विस्तार नगरी कालोपत्र

कान्तिपुर संवाददाता

ललितपुर — पटक–पटक अवरोध हुँदै आएको ढोलाहिटी–चापागाउँ सडकमा हालकै अवस्थामा कालोपत्र गरिने भएको छ । सडक विस्तार नगरीकन जस्ताको तस्तै कालोपत्रे गर्ने सहमति भएको सांसद राजकाजी महर्जनले जानकारी दिए । मंगलबार मन्त्रीस्तरीय बैठकमा ढोलाहिटी–लेले खण्डभित्र पर्ने सडकमा कालोपत्रे गर्ने निर्णय भएको उनले बताए ।

२०६९ सालमा तत्कालीन प्रमुख जिल्ला अधिकारीको नेतृत्वमा बसेको बैठकले सातदोबाटो–ढोलाहिटी १७.२ मिटर कायम गर्ने निर्णय गरेको थियो । पछि अख्तियार दुरुपयोग अनुसन्धान आयोगले २२ मिटर नै कायम गर्न निर्देशन दियो । त्यसयताको विस्तारमा समस्या आउँदा अहिले सडकमा ठुल्ठूला खाल्डाखुल्डी बनेका छन् भने धुलोका कारण स्थानीय मारमा छन् ।

सरकारले कालोपत्रे गर्दागर्दै बीचमा घर तथा जग्गाको क्षतिपूर्ति दिएमा विस्तारित सडकमा अहिलेकै ठेकेदारले कालोपत्रे गर्ने पनि निर्णय भएको सांसद महर्जनले बताए । ‘अहिले कालोपत्रे गर्नका लागि ग्राभेल बिछ्याउने काम भइरहेको छ,’ उनले भने, ‘चाँडोभन्दा चाडो काम सक्ने गरी सहमति भएको छ ।’

सातदोबाटो–लेले सडकको मापदण्ड २२ मिटर छ । ढोलाहिटी–ठेचो ३.२ किमि सडक दिवा र शैलुङ कन्स्ट्रक्सन जेभीले २३ करोड ३१ लाख ४६ हजार रुपैयाँमा र ठेचो–चापागाउँ ४ किमि सडक कन्टेक कम्पनीले २६ करोड ७१ लाख ९३ हजारमा निर्माण गर्ने ठेक्का पाएका थिए ।

गत शुक्रबारमात्रै चापागाउँ, ठेचो र सुनाकोठी सडकखण्डको दुरवस्थाबारे स्थानीयले जनप्रतिनिधि र ठेकेदारप्रति आक्रोश पोखेका थिए । गएको जेठमा ठेचो, चापागाउँ र सुनाकोठीका बासिन्दा मिलेर पाँच दिन सडक ठप्प
पारेका थिए । त्योभन्दा अघि खुमलटारवासीले डिभिजन सडक कार्यालय ललितपुरमा तालाबन्दी नै गरे । सडक ठप्प पारेपछि ती क्षेत्रका सांसद र मेयरले दसैंभित्र कालोपत्रे गरिसक्ने लिखित प्रतिबद्धता जनाए पनि माग पूरा नहुँदा स्थानीय सडकको धुलोका कारण मारमा छन् ।

प्रकाशित : कार्तिक २०, २०७६ ०८:५६
ADVERTISEMENT
प्रतिक्रिया
पठाउनुहोस्

साझा हितलाई प्राथमिकता दिऔं : चिनियाँ राष्ट्रपति

लक्ष्मी लम्साल

(बेइजिङ) — चिनियाँ राष्ट्रपति सी चिनफिङले विश्व समुदायले मानवीयताको साझा हितलाई प्राथमिकता दिनुपर्ने बताएका छन् । चीनको व्यापारिक सहर सांघाईमा सुरु एक्स्पोको उद्घाटन गर्दै उनले भने, ‘हामीले आफ्नो स्वार्थभन्दा पनि पहिले सबैको साझा हितका विषयलाई प्राथमिकता दिनुपर्छ ।’ 

उद्घाटनका अवसरमा बोल्दै सीले अन्तर्राष्ट्रिय स्तरमा सौहार्दता र सहकार्यको खाँचो भएको औंल्याए । उनले भने, ‘यसका लागि हामीहरूले एक–अर्कालाई बेवास्था गर्नुभन्दा पनि हातेमालो गर्नैपर्छ ।’

विश्वका उत्पादनहरू भित्र्याउने लक्ष्यसहित चीनले गतवर्षदेखि प्रारम्भ गरेको चीन अन्तर्राष्ट्रिय आयात एक्स्पोको दोस्रो संस्करण मंगलबार सुरु भएको हो । एक्स्पोमा सहभागी हुन विश्वका लब्धप्रतिष्ठित राजनीतिक प्रतिनिधि तथा व्यापार संगठनका प्रतिनिधिहरू सांघाईमा भेला भएका छन् ।

प्रदर्शनीमा जम्मा ६४ वटा मुख्य अतिथि मुलुकमध्ये एक तिहाइले पहिलो पटक भाग लिँदै छन् भने कर्पोरेट र क्षेत्रगत गरी कूल १५० वटा मुलुक सहभागी भएका छन् । चिनियाँ सञ्चारमाध्यमका अनसार ३ दर्जनभन्दा बढी विकसित देशले भाग लिएका छन् ।

अमेरिकाले आफ्ना उच्चस्तरीय प्रतिनिधि पठाउन इन्कार गरे पनि सबैभन्दा ठूलो व्यवसायीको संख्या भने अमेरिकाबाटै आएको छ । त्यस्तै जर्मनी, दक्षिण कोरिया, इटाली, फ्रान्स, अस्ट्रेलिया, स्विट्जरल्यान्ड, बेलायतलगायतका मुलुकबाट ठूलो मात्रामा सहभागिता छ ।

संयुक्त परामर्श, संयुक्त निर्माण र संयुक्त बाँडफाँड, विश्व शासन विचारधारालाई आत्मसात गर्दै मुलुकहरूबीच सहयोग तथा आदानप्रदानलाई सबल पार्ने र अन्तर्राष्ट्रिय व्यापारको खुला चौतारोको रूपमा स्थापना गर्ने हेतुले चीनले एक्स्पोलाई लिएको छ ।

पहिलो आयात एक्स्पोको तुलनामा परिमाण, गुणस्तर र सिर्जनात्मकताका हिसाबले दोस्रो अझै भव्य हुने भएकाले विश्वको ध्यानाकर्षण भएको छ । उद्घाटन सत्रलाई चिनियाँ सञ्चारमाध्यमहरूले प्राथमिकताका साथ प्रत्यक्ष प्रसारण गरेका थिए । चिनियाँ राष्ट्रपतिले सोमबार नै आयोजना स्थलको तयारीबारे स्थलगत भ्रमण गरी जानकारी लिएका थिए ।

विश्वका धेरै नामी व्यवसायका जिम्मेवार व्यक्तिहरूले चिनियाँ बजारमाथि भरोसा राख्दै यहाँ आफ्नो उत्पादन विस्तार गर्ने राम्रो अवसर भएको भन्दै दोस्रो एक्स्पोलाई सदुपयोग गर्ने रणनीति बनाएका छन् । चीनले खुला अर्थतन्त्रको वकालत गर्दै मुलुकहरूबीचको आदानप्रदानलाई अघि बढाउने सोच नै चीनको खुलापनको प्रतीक रहेको उनीहरू बताउँछन् ।

विशाल उपभोक्ता भएको मुलुक चीनमा विभिन्न देशहरूले आफ्ना उत्पादन सांघाईमा पुर्‍याएका बेला नेपालजस्ता साना मुलुकहरू भने उपस्थितिमै सीमित भएको देखिन्छ । गतवर्षजस्तै यसपालि पनि नेपालले कुनै विशेष उत्पादन देखाउन सकेको छैन ।

प्रकाशित : कार्तिक २०, २०७६ ०८:५४
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT