वाग्मतीमा जलयात्रा

सीमा तामाङ

(ललितपुर) — कुपन्डोलस्थित वाग्मती पुलमुनिबाट कीर्तिपुरको सुन्दरीघाटसम्म शनिबार जलयात्रा गरिएको छ । वाग्मतीमा पनि जलयात्रा गर्न सकिन्छ भनेर देखाउनका लागि जलयात्रा आयोजना गरिएको हो । वाग्मती सभ्यता महोत्सवको रूपमा आयोजना भएको यो जलयात्रा ११ औँ पटक हो । 

वाग्मती नदीमा शनिबार जलयात्राका सहभागी । ललितपुरको कुपन्डोलबाट शनिबार बिहान साढे ७ बजे सुरु जलयात्रा १० बजे कीर्तिपुरको चोभार पुगेर सम्पन्न भएको थियो । तस्बिर : केशव थापा /कान्तिपुर 

ललितपुर महानगरपालिकाका प्रमुख चिरिबाबु महर्जनले जलयात्राको सुरुआत गरेका हुन् । उनले अन्य खोलामा जलयात्रा गरे पनि वाग्मतीमा पहिलो पटक भएको बताए । ‘वाग्मतीलाई सफा बनाएर र्‍याफ्टिङ व्यवस्था गर्न सके आन्तरिक र बाह्य पर्यटक भित्र्याउन सकिन्छ,’ उनले भने, ‘तत्काल यो सम्भव छैन, तर गुरुयोजना बनाएर काम गर्न सकिन्छ ।’ जलयात्रा अर्थात् डुंगाबाट ओर्लेपछि मेयर महर्जन थकित देखिए । ‘वाग्मतीमा पनि डुंगा चढियो, रमाइलो भयो’ उनले भने, ‘अलिअलि थकाइ पनि लाग्यो ।’

वाग्मती सफाइ अभियानमा सहभागी मेयर महर्जनले वाग्मती सफा बनाउन महानगरले सहयोग गर्ने प्रतिबद्धता जनाए । ‘वाग्मती संरक्षणसँग मान्छेको जीवन जोडिएको छ,’ उनले भने, ‘वाग्मती प्राचीन सभ्यता भएकाले यसको संरक्षणमा जोड दिनुपर्छ ।’ जलयात्रामा सहभागी हुँदा उनलाई बाल्यकालमा देखेको वाग्मतीको सम्झना आइरह्यो । उनी भन्छन्, ‘अव्यवस्थित सहरीकरणले वाग्मती दुर्गन्धित भएको हो ।

वाग्मतीलाई राम्रो र सफा बनाउन संकल्पसहित सहकार्य गरे अघि बढ्नुपर्छ ।’ वाग्मती सफाइ अभियानका अभियन्ता किशोरसिंह शाहीले जलयात्रा सञ्चालन गर्न वाग्मतीलाई सफा बनाउनैपर्ने बताए । त्यस्तै ६ वर्षदेखि वाग्मती सरसफाइ अभियानमा सक्रिय प्रिया लामिछाने भनिन्, ‘सधैं वर्षको एकचोटि जलयात्रा हुन्छ । उपत्यकावासी जलयात्रा अर्थात् र्‍याफ्टिङका लागि गर्न अन्यत्र ठाउँमा जानु पर्दैन ।’ वरपर रहेको नदीनाला संरक्षण गरेर भविष्यमा र्‍याफ्टिङ गर्न मिल्ने उनी बताउँछिन् । सरकारले खोला किनारमा बस्ने सुकुम्बासी तथा कमैयालाई व्यवस्थापन गरे नदीको क्षेत्रफल बढाउन सक्ने उनको भनाइ छ । नदी सरसफाइ तथा संरक्षणका लागि सफाइ अभियन्ताहरूले अहम् भूमिका खेलिरहेको उनको दाबी छ । डुंगामा नगरप्रमुखलगायत स्थानीयवासी तथा अभियन्ताहरू चढेका थिए ।

प्रकाशित : भाद्र १५, २०७६ ०९:१३
प्रतिक्रिया
पठाउनुहोस्

विदेशबाट फर्केर गोलभेंडा खेती

कान्तिपुर संवाददाता

हेटौंडा — गोलभेंडा उत्पादनबाट प्रदीप थापा हौसिएका छन् । अर्को वर्ष अझ गोलभेंडा खेतीलाई विस्तार गर्ने उनको सोच छ ।

हेटौंडा उपमहानगरपालिका—१७ चुच्चेखोलाका ३२ वर्षीय थापाले २ वर्षयता गोलभेंडा खेती गर्दै आएका छन् । गत वर्ष एउटा मात्र टनेलमा गोलभेंडा खेती गरेका थिए । त्यसबाट राम्रै आम्दानी भएपछि यो वर्ष तीनवटा टनेलमा
गोलभेंडा खेती विस्तार गरे । उनको २ वटा टनेल बाँसका छन् भने एउटा टनेलका खम्बा सबै फलामका छन् । उनलाई गोलभेंडा खेती गर्न हेटौंडा उपमहानगरपालिकाको कृषि शाखाले पनि सघाएको छ । तीनवटा टनेलमा गोलभेंडा खेती गर्न उपमहानगरपालिकाको कृषि शाखाले एक लाख रुपैयाँ अनुदान दिएको छ । सँगै रहेका तीनवटा टनेलमा गोलभेंडा लटरम्म फलेका छन् । कृषक थापाले दैनिक ३ देखि ५ क्रेटसम्म गोलभेंडा टिपेर बिक्री गर्ने गरेका छन् । सुरुसुरुमा उनले प्रतिकेजी एक सय २० रुपैयाँसम्ममा गोलभेंडा बिक्री गरेका थिए । अहिले प्रतिकिलो ९० रुपैयाँमा बिक्री गर्ने गरेको बताए ।

साउन १५ देखि उनले गोलभेंडा बिक्री गर्न थालेका हुन् । शनिबारसम्म उनले करिब २ लाख रुपैयाँको गोलभेंडा बिक्री गरिसकेको बताए । ३ वटा टनेलबाट यो वर्ष करिब ५ लाख मूल्यबराबरको गोलभेंडा बिक्री गर्ने अनुमान उनले गरेका छन् । कविता जातको गोलभेंडा उनले जेठ २२ गते लगाएका थिए । ‘साउनको दोस्रो सातादेखि उत्पादन दिन सुरु गरिगो’ कृषक थापाले भने, ‘राम्रोसँग गोलभेंडा फलेको छ ।’ टनेलमा उनको १ हजार २ सय ५० वटा गोलभेंडाका बोट छन् । सबैमा राम्रोसँग गोलभेंडा फलेको छ । सरदर एउटा बोटमा ५ किलोसम्म गोलभेंडा उत्पादन हुने उनको अनुमान छ । थोपा सिँचाइको व्यवस्थासहित मल्चिङसिस्टमबाट टनेलमा उनले गोलभेंडा खेती गरेका छन् ।

प्रकाशित : भाद्र १५, २०७६ ०९:११
पूरा पढ्नुहोस्
प्रतिक्रिया
पठाउनुहोस्