ल्होज्याङको अध्यक्षमा पुन: योगन्द्र

कान्तिपुर संवाददाता

काठमाडौँ — तामाङ सहायता समाज (ल्होज्याङ) को अध्यक्षमा पुन: योगेन्द्रजंग रुम्बा तामाङ निर्वाचित भएका छन् । उनी यसअघि पनि अध्यक्ष थिए । 

शनिबार काठमाडौंमा भएको १६ औं साधारणसभाबाट रुम्बाको अध्यक्षतामा ११ सदस्यीय नयाँ कार्यसमिति चयन भएको हो । उपाध्यक्षमा शेरबहादुर तामाङ रुम्बा, महासचिवमा राजेन्द्रकुमार रुम्बा, सचिवमा सानुमाया लामा र कोषाध्यक्ष रामगोपाल तामाङ सर्वसम्मत छनोट भएको ल्होज्याङले जनाएको छ ।

यसैगरी सदस्यहरुमा रविन्द्र मोक्तान, अम्बिर तामाङ, वीरबहादुर तामाङ, गीता लामा, राम लामा ग्लान र जीतबहादुर तामाङ चयन भए ।

कार्यक्रममा प्रतिनिधिसभा सांसद तथा पूर्व युवा तथा खेलकुद मन्त्री हितबहादुर तामाङले नवनिर्वाचित कार्यसमितिलाई कार्यकाल सफलताको शुभकामना दिएका थिए । साथै ल्होज्याङ प्रमुख सल्लाहकार तथा समाजका पूर्वअध्यक्ष नरेन्द्रबहादुर तामाङलाई र संस्थाका सदस्यहरुका यस वर्ष एसईईमा सफल विद्यार्थीलाई सम्मान गरिएको थियो ।



प्रकाशित : भाद्र २१, २०७६ २१:४२
प्रतिक्रिया
पठाउनुहोस्

मर्स्याङ्दी नदीमा जिप खस्यो, चालकसहित ५ यात्रु हामफाली बाँच्न सफल

कान्तिपुर संवाददाता

लमजुङ — निर्माण सामग्री बोकेर ताल मनाङबाट खाङसार मनाङका लागि छुटेको जिप शनिबार दिउँसो मर्स्याङ्दी नदीमा खसेको छ । जिप चालकसहित ५ जना हामफाली बाँच्न सफल भएको जिल्ला प्रहरी कार्यालय मनाङले जनाएको छ ।

प्रहरीका अनुसार ङिस्याङ गाउँपालिका १ भ्राताङमा पर्ने चामे-हुम्दे कच्ची सडक खण्ड हुँदै १४ बोरा सिमेन्ट र फलामे पाइप ६० पिस बोकेको ग १ ज ७२४५ नम्बरको जिप खाङसार जाँदै गर्दा दुर्घटनामा परेको हो ।

जिप चालक लमजुङ दोर्दी गाउँपालिका ८ बस्ने २३ वर्षीय आनन्द गुरुङलाई नियन्त्रणमा लिई अनुसन्धान गरिरहेको डीएसपी टीकाबहादुर कार्कीले जनाए ।‘सडकबाट जिप खसे पनि यात्रु बाँचे । जिपसँगै खसेको भए कोही बाँच्दैनथे । कसो उनीहरु जिप खस्न लागेपछि हामफालेर जोगिएछन्’ उनले भने, ‘तैपनि हामी अनुसन्धानमा छौं, अनुसन्धानपछि मात्रै घटनाबारे एकीन हुन्छ ।’

जिप पानीको बहावमा रहेको र तत्काल झिक्न नसकिएको उनले बताए ।
साँघुरो र अप्ठ्यारो सडक केही उकालोमा व्याक गर्ने क्रममा सवारी दुर्घटना भएको खुलेको डीएसपी कार्कीले बताए ।

घटनास्थले चामेबाट करिब ७ किलोमिटर पश्चिममा पर्छ ।


प्रकाशित : भाद्र २१, २०७६ २१:२९
पूरा पढ्नुहोस्
प्रतिक्रिया
पठाउनुहोस्