धमाधम आकस्मिक कोष बन्दै

कोषबाटै स्वास्थ्यकर्मीलाई दैनिक ५ सय रुपैयाँ प्रोत्साहन भत्ता र मासिक २५ लिटर इन्धन
सीमा तामाङ

ललितपुर — ललितपुर महानगरपालिकाले कोरोना भाइरस (कोभिड–१९) को जोखिम न्युनीकरण र नियन्त्रका लागि आकस्मिक कोष नछुट्याए पनि विपद् व्यवस्थापन समितिमार्फत काम गर्दै आएको जनाएको छ ।

महानगरपालिकाका प्रवक्ता राजु महर्जनले नगरस्तरीय विपद् व्यवस्थापन समितिको कोषमा एक करोड ५० लाख रुपैयाँ रहेको र हाल उक्त समितिअन्तर्गत नै काम गरिरहेको बताए ।


महानगरको २९ वटै वडाको विपद् व्यवस्थापन समितिमा पनि एक/एक लाख रुपैयाँ रहेको उनले जानकारी दिए । ‘वडाले वडास्तरीय समितिबाट कोरोना भाइरससम्बन्धित जनचेतनामूलक कार्यक्रम, मास्क र सेनिटाइजर वितरण र किटनाशक औषधि छर्किरहेको छ,’ उनले भने, ‘अहिले विदेशबाट आएका र मजदुरहरुको तथ्यांक सकंलन भइरहेको छ ।’


दैनिक ज्याला मजदुरी गर्नेलाई राहत वितरण गर्न संघीय सरकारले २५ लाख रुपैयाँ दिने जानकारी प्राप्त भएको उनले बताए । उनका अनुसार नगरस्तरिय समितिमै उक्त रकम राखेर राहत वितरण गरिनेछ । ‘अझ लकडाउनको समय लम्बियो र छुट्टै कोष नै बनाउनु पर्ने अवस्था आयो भने बताउँछौं,’ उनले भने ।


काठमाडौं महानगरपालिकाले कोरना भाइरस संक्रमण, रोकथाम तथा नियन्त्रणका लागि १० करोडको रुपैयाँको आकस्मिक कोष स्थापना गरेको छ । वडाअनुसार दुईदेखि चार लाख रुपैयाँसम्म बजेट पठाइसकिएको र पुनः सोही मात्रामै पठाउने तयारी भइरहेको महानगरले जनाएको छ ।


महानगरपालिकाका प्रवक्ता इश्वरमान डंगोलले कोषबाटै कोरोना भाइरस रोकथामको लागि आवश्यक पर्ने अत्यावश्यक सामाग्रीदेखि व्यवस्थापनसम्मको खर्च भइरहेको बताए । ‘कोरोनासम्बन्धी जनेतनामूलक पम्पलेट, ब्यानर र पर्चादेखि मास्क तथा किटनाशक औषधि छर्कदैछौं,’ उनले भने, ‘अब क्वारेन्टाइन तथा आइसोलेसन बनाउन छलफल गर्दैछौं ।’


गोदावरी नगरपालिकाले ५१ लाख रुपैयाँको आकस्मिक कोष खडा गरेको जनाएको छ । नगरपालिकाले कोषबाटै स्वास्थ्यकर्मीलाई दैनिक ५ सय रुपैयाँ प्रोत्साहन भत्ता समेत दिइरहेको नगरप्रमुख गजेन्द्र महर्जनले बताए । उनका अनुसार कोषमा रकम जम्मा गर्न नगरपालिकाले अन्य संघसस्थालाई पनि आहृवान गरेको छ ।


जनचेतना फैलाउन नगरबाट परिचालन भएका स्वास्थ्यकर्मी, जनप्रतिनिधि तथा कर्मचारी संक्रमित भई उपचार गर्नुपरेमा निःशुल्क गर्ने र संक्रमणबाट मृत्यु भएमा तिनको परिवारलाई १० लाख रुपैयाँ पनि कोषबाटै उपलब्ध गराउने निर्णय भएको उनले बताए । लकडाउनको अवधिभर स्वास्थ्य चौकीमा खटिएका स्वास्थ्यकर्मीलाई मासिक २५ लिटरका दरले इन्धनसमेत दिइनेछ । आवश्यक परेको खण्डमा नगरपलिकाले फेरि बजेट छुट्याउने उनले जनाए ।


गोकर्णेश्वर नगरपालिकाले पनि ५० लाख रुपैयाँको आकस्मिक कोष बनाएको नगप्रमुख सन्तोष चालिसेले बताए । कोषबाट कोरोना भाइरससम्बन्धी जनचेतनामूलक कार्यक्रमदेखि विपन्नलाई राहत, क्वारेन्टाइन तथा आइसोलेसन कक्ष तयार गरिने उनले जानकारी दिए ।

प्रकाशित : चैत्र १८, २०७६ १७:२६
ADVERTISEMENT
प्रतिक्रिया
पठाउनुहोस्

पोखरामा पनि कोरोना भाइरसको नमुना परीक्षण हुने

पीसीआर मेसिनसहितका सामान र प्राविधिक आइपुगे
दीपक परियार

पोखरा — कोरोना भाइरस (कोभिड–१९) को परीक्षण पोखरामै हुने भएको छ। शंकास्पद बिरामीको स्वाब परीक्षण गर्ने पीसीआर मेसिनसहितका सामान मंगलबार पोखरा आइपुगेको हो।

काठमाडौंदेखि हेलिकप्टरमार्फत ल्याइएको उक्त मेसिन पोखरा स्वास्थ्य विज्ञान प्रतिष्ठानको प्रयोगशालामा राखिएको छ। बिरामीको नमुना संकलनका लागि आवश्यक किट, रसायन पनि ल्याइएको छ। केही प्राविधिक समेत पोखरा आएका छन्। मंगलबारदेखि नै संकलित नमुना परीक्षण गर्न सुरु गर्ने प्रदेश स्वास्थ्य निर्देशक डा. विनोदविन्दु शर्माले बताए। पोखरामा सुरुआत भएपछि नमुना परीक्षणको संख्या बढाइने उनको भनाइ छ।

चीनबाट प्राप्त सामग्रीसमेत पोखरा आइपुगेको छ। १ हजार थान पीपीई सेट, २० हजार थान मास्क, २० हजार थान पन्जा, ४ सय थान एन९५ मास्क, १० थान इन्फ्रारेड थर्मोमिटर र १ सेट पोर्टेबल भेन्टिलेटर गण्डकी प्रदेशका लागि आएको हो।

प्रदेशमा हालसम्म ४३ वटा नमुना संकलन भएकोमा बागलुङका एक जनामा कोरोना भाइरसको संक्रमण पुष्टि भएको छ। हालसमम २० जनाको नेगेटिभ नतिजा आएको छ भने २२ को नजिता आउन बाँकी छ।

प्रकाशित : चैत्र १८, २०७६ १७:१८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×