षा भत्ता, सुर्तिजन्य पदार्थ बिक्री वितरणमा रोक, सरोकारवालासँगको परामर्शमा कोरोना महामारी रोकथाम न्यूनिकरण नीति निर्देशिका तत्काल बनाइ कार्यान्वयन गर्न, सिमा नाकामा प्रभावकारी सुरक्षा व्यवस्था अपनाउन, नेपाल आउनेहरुको लागि अनिवार्य क्वारेन्टाइनको व्यवस्थापन लगायत बुँदा छन् ।

नेपालगन्ज बार एसोसिएसनका उपाध्यक्ष अधिवक्ता सुनिल कुमार श्रेष्ठ, बसन्त गौतम, सुरेश कुमार गौतम, प्रहलादबहादुर कार्की, रामकुमार दिक्षित, प्रभाकर भट्टराई, पत्रकार पोषण केसी, मानव अधिकारकर्मी कृष्ण मुरारी, प्रसाद भट्ट, लक्ष्मी तिवारी लगायतले संयुक्त रुपमा उच्च अदालतमा निवेदन दायर गरेका थिए । रिटमा बाँके र बर्दियाका सबै स्थानीय तह, प्रहरी प्रशासन र प्रदेश सरकार, स्वास्थ्य मन्त्रालय लगायतका ३७ निकायलाई विपक्षी बनाइएको छ ।


प्रकाशित : जेष्ठ १२, २०७७ १४:२१
पूरा पढ्नुहोस्
प्रतिक्रिया
पठाउनुहोस्
×