घरपालुवा कुकुरलाई जथाभावी शौच गराए महानगरले कारबाही गर्ने

रासस

काठमाडौँ — काठमाडौँ महानगरपालिकाले घरपालुवा कुकुरलाई सार्वजनिकस्थलमा शौच गराइएको पाइए सम्बन्धित कुकुर धनीविरुद्ध कारवाही गर्ने गरी तयारी गरेको छ । मानव जीवनमा अत्यन्त हानिकारक मानिएको कुकुरको दिसापिसाब जताततै भेटिन थालेपछि महानगरले सार्वजनिकस्थलमा शौच गराइएको भेटिए कारवाही तयारी थालेको हो ।

महानगरको वातावरण व्यवस्थापन विभागले कुकुरलाई सार्वजनिकस्थलमा नभई घरैमा सुरक्षित ढङ्गबाट शौच गराउन पनि आग्रह गरेको छ ।

कुकुरको दिसापिसावबाट मानव जीवनमा गम्भीर प्रकारको रोग निम्त्याउने भएकाले घर पालुवा कुकुरलाई घरमै शौच गराउन आग्रह गरिएको कामपाका वातावरण व्यवस्थापन विभाग प्रमुख हरिकुमार श्रेष्ठ जानकारी दिए । एक अध्ययनअनुसार एउटा कुकुरले वर्षको औशत २७४ पाउन्ड (१ लाख २४ हजार २८४ ग्राम) दिसा गर्छ । कुकुरको एक ग्राम दिसामा २ लाख ३० हजार फिकल कोलिफर्म ब्याक्टेरिया हुन्छन् ।

एउटै कुकुरको दिसा जथाभावी फालियो भने एक वर्षमा २८ अर्ब ५८ करोड ५३ लाख २० हजार त्यस्ता हानिकारक ब्याक्टेरिया फैलिने जानकारको भनाइ छ । कुकुरको दिसाबाट ह्वीपवर्म, हुकवर्म, राउन्डवर्म, टेपवर्मजस्ता जुकाका अण्डा मानिसको शरीरमा प्रवेश गर्ने बताइन्छ ।

कुकुरको शौचबाट आउने ब्याक्टेरियाले मानिसलाई गम्भीर प्रकारको रोग लाग्ने चिकित्सक बताउँछन् । हाल काठमाडौँ महानगरपालिकामा करिब ८० हजार घरपालुवा र २२ हजार सामुदायिक कुकुर रहेको अनुमान छ ।

प्रकाशित : भाद्र ७, २०७६ २०:०५
प्रतिक्रिया
पठाउनुहोस्

शिक्षा सम्मेलन सुरु

कान्तिपुर संवाददाता

काठमाडौँ — सार्वजनिक शिक्षाको गुणस्तर सुधारका लागि शनिबारबाट ललितपुरमा विज्ञ र मुलुकभरका शिक्षकको अन्तर्राष्ट्रिय सम्मेलन सुरु भएको छ । शिक्षा, विज्ञान तथा प्रविधि मन्त्रालयले रातो बंगला फाउन्डेसनको सहकार्यमा ३ दिने सम्मेलन आयोजना गरेको हो ।

शिक्षामन्त्री गिरिराजमणि पोखरेलले उद्घाटन गरेको सम्मेलनमा नेपालसहित भारत, चीन, सिंगापुर, अमेरिका र बंगलादेशका शिक्षाविदको सहभागिता छ । ५० भन्दा बढी जिल्लाका प्रधानाध्यापक र शिक्षकले सार्वजनिक शिक्षा सुधारका लागि विज्ञसँग अनुभव आदानप्रदानसहित छलफल गर्नेछन् ।

सरकारले ०७८ सम्मलाई सार्वजनिक शिक्षा सबलीकरणको दशक घोषणा गरेको छ । त्यसैअनुरूप सम्मेलन आयोजना गरिएको शिक्षा तथा मानवस्रोत विकास केन्द्रका महानिर्देशक बाबुराम पौडेलले जनाए ।

सार्वजनिक विद्यालय सुधारका लागि विज्ञहरूको ६० वटा कार्यपत्रमा छलफल गर्ने कार्यक्रम छ । मन्त्रालय र फाउन्डेसनबीच सार्वजनिक शिक्षाको सबलीकरणका लागि सहकार्य गर्दै जाने सम्झौता भएको थियो । यसअघि पनि ०६९ मा यस्तै सम्मेलन आयोजना गरिएको थियो ।

प्रकाशित : भाद्र ७, २०७६ १९:५५
पूरा पढ्नुहोस्
प्रतिक्रिया
पठाउनुहोस्