संक्रमितका साथी पनि आइसोलेसनमा

कान्तिपुर संवाददाता

भक्तपुर — मध्यपुर थिमि–४ शंखधर चोकस्थित कोठामा बस्दै आएकी स्टाफ नर्सकी साथीमा कोरोना भाइरस (कोभिड–१९) पोजिटिभ देखिएपछि उनलाई पनि भक्तपुर अस्पतालको आइसोलेसनमा राखिएको छ । 

महानगरीय प्रहरी परिसर भक्तपुरका प्रमुख एसपी सबिन प्रधानका अनुसार सहिद धर्मभक्त राष्ट्रिय प्रत्यारोपण केन्द्रमा कार्यरत स्टाफ नर्सको ‘नेजल स्वाब’को नमुना संकलन गरेर आइसोलेसनमा राखिएको हो । उनको नमुना परीक्षणका लागि राष्ट्रिय जनस्वास्थ्य प्रयोगशाला पठाइएको छ ।

प्रयोगशालाले मंगलबार ललितपुरको आरोग्य प्रतिष्ठानमा कार्यरत २५ वर्षीयामा कोरोना भाइरस संक्रमण भएको पुष्टि गरेको थियो । कोरोना संक्रमितलाई मंगलबार नै शुक्रराज ट्रपिकल तथा सरुवा रोग अस्पतालमा भर्ना गरिएको स्वास्थ्य मन्त्रालयले जनाएको छ । उनी वैशाख २९ मा सुनसरी रामधुनी नगरपालिका झुम्काबाट मोटरसाइकलमा मध्यपुर थिमि आइपुगेकी हुन् ।

सहिद धर्मभक्त राष्ट्रिय प्रत्यारोपण केन्द्रले कोरोना संक्रमितको सम्पर्कमा आएकी स्टाफ नर्स वैशाख २६ गतेबाट अस्पतालमा उपस्थित नभएको भन्दै सूचना प्रकाशित गरेको छ । केन्द्रले अस्पतालमा कार्यरत कुनै कर्मचारीलाई पनि कोरोना भाइरसको संक्रमण पुष्टि नभएको समेत जनाएको छ ।

रामेछाप घर भई चाँगुनारायण नगरपालिका–१ दुवाकोट बस्ने २७ वर्षीय पुरुषमा समेत कोरोना पुष्टि भएपछि उनी बसेको क्षेत्रमा पनि प्रहरीले सिल गरेको छ ।

प्रकाशित : वैशाख ३१, २०७७ १९:१७
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

बच्चा च्यापेर काम गर्ने यी आमाहरु [तस्बिरहरु]

रमेशकुमार पौडेल

चितवन — राप्ती नगरपालिका–१३ स्थित पहाडी गाउँ लोथर कालिटारमा मकैका बोट लहलह हुन थालेका छन् । मकै हुर्कंदै गर्दा झार पनि गोड्ने गरिएको छ । कालिटारका बिर्खबहादुर चेपाङको बारीमा मकै गोड्ने खेताला (कामदार) खेतभरि नै थिए । तीन जना महिला आफ्ना नानी ढाडमै बोकेर अरु खेताला बराबर काममा व्यस्त देखिए ।

झिम्कीमाया चेपाङ एक वर्षको छोरो निरजलाई बोकेरै काममा जुटेकी थिइन् भने मिनु चेपाङले पनि १० महिने छोरी एरिमियालाई मजेत्रोले बेरेर बोकेकी थिइन् । आमा काममा तल्लीन हुँदा केही बच्चा भने निदाएका थिए । २१ वर्षकी पूर्णिमाया चेपाङको काखमा भने ६ महिनाकी छोरी इच्छामाया थिइन् । उनीचाहिँ वितरण गरिएको ३० किलो चामलको बोरा पछाडि बोकेर कालिटारबाट बाटो लागिन् । उनलाई करिब ३ घण्टा परको गाउँ जानु थियो ।

पछाडि ३० किलोको भारी थियो, अगाडि मजेत्रोको झोलुंगोभित्र छोरी । पूर्णिमायाको खुट्टा पनि नांगै थिए । तर बाटाका चुच्चा ढुंगाको उनलाई वास्ता थिएन । चिप्ला ढुंगा पनि आउँथे । उनी निकै सम्हालिएर पाइला चाल्थिन् ।

चेपाङ चितवनको विकट पहाडी क्षेत्रमा बसोबास भएका आदिवासी समुदाय हुन् । उनीहरुले कम उमेरमा बिहे गर्ने र धेरै बच्चा जन्माउने परिपाटी छ । यद्यपि चेपाङ अगुवाहरु कम उमेरमा बिहे गर्ने चलन निकै घट्दै गएको बताउँछन् । परिवार नियोजन गरेर जन्मान्तर बढाउने र कम बच्चा जन्माउने पनि बढ्दै छन् । बच्चासँगै काममा निस्कनु धेरैका लागि बाध्यताजस्तै बनेको छ ।

राप्ती–१३ मा यसपालि सामान्यतया बच्चालाई लाग्ने दादुरा रोगको प्रकोप देखियो । स्वास्थ्य शाखाले भर्खरमात्र यस क्षेत्रका बालकालिकालाई दादुराको खोप पनि लगाएको छ ।

प्रकाशित : वैशाख ३१, २०७७ १८:५५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
×