बिरामीको मृत्युपछि नागरिक अस्पतालमा तनाव

कान्तिपुर संवाददाता

(भक्तपुर) — बिरामीको मृत्यु भएपछि मध्यपुरथिमि–३, गठ्ठाघरस्थित नागरिक कम्युनिटी अस्पताल तनावग्रस्त छ । बिहीबार भर्ना भएर शुक्रबार मृर्गौलाको पत्थरी शल्यक्रिया गरेका सिन्धुपाल्चोक ईन्द्रावती गाउँपालिका–६ का ५२ वर्षीय रामचन्द्र कोइरालाको मृत्युपछि अस्पताल तनावग्रस्त भएको हो । मृर्गौला पत्थरीको शल्यक्रिया गरेको बिरामीलाई नर्सहरुले लापरबाहीले मृत्यु भएको भन्दै परिवार र आफन्तले अस्पताल घेराउ गरेका छन् ।

नाराबाजी, घेराऊ गर्ने क्रममा पीडित पक्षले अस्पताल तोडफोड गर्न खोजेपछि शनिबार बेलुका ७ बजे पीडितपक्ष र प्रहरी झडप भएको थियो । अस्पतालभित्रै पीडित पक्षले नाराबाजी गरेर तोडफोड गर्न खोजेपछि सामान्य बल प्रयोग गर्नु परेको प्रहरीको भनाइ छ ।

शुक्रबार सफल शल्यक्रिया भएर स्वास्थ्य अवस्था सुधार भइसकेकोमा नर्सहरुको लापरबाहीले बाबुको ज्यान गएको मृतकका छोरा सागर कोइरालाको आरोप छ । नर्समाथि छानबिन गरी कारबाही गर्नुपर्ने र मृतक परिवारलाई उचित क्षतिपूर्ति दिनुपर्ने माग उनीहरुको छ । माग पूरा नभएसम्म बाबुको शव नउठाउने कोइरालाले बताए ।
मृतककी बुहारी सावित्री कोइरालाले दुईवटा छोरा, बुहारी आईसीयू कक्ष बाहिर कुरेर बसे पनि नर्सले अप्ठ्यारो पर्दा खबर नगरी एक्कासी लडेर घाइते भएको खबर गर्न आएको बताए । मृर्गौला पत्थरीको शल्यक्रिया गरेका कोइराला शनिबार बिहान शौचालय जाने क्रममा एक्कासी ढलेर बेहोस भएको र उपचारको क्रममा मृत्यु भएको अस्पतालले जनाएको छ ।

अस्पतालका मेडिकल डाइरेक्टर डा.राकेश बर्माले अस्पताल र नर्सको कुनै कमजोरी नभएको दाबी गर्दै शौचालय गएका बिरामीलाई एक्कासी हृदयघात भएकाले ज्यान गएको बताए ।

अस्पताल र मृतक पक्षबीच शनिबार साँझ बसेको वार्ता असफल भएको र पुनः वार्ताको प्रयास भइरहेको महानगरीय प्रहरी वृत्त थिमि प्रमुख डीएसपी शान्तिराज कोइरालाले बताए ।

प्रकाशित : भाद्र २१, २०७६ २२:०७
प्रतिक्रिया
पठाउनुहोस्

काठमाडौंमा ‘उर्लंदो सय करोड अभियान’ मनाइयो

कान्तिपुर संवाददाता

काठमाडौँ — ‘नो मोर भ्वाइलेन्स, नो मोर साइलन्स, नीड वी आर फ्रि...’ अर्थात् ‘हिंसा होइन, मौनता होइन, हामी स्वतन्त्रता चाहन्छौं...’ शनिबार धोबीघाटस्थित डिएभी स्कुलको हल गुन्जयमान बन्यो । दक्षिण एसियाका महिलावादीहरुले यो गीत गाउँदै उर्लंदो सय करोड अभियान २०२० को सुरुआत गरे ।

नेपालसहित भारत, पाकिस्तान, बंगलादेश, श्रीलंका, भुटान लगायत ८ देशका प्रतिनिधि महिलावादीहरुको उपस्थितिले न्याय, समानता र शान्तिका लागि महिलावादी ऐक्यबद्धताको उत्सव मनाए ।

नेपालमा उर्लंदो सय करोड अभियान २०२० को आरम्भ गर्दै दक्षिण एसिया संयोजक कमला भसिनले भनिन्, ‘यो अभियान महिला एकताको मिसाइल हो, हामी सफल हुन चाहन्छौ, पराजित हुन चाहन्नौं ।’ समाजमा पितृसत्तामात्रै हाबी छैन, यदाकदा मातृसत्ता पनि छ, यसकारण हिंसापिडित सबैका लागि साझा आवाज उठाउने भनाइ पनि व्यक्त गरिन् ।

२०२० मा महिला हिंसाविरुद्ध सय करोड महिलावादीहरुलाई एकसाथ उतार्ने अभियान छ । सोहीअनुसार नेपालमा सुरु भएको भसीनले बताइन् ।

उर्लंदो सय करोड बालिका तथा महिलाविरुद्ध हुने हिंसा अन्त्य गर्न सुरु भएको दक्षिण एसिया महिलावादी अभियानकर्मीहरुको सञ्जाल हो । विश्वस्वास्थ्य संगठनले सन् २०१२ मा गरेको सर्भेक्षणअनुसार विश्वमा प्रत्येक ३ मध्ये एक महिला अर्थात लगभग सय करोड बालिकाका तथा महिलाहरु हिंसाको सिकार हुन्छन् । यही तथ्याङ्कलाई मध्यनजर गरेर विश्वभर अभियान सुरु भएको हो भने विश्व स्वास्थ्य संगठनकै सर्भेक्षणअनुसार नेपालमा प्रत्येक ४ मध्ये एक महिला जीवनकालमा शारीरिक यौन दुर्व्यबहार भोग्नुपरेको हुन्छ । यही सर्भेक्षणका आधारमा महिलाको हिंसाविरुद्ध उर्लंदो सय करोड अभियान नेपालमा सुरु भएको हो ।

विश्व स्वास्थ्य संगठनको तथ्याङ्गअनुसार हरेक दिन संसारभरीका १३७ महिला आफ्नै परिवार, आफन्तद्धारा हत्याको सिकार हुन्छन् । प्रत्येक १० जना मानव बेचविखनको सिकार भएकामध्ये ७ जना बालिका/महिला हुन्छन् । ६५ करोड बालिका र महिलाहरुको १८ बर्ष नपुर्ग्दै विवाह हुन्छ ।

अवार्ड वितरण
संङ्गती ग्रान्ट अवार्ड-२०१९ बाट व्यक्तिगत तर्फबाट चित्रकार सुनैना ठाकुर सम्मानित भइन् । सुगभवानीपट्टी महोत्तरीकी सुनैना मिथिला चित्रकलाको माध्यमबाट लैगिंक समानता, सामाजिक परिवेशीकरण तथा महिलामाथि हुने हिंसाहरु विश्वमाझ प्रस्तुत गर्ने चित्रकार उद्यमी हुन् । उनी १५ वर्षकै उमेरमा विवाहित भइन् । बुहारीलाई चुलाचौकामा सीमित राख्नुपर्छ भन्ने कुसंस्कार बोकेको समाजमा चित्रकलाको माध्यमबाट महिला शसक्तिकरणको आवाज उठाउँदै आएकी छन् । ‘अवार्डले मलाई हौसला मिलेको छ, उर्लंदो सय करोडको अभियानलाई सफल पार्न मेरो तर्फबाट सक्दो सहयोग गर्नेछु,’उनले भनिन् ।

यसैगरी काठमाडौंको सृजनशील महिला समाज संस्थागत विधाअन्तर्गतको अवार्डबाट सम्मानित भयो ।

प्रकाशित : भाद्र २१, २०७६ २१:५२
पूरा पढ्नुहोस्
प्रतिक्रिया
पठाउनुहोस्