तरकारी बजार क्षेत्रमा एक मिटरको दूरी कायम

तरकारी किन्न आउने उपभोक्ताले बक्सभित्र उभिएर लामबद्ध भई सामान खरिद गर्नु पर्ने नगरपालिकाले जनाएको छ । नगरको टौमढी, ग:हिटी, नासमना, दत्तात्रय, च्याम्हासिंह, कमलविनायकमा दूरी कायम गरिएको छ ।

त्यस्तै, सूर्यविनायक नगरपालिका–२ बालकोट चोकका किराना पसल व्यवसायीहरुले दैनिक उपभोग्य सामग्री खरिदका लागि आउनेहरुको सुरक्षाको लागि दूरी कायम गरेका वडासदस्य सुवास कार्कीले बताए । उनका अनुसार किराना पसल, वडा कार्यालयलगायत क्षेत्रमा उपभोक्ताले सामाजिक दूरी कायम गरेपछि मात्र सामान खरिद गर्न सकिने छ ।

महानगरीय प्रहरी वृत्त जगातीले सूर्यविनायक–६ सूर्यविनायकस्थित विभिन्न खाद्यान्न, तरकारी तथा फलफूल पसल सञ्चालक, सेवाग्राहीलाई १ मिटर दूरी कायम गर्न अनुरोध गरेको छ । प्रहरी निरीक्षक राजकुमार थापा नेतृत्वको अनुगमन टोलीले कोभिड–१९ बाट बच्न पसलमा आउने उपभोक्तालाई १ मिटरको दूरी कायम गर्न, हात धुने र स्यानीटाइजरको व्यवस्थापन गर्न निर्देशन दिएको छ ।

‘डीस–इन्फेक्टेन्ट’छर्कियो

मध्यपुर थिमि नगरपालिकाले ‘डीस–इन्फेक्टेन्ट’ छर्कन सुरु गरेको छ । नगरप्रमुख मदनसुन्दर श्रेष्ठका अनुसार नगरको ४, ५ र ६ वडामा शुक्रबार डीस–इन्फेक्टेन्ट छर्किएका छन् । शुक्रबार बहाखाबजारबाट सुरु गरेर शंखधर चोकसम्म डीस–इन्फेक्टेन्ट छर्किएको उनले बताए । नगरपालिकाले ट्र्याक्टरमार्फत स्प्रे गरेको छ ।

त्यसैगरी, भक्तपुर नगरपालिकाले कोभिड–१९ संक्रमणबाट सर्वसाधारणलाई सुरक्षित गर्न विभिन्न स्थानमा कीटनाशक झोल स्प्रे ‘डीस–इन्फेक्टेट’ गरेको छ । नगरको च्याम्हासिंह, बाराहीस्थान, ग:पली, इचाडोल, डोक्छें, तालाक्व, बुलुचा, खौमा, इताछें, मिवाछें, कमलविनायक आवास क्षेत्र, तुमचो दुगुरे आवास क्षेत्र, ब्यासीदेखि कमल विनायकसम्मको मूलसडक, लिवाली आवास क्षेत्र र च्याम्हासिंहदेखि जगातीसम्मको सडकमा कीटनाशक झोल स्प्रे गरेको नगरपालिका स्यानिटेसन शाखा प्रमुख दिलीप सुवालले बताए । कीटनाशक झोल स्प्रेको कामलाई निरन्तरता दिइने उनले बताए ।

नगरपालिकाले शुक्रबार एक वक्तव्य जारी गर्दै अत्यावश्यक सामान खरिदको लागि बाहिर निस्कँदा तोकिएको स्थानमा अर्को व्यक्तिसँग एक मिटरको दूरी कायम गरी लामबद्ध भई सामान खरिद गर्न आह्वान गरेको छ । नगरपालिकाले हरेक दिनको बिहान ५ देखि ८ र साँझ ५ देखि ७ बजेसम्म सामान खरिदको समय निर्धारण गरेको छ । सामान खरिदको लागि तोकिएको समयमा अत्यावश्यक परेको अवस्थामा मात्र घर बाहिर निस्कन अनुरोध गरेको छ ।