विवाद कम गर्न बजेट विनियोजनमा मापदण्ड

लीला श्रेष्ठ

काठमाडौँ — कार्यपालिका प्रमुख र वडाध्यक्ष फरक दलको हुने स्थानीय तहमा बजेट विनियोजनमा विभेद गरेको भन्दै विवादसमेत हुने गरेका छन् । 

जसका कारण विकास निर्माणमा गतिरोध उत्पन्न भएका उदाहरण पनि छन् । तर, कागेश्वरी मनोहरा नगरपालिकाले बजेट विनियोजनमा भिन्न शैली अपनाएको छ । जनसंख्या, भूगोल र राजस्वको आधारमा वडालाई समानुपातिक बजेट विनियोजन गर्दा जनप्रतिनिधिहरू खुसी छन् ।

न्यूनतमभन्दा बढी बजेट दिलाउन नगरपालिकाले यस्तो मापदण्ड अपनाएको हो । नगरपालिकाले वडालाई न्यूनतम एक करोड बजेट दिएपछि थप अनुदान जनसंख्याको आधारमा ४० प्रतिशत, भूगोलका आधारमा ३० प्रतिशत र वडाले उठाएको राजस्वको आधारमा ३० प्रतिशत थप्ने व्यवस्था मिलाएको छ । ‘सबैलाई समान बजेट दिने हो भने जनसंख्या धेरै हुने र भूगोल ठूलो भएको वडालाई बजेट अपुग हुन सक्छ,’ नगर प्रमुख कृष्णहरि थापाले भने, ‘हामीले जुन विधि अपनाएका छौं, यसले कसैलाई विभेद पनि हुँदैन ।’
९ वटा वडामध्ये ३ वटामा कांग्रेसले जितेको छ । कागेश्वर मनोहराको वडा नम्बर १ गागलफेदी क्षेत्रफलको आधारमा ठूलो छ । जनसंख्या पनि अरू वडाको तुलनामा कम छ । ‘ग्रामीण भेग भएकाले मेरो वडामा राजस्व पनि कम हुने भयो,’ वडा नम्बर १ का अध्यक्ष मुकुन्दप्रसाद गजुरेलले भने, ‘तर, भूगोलकै कारण वडाको विकास गर्न थप ६१ लाख अनुदान पाएँ ।’

कांग्रेसबाट निर्वाचित २ नम्बर वडाका अध्यक्ष सुदर्शन धिमाल पनि बजेट विनियोजनको यसखाले मापदण्डले कसैले विभेद महसुस गर्नु नपरेको बताउँछन् । ‘कार्यपालिकामा नेकपाको बहुमत भए पनि कांग्रेसले जितेको वडामा बजेटमा अहिलेसम्म कुनै पनि विभेद छैन,’ उनले भने । कांग्रेसबाटै निर्वाचित वडा नम्बर ७ का अध्यक्ष जीवन थापाले पनि स्थानीय तहलाई बलियो बनाउने अभियानमा यो प्रक्रिया समावेशी रहेको बताए । ‘बजेटमा विभेदको अनुभूति भने गर्नुपरेको छैन,’ उनले भने ।

नगरपालिकाले अवलम्बन गरेको यो विधिका आधारमा न्यूनतम एक करोडबाहेक भूगोलको आधारमा सबैभन्दा बढी वडा नम्बर १ ले ६१ लाख ८० हजार, बढी जनसंख्याको आधारमा वडा नम्बर ९ ले ६६ लाख ९५ हजार, आर्थिक वर्ष ०७४/७५ मा वडाले उठाएको राजस्वको आधारमा ९ नम्बरले ६० लाख १९ हजार रुपैयाँ थप अनुदान पाएका छन् ।

‘जहाँ धेरै जनसंख्या र भूगोल हुन्छ, त्यहाँ बढी विकास निर्माण गर्न बजेट आवश्यक हुन्छ । त्यसैले यो विधि हाम्रो लागि उपयुक्त भयो,’ नगर प्रमुख थापाले भने ।

नगरपालिकाले वडालाई प्रदान गरेको अनुदानबाट पूर्वाधार विकासलाई प्राथमिकता दिइएको छ । जसअन्तर्गत अनुदानको पूर्वाधार विकासमा ८० प्रतिशत, सामाजिक विकास तथा क्षमता अभिवृद्विमा ५ प्रतिशत, वातावरण तथा विपद् व्यवस्थापनमा ५ प्रतिशत, उज्यालो नगर अभियानअन्तर्गत ५ र कार्यालय सञ्चालन तथा सार्वजनिक सेवा व्यवस्थापनमा ५ प्रतिशत बजेट ९ वटै वडामा विनियोजन गरेको नगर प्रमुख थापाले बताए ।

प्रकाशित : कार्तिक २०, २०७६ ०९:००
ADVERTISEMENT
प्रतिक्रिया
पठाउनुहोस्
ADVERTISEMENT

सेनाको इतिहास स्मरण गराउने

कान्तिपुर संवाददाता

काठमाडौँ — नेपाली सेनाले अब नेपाल एकीकरणदेखिको इतिहासलाई स्मरण गराउने भएको छ । 

सेनाले जंगी अड्डास्थित प्रधानसेनापति पूर्णचन्द्र थापाको कार्यकक्षमा मंगलबार ‘नेपाल एकीकरण मार्ग कार्यक्रम’ सम्बन्धी प्रस्तुतीकरण तथा छलफल कार्यक्रममा यसबारे जानकारी गराएको हो । सैनिक जनसम्पर्क निर्देशनालयका अनुसार उक्त कार्यक्रममा एकीकरण मार्ग कार्यक्रमसम्बन्धी हालसम्म भएका कार्यहरूको प्रगति र भावी योजनाको विषयमा प्रस्तुति गरिएको थियो । सेनाका प्रवक्ता विज्ञानदेव पाण्डेका अनुसार नेपालको इतिहासलाई स्मरण गराउनका लागि सेनाले अध्ययन गरी बाहिर ल्याउन लागिएको हो । एकीकरण मार्ग कार्यक्रमलाई व्यवस्थित ढंगले कार्यसम्पादन गर्ने उद्देश्यले तयार पारिएको ‘इतिहास संरक्षण एवं सम्वर्द्धन कार्यमा सेनाको सहभागितासम्बन्धी निर्देशिका–२०७६’ को समेत प्रस्तुति गरिएको सेनाले जनाएको छ ।

प्रकाशित : कार्तिक २०, २०७६ ०८:५७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×