मोटरसाइकल दुर्घटनामा १ को मृत्यु, १ जना घाइते

बिहीबार राति काभ्रेबाट मध्यपुर थिमितर्फ आउँदै गरेको प्रदेश ३–०२–००७ प २७७६ नम्बरको मोटरसाइकल अनियन्त्रित भई सडकको रेलिङ्गमा ठोक्किएको हो । दुर्घटनामा मोटरसाइकलमा सवार जितपुर सिमरा उपमहानगरपालिका–१४ घरभई बालकोट बस्ने २६ वर्षीया शान्ति गौतमको मृत्यु भएको प्रहरीले जनाएको छ । मोटरसाइकल दुर्घटनाबाट सख्त घाइते गौतमको उपचारको क्रममा मध्यपुर अस्पताल नयाँ थिमिमा मृत्यु भएको महानगरीय प्रहरी वृत्त जगाती प्रमुख डीएसपी चक्रराज जोशीले बताए ।

मोटरसाइकल चालक मध्यपुर थिमि नगरपालिका–७ नगदेशका २३ वर्षीय राजीव बाँडे घाइते छन् । घाइतेको मध्यपुर अस्पतालमै उपचार भइरहेको उनले बताए । शव पोस्टमार्टमका लागि शिक्षण अस्पताल महाराजगञ्ज पठाइएको छ ।