विदेशबाट फर्केकाको स्वास्थ्य सामान्य

प्रशान्त माली

ललितपुर — गोदावरी र महालक्ष्मी नगरपालिकामा विदेशबाट फर्केर सम्पर्कमा आएका कोहीमा पनि कोभिड–१९ संक्रमण नदेखिएको नगर प्रमुखहरूले बताएका छन् । 

गोदावरीमा विदेशबाट आएका ५४ जना नगरपालिकाको सम्पर्कमा छन् । तीमध्ये ३५ जनाको स्वास्थ्य परीक्षण गर्दा सबैमा नेगेटिभ देखिएको गोदावरीका प्रमुख गजेन्द्र महर्जनले बताए । ‘अरू १९ जना होम क्वारेन्टाइनमा छन्,’ उनले भने । गोदावरीमा चैत १ गतेयता विदेशबाट आउनेलाई होम क्वारेन्टाइनमा बस्न भनिएको छ ।


नगर प्रमुख महर्जनका अनुसार कोभिड–१९ को आशंकामा बज्रबाराही चापागाउँ नगर अस्पतालको आइसोलेसन वार्डमा राखिएकी १८ वर्षीया किशोरीमा पनि संक्रमण नभएको पुष्टि भएको छ । ती किशोरी बोस्नियाबाट चैत २ गते आएकी हुन् ।


महालक्ष्मीमा विदेशबाट आएका ४१ जना नगरको सम्पर्कका छन् । स्थानीय स्वास्थ्यकर्मी र अस्पतालमा जाँच गराउँदा उनीहरू सबैमा स्वास्थ्य सामान्य पाइएको नगर प्रमुख रामेश्वर श्रेष्ठले बताए । ‘चिकित्सकले उनीहरूलाई होम क्वारेन्टाइनमा राखे पुग्ने सल्लाह दिएअनुसार व्यवस्था मिलाएका छौं,’ उनले भने ।


गोदावरीले गोदावरी भिलेज रिसोर्टसँगको समन्वयमा ४० शय्याको क्वारेन्टाइन र चापागाउँस्थित बज्रबाराही चापागाउँ नगर अस्पतलामा १० शय्याको आइसोलेसन वार्ड तयार गरेको छ । महालक्ष्मीले किस्ट अस्पतालसँगको सहकार्यमा ६० शय्याको आइसोलेसन र २२ शय्याको आईसीयू वार्ड तयार पारेको छ ।

प्रकाशित : चैत्र १८, २०७६ १५:५९
ADVERTISEMENT
प्रतिक्रिया
पठाउनुहोस्
ADVERTISEMENT

कोरोना त्रासले घर भाडामा बस्‍ने नर्स निकालेको आरोपमा घरबेटी पक्राउ

दुर्गालाल केसी

दाङ — घर भाडामा बस्दै आएकी एक नर्सलाई कोरोना संक्रमणको त्रासले कोठाबाट निकालेको भन्दै प्रहरीले मंगलबार घोराहीमा एक घरबेटीलाई पक्राउ गरेको छ ।

तुलसीपुर उपमहानगरपालिका १६ गणेशपुरकी २० वर्षीया सिर्जना खड्कालाई घरबाट निकालेको भन्दै प्रहरीले घोराही उपमहानगरपालिका १८ नवलपुर निवासी नारायण आचार्यलाई पक्राउ गरेको हो ।

घोराहीस्थित बुद्ध इन्टरनेशनल हस्पिटलमा कार्यरत खड्कालाई हस्पिटल जाँदाआउँदा कोरोना संक्रमण हुनसक्ने भन्दै घरबेटी आचार्यले कोठामा बस्ने नदिएको गुनाशो आएको थियो । उक्त गुनासोका आधारमा आचार्यलाई पक्राउ गरी आवश्यक अनुसन्धान गरिरहेको प्रमुख जिल्ला अधिकारी गोविन्दप्रसाद रिजालले बताए । आचार्य घोराही उपमहानगरपालिका–२ को कार्यालयमा वडा सचिव पद्मा कार्यरत रहेको उनले जानकारी दिए ।

मंसिरदेखि कोठा भाडामा बस्दै आएकी खड्का चैत १५ देखि कोठा भाडामा बस्न नपाएको गुनासो आएको थियो । उनले हाल होटेलमा बस्दै आएको बताएकी छन् ।

अहिले घरबेटी आचार्यलाई पक्राउ गरेर छलफल गराउन खोज्दा पीडित भनिएकी नर्स सम्पर्कमा आउन नचाहेको प्रमुख जिल्ला अधिकारी रिजालले बताए । घटनाबारे यथार्थ बुझेर निष्कर्षमा पुग्ने उनले बताए । कोरोना त्रासकै कारण स्वास्थ्यकर्मीलाई घरभाडामा बस्न कठिन भएको गुनासो आएपछि जिल्ला प्रशासन कार्यालयले मंगलबार एक सूचना जारी गरी सबै घरबेटीहरुलाई यस्तो व्यवहार नगर्न अनुरोध गरेको थियो ।

कठिन परिस्थितीमा स्वास्थ्य सेवामा खटिरहेका स्वास्थ्यकर्मीहरुलाई घरभाडामा बस्न नदिए कडा कारवाही गरिने प्रशासनले सूचनामार्फत सबैलाई सचेत पारेको छ ।

घरभाडामा बसेका स्वास्थ्यकर्मीहरुलाई घरबाट निकाल्ने काम नगर्न सचेत पार्दै मंगलबार जिल्ला प्रशासन कार्यालयले जारी गरेको सूचना ।

प्रकाशित : चैत्र १८, २०७६ १५:५७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×