क्यान्सरको औषधि अभाव नहुने

कान्तिपुर संवाददाता

काठमाडौँ — औषधि व्यवस्था विभागले क्यान्सर रोगमा चलाइने अत्यावश्यक औषधि अभाव हुन नदिने निर्णय गरेको छ । विभागमा शुक्रबार पदाधिकारी र औषधि आयातकर्ताबीच बसेको बैठकले निर्णय गरेको हो । 

क्यान्सरमा प्रयोग हुने औषधि घाटा खाएर पनि उपलब्ध गराउनुपर्ने विभागले औषधि आयातकर्तालाई निर्देशन दिएको छ । निर्णयमा भनिएको छ, ‘क्यान्सर रोगमा प्रयोग हुने औषधि अभावबारे चिकित्सकले गुनासो गरिरहेका छन् र मिडियामा पनि आइरहेको छन् । असोज २७ सम्म आयातकर्ताले विभागमा क्यान्सरको औषधि उपलब्ध गराउने छन् र औषधि अभाव हुने छैन ।’

विभागका निमित्त महानिर्देशक पानबहादुर क्षेत्रीले भने, ‘अबदेखि औषधि आयात र आपूर्ति चेनमा कुनै समस्या नगर्ने र समस्या आएमा विभागलाई जानकारी गराउनुपर्ने निर्देशन दिएका छौं । औषधि आयातमा कुनै समस्या भए उहाँहरूलाई हामी सघाउन तयार छौं ।’ केही महिनायता क्यान्सरका ‘फाइबएफयू’ ‘इटोपोसाइड’ ‘भिन्क्रिटिइन’ जस्ता अत्यावश्यक औषधि बिरामीले किन्न पाइरहेका थिएनन् । वीर अस्पतालमा स्टक राखिएको औषधिसमेत सकिएपछि बिरामीका आफन्त सीमावर्ती भारतीय बजारसम्म पुगेर किन्न बाध्य थिए । औषधिको मूल्य बढेको, भारतीय बजारमै औषधि नपाइएको बाहनामा क्यान्सर, मुटुरोग, मृगौलाजस्ता कडा रोगका औषधि अभाव भइरहन्छ ।

औषधि नपाइएको अवस्थामा नेपाल औषधि व्यवसायी संघ काठमाडौं जिल्ला शाखाले ९८४१२६४१७१ मा फोन गर्ने आग्रहसमेत गरेको छ । शाखाले बडादसैंका अवसरमा बिरामीलाई हुन सक्ने आकस्मिक औषधिको अभाव पूर्तिका लागि २४ सै घण्टा हटलाइन सेवा उपलब्ध गराएको हो । संघका अध्यक्ष बद्रीप्रसाद श्रेष्ठले भने, ‘बिरामीले औषधि नपाए उनीहरूकै स्थानको मेडिकल या स्वास्थ्य संस्थामा औषधि पुर्‍याउने प्रयास गर्छौं ।’

प्रकाशित : आश्विन १८, २०७६ ०८:२१
प्रतिक्रिया
पठाउनुहोस्

गोप्य मन्दिर निर्माणको जिम्मा उपभोक्तालाई

कान्तिपुर संवाददाता

काठमाडौँ — वसन्तपुर दरबार क्षेत्रको गोप्य आगंछे मन्दिर उपभोक्ता समितिले निर्माण गर्ने भएको छ । राष्ट्रिय पुनर्निर्माण प्राधिकरणको कार्यकारी समितिको बैठकले आगंछे र ललितपुरको देगु तलेजु मन्दिरको पुनर्निर्माण उपभोक्ता समितिमार्फत् गर्ने निर्णय गरेको हो ।

आगंछे उपभोक्ता समिति कि टेन्डर गरेर ठेकेदारमार्फत् बनाउने भन्ने विवादले पुनर्निर्माण रोकिएको थियो ।

‘सुरक्षित तरिकाले मन्दिरको पुनर्निर्माण गर्नुपर्ने भएकाले उपभोक्ता समितिमार्फत् निर्माण गर्ने निर्णय गर्‍यौं,’ प्राधिकरणका कार्यकारी अधिकृत सुशील ज्ञवालीले भने । हनुमानढोका दरबार हेरचाह अड्डाका अनुसार आगंछे, जगन्नाथ र शिव मन्दिर गोप्य मन्दिर हुन् । मन्दिरमा तान्त्रिक विधिबाट पूजा गरिन्छ ।

जापान सरकारको अनुदानमा मन्दिर जीर्णोद्धार गर्न लागिएको पुरातत्त्व विभागले जनाएको छ । जापान सरकारले आगंछे निर्माण गर्न १३ करोड रुपैयाँ र ललितपुर पाटनको देगु तलेजु पुननिर्माण गर्न २० करोड रुपैयाँ उपलब्ध गराइसकेको विभागले जनाएको छ । विभागका अनुसार भूकम्पको धक्काले आगंछे पछाडि ढल्केको छ ।

हनुमानढोका दरबारको पछाडिको लामो बार्दली भएको घरको माथिल्लो तल्ला नै मल्लकालीन आगंछे हो । मोहनकाली चोकका सम्पदाहरूमा तीन भिन्नभिन्न आकारका तीन बुर्जा छन् । तीमध्ये एउटा बुर्जा हो आगंछे मन्दिर । आगंछे भनेको कुलदेवता राख्ने घर हो । यस्तो घर कतै कोठामा बनाइएको हुन्छ । कतैचाहिं मन्दिरै बनाइएको हुन्छ । नेवार जातिमा प्रत्येक वंशको आआफ्नै आगम घर हुन्छन् । यो आगम घरचाहिं मल्ल राजाको हो ।

शाहवंशभरी यो मन्दिर बन्द थियो । शाहकालमा भित्र नछिरे पनि बाहिर भागमा भने मर्मतको सामान्य काम भएको पाइन्छ ।इतिहासकार गौतमवज्र वज्राचार्यका अनुसार यस मन्दिरभित्र मल्ल राजाहरूले गुप्त तरिकाले पूजा गरिने आगम देवता स्थापना गरेका थिए । आगंछेमा आफ्ना वंशबाहेक अरु छिर्न नमिल्ने कडा नियम बनाइएको हुन्छ ।

प्रकाशित : आश्विन १८, २०७६ ०८:२०
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT