यात्रुवाहक र मालवाहकलाई बायाँ लेन
काठमाडौँ — महानगरिय ट्राफिक प्रहरी महाशाखाले सूर्यविनायक–जडिबुटी सडकखण्डमा यात्रुवाहक तथा मालवाहक सवारीले बायाँ लेनबाट मात्रै गुडाउनुपर्ने नियम बनाएको छ । निजी तथा साना सवारीसाधनलाई भने दायाँ लेनबाट मात्र चल्न पाउने नियम ल्याएको हो । यो नियम बुधबारदेखि लागू गरिने महाशाखा प्रमुख भीमप्रसाद ढकालले बताए ।
पछिल्लो समय उपत्यकाको सवारी आवागमनलाई थप सहज र प्रभावकारी बनाउन महाशाखाका प्रहरी उपरीक्षक जीवनकुमार श्रेष्ठको अध्यक्षतामा गठित सुझाव समितिले उक्त सडकखण्ड अनुगमन गरी ट्राफिक व्यवस्थापनमा सुधार ल्याउन दायाँ र बायाँ लेनको व्यवस्था गर्दा दुर्घटना न्यूनीकरणमा सुधार हुन सक्ने सुझाव दिएका थिए । यात्रुबाहक बायाँ लेनबाट र द्रुत गतिमा हिँड्ने दायाँ लेनबाट चल्ने अन्तर्राष्ट्रिय अभ्यासलाई कार्यान्वयन गर्न लागिएको उनले बताए ।