आश्रममाथि छानबिन सुरु

कान्तिपुर संवाददाता

काठमाडौं — जिल्ला प्रशासन कार्यालय काठमाडौंले पशुपति अन्नपूर्णा आश्रममाथि छानबिन सुरु गरेको छ  । आश्रमले विधान केरमेट गरेर सदस्य शुल्क बढाएको, दर्ताबिनै अन्तर्राष्ट्रिय अन्नपूर्ण आश्रम सञ्चालन गरेको, नक्कली विद्यावारिधिको डिग्री प्रदान गरेको, सरकारका सचिवको हस्ताक्षर दुरुपयोग गरेको विषयमा उजुरी परेपछि प्रशासनले छानबिन थालेको हो  ।

सहायक प्रमुख जिल्ला अधिकारी कृष्णबहादुर कटुवालको संयोजकत्वमा तीन सदस्यीय छानबिन समिति गठन गरेको हो ।

‘उजुरीका आधारमा छानबिन सुरु भएको छ । कमजोरी भेटियो भने थप छानबिन गर्न प्रहरीलाई निर्देशन दिन्छौं,’ काठमाडौंका प्रमुख जिल्ला अधिकारी जनकराज दाहालले भने । समितिका सदस्य प्रशासनका कानुन अधिकृत तारानाथ शर्माले संस्थाले बदमासी गरेको केही तथ्य छानबिन क्रममा भेटिएको बताए । ‘केही दिनमै प्रतिवेदन बुझाउँछौं,’ उनले भने ।

प्रशासनमा प्राप्त उजुरीमा संस्थाको विधान केरमेट गरेर साधारण सदस्यको वार्षिक शुल्क एक सयलाई एक हजार एक सय, आजीवन सदस्य पाँच सयलाई पाँच हजार पाँच सय र यशस्कृत सदस्यको ११ हजार एक सय ११ लाई एक लाख ११ हजार एक सय ११ बनाएको उल्लेख छ । कान्तिपुरलाई प्राप्त संस्थाको विधानमा भने केरमेट गरिएको छैन ।

एक लाख रुपैयाँमा सदस्यता बनाएको भन्दै उजुरीकर्ताले रसिदसमेत पेस गरेका छन् । ‘त्यो रसिद त्रिवि परिसरमा सरस्वती मन्दिर बनाउन सहयोग उठाउँदा काटेको हो,’ आश्रमका अध्यक्ष जगदीश वैद्यले भने, ‘हाम्रोमा सदस्य बन्न पैसा तिर्नु पर्दैन।’

प्रकाशित : मंसिर ६, २०७६ १९:१५
ADVERTISEMENT
प्रतिक्रिया
पठाउनुहोस्

आरोहीको सम्झनामा हेल्थ पोस्ट भवन

कान्तिपुर संवाददाता

ललितपुर — जापानी महिला सगरमाथा आरोही एइको हिसानोको सम्झनामा ललितपुरको घुसेलमा हेल्थ पोस्ट निर्माण गरिएको छ  । घुसेल माध्यमिक विद्यालयमा एकतल्ले भवन निर्माण भएको हो  ।

नेपालमा स्वास्थ्य तथा शिक्षा क्षेत्रमा सहयोग गर्न संकलित १८ लाख रुपैयाँ उनकी बहिनी आशामोरा रोयोकोले उक्त भवन निर्माणका लागि दिएकी थिइन् । हिसानोको भने निधन भइसकेको छ ।

भवनको तीन कोठामध्ये एउटामा हेल्थपोस्ट, अर्कोमा स्थानीय महिलाको सिप विकासका लागि सिलाइ प्रशिक्षण केन्द्र र एउटा कोठा स्थानीय समुदायको सभाकक्षका रूपमा प्रयोग गर्न लागिएको छ ।

प्रकाशित : मंसिर ६, २०७६ १९:१५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×