मापदण्डविपरीत कलेज

उच्च अदालतले दिएको आदेशसमेत लत्याउँदै विद्यार्थी भर्ना
कान्तिपुर संवाददाता

भक्तपुर — प्राविधिक शिक्षा तथा व्यावसायिक तालिम परिषद् (सीटीईभीटी) ले चक्रवर्ती हबी एजुकेसन एकेडेमी कलेज अफ नर्सिङ साइन्स मध्यपुर थिमिको सम्बन्धन खारेज गरेको करिब दुई वर्ष भयो ।

सीटीईभीटीबाट सम्बन्धन/स्वीकृति लिई प्रमाणपत्र तह नर्सिङ कार्यक्रम सञ्चालन गरिरहेको चक्रवर्ती कलेजले पटकपटक सीटीईभीटीको नीति निर्देशनविपरीतका गतिविधि एवं विद्यार्थी भर्ना गरेकाले तत्कालीन शिक्षा मन्त्री गोपालमान श्रेष्ठको अध्यक्षतामा २०७४ असोज २२ मा बसेको बैठकले सम्बन्धन खारेजीको निर्णय गरेको थियो । सीटीईभीटीले खारेज गरे पनि अदालतको आडमा चक्रवर्ती कलेजले विद्यार्थीको भर्ना गरिरहृयो ।

हाल आएर चक्रवर्ती कलेजमा अध्ययनरत कलेजका विद्यार्थीको भविष्य अन्योलमा परेको छ । चक्रवर्ती कलेजले सीटीईभीटीबाट शैक्षिक सत्र २०६१/०६२ देखि ३ वर्षे पीसीएल (नर्सिङ (प्रमाणपत्र तह) को सम्बन्धन/स्वीकृति लिई कार्यक्रम सञ्चालन गरिरहेको थियो ।

कलेजले शैक्षिक सत्र ०७४/०७५ का लागि प्रमाणपत्र तह नर्सिङ कार्यक्रम सञ्चालनका लागि सीटीईभीटीसँग सम्बन्धन स्वीकृति नवीकरण नगरी विद्यार्थी भर्ना गरी ठगी गरेको र अवैधानिक रूपमा एकै दिनमा ३७ विद्यार्थी भर्ना गरेको भन्दै सीटीईभीटीले सम्बन्धन खारेज गरिसकेको छ । आफ्नो अस्पताल नभएको र सरकारी अस्पतालसँग सम्झौता गरेको नक्कली कागज देखाएर विद्यार्थी भर्ना गरेको सीटीईभीटीका सदस्यसचिव पुष्परमण वाग्लेले बताए ।

सीटीईभीटीसँग कुनै पनि सम्बन्धन तथा स्वीकृत नवीकरण नै नगरी कलेजले २०७४ भदौ २५ गते पत्रिकामा सूचना प्रकाशित गरी एक दिनका लागि तीनवर्षे प्रमाणपत्र तह नर्सिङमा भर्ना खोली एकै दिनमा ३७ विद्यार्थी भर्ना गरी एक सय विद्यार्थीको नाम वैकल्पिक सूचीमा निकालेको थियो ।

सीटीईभीटीले चक्रवर्ती कलेजलाई नवीकरण नगरीकन किन विद्यार्थी भर्ना गर्‍यो, विद्यार्थीको प्रयोगात्मक अभ्यासका लागि अस्पताल कहाँ छ भन्ने प्रश्नको स्पष्टीकरणको जवाफ झूटो पेस गरेकाले सम्बन्धन खारेज गर्न बाध्य भएको र चक्रवर्ती कलेजसँग सीटीईभीटीको कुनै सम्बन्ध नरहेको समेत सदस्यसचिव वाग्लेले बताए ।

कलेजले अघिल्ला वर्षहरूमा पनि अदालतको आडमा सीटीईभीटीसँग सम्बन्धन/स्वीकृति नवीकरण नै नगरी नर्सिङ कार्यक्रम सञ्चालन गरेको थियो । विद्यार्थीको भविष्यलाई ध्यानमा राखेर विगतमा अदालतको अन्तरिम आदेशलाई मानेर सीटीईभीटीले रजिस्ट्रेसन गरिएको र सम्बन्धन खारेजपछि कुनैसम्बन्ध नभएको जनाएको छ । यता कलेजले भने सीटीईभीटीले उच्च अदालतको फैसला नमान्दा विद्यार्थी समस्यामा परेको भन्दै पत्रकार सम्मेलन गरेको छ ।

एक वर्षदेखि अध्ययनरत विद्यार्थीको रजिस्टेसन पनि नगरी परीक्षामा समेत सामेल गराउन नसकिएको कलेजले गुनासो गरेको छ । निरन्तर उच्च अदालतले दिएको आदेशलाई समेत लत्याउँदै सीटीईभीटीले ३० जना विद्यार्थीको भविष्य अन्योलमा पारेको कलेजले जनाएको छ । विद्यार्थी भर्नाको सिलसिलामा २०७५ सालको विद्यार्थी भर्नाका लागि कलेजले सीटीईभीटीईमा निरन्तर सम्पर्क गरेको तर त्यस बेलादेखि नै बेवास्ता गर्दै आएको कलेजका कार्यकारी अध्यक्ष नीलकृष्ण ताम्राकार पत्रकार सम्मेलनमा जानकारी दिए ।

कलेजले २०७५ सालमा विद्यार्थी भर्ना गर्न सीटीईभीटीईसँग अनुमति माग्दा सय बेडको अस्पतालको व्यवस्था गरेर मात्र विद्यार्थी भर्नाको अनुमति दिन सकिने जानकारी दिइएको अध्यक्ष ताम्राकारले जानकारी दिए । त्यसपछि कलेजले सय बेड भएको गणेशमान अस्पताल एन्ड रिसर्च सेन्टरसाग सम्झौता गरेर सीटीईभीटीमा पेस गरेको अध्यक्ष ताम्राकारले बताए ।

कलेजले सीटीईभीटीविरुद्ध उच्च अदालतमा मुद्दा दायर भएको र अदाललते परिषद्को सम्बन्धन रद्द गर्ने निर्णय बदर गरी कलेजलाई निरन्तर सञ्चालन हुन दिन भनी फैसला गरेको उनले जानकारी दिए ।

प्रकाशित : श्रावण ३०, २०७६ ०९:०४
प्रतिक्रिया
पठाउनुहोस्

पालो पाउन ८ बजे नै मालपोत

कान्तिपुर संवाददाता

भक्तपुर — दोलखा भीमेश्वर नगरपालिका–४ चरिकोटकी जुना बस्नेतले जग्गा रोक्का राख्न च्याम्हासिंहस्थित भूमि सुधार तथा मालपोत कार्यालय धाएको तीन दिन भयो । तेस्रो दिन (बुधबार) दिनभर बस्दासमेत उनको काम भएन ।

‘सोमबार पालो आउँला भन्दाभन्दै दिन गयो, मंगलबार ४ बजेसम्म बस्यो सर्भर बिग्रियो, नेट चलेन भन्दै काम भएन,’ उनले भनिन्, ‘कम्प्युटर चलेको छैन भन्छन्, कार्यालयमा खुट्टा टेक्ने ठाउँ छैन ।’

भोजपुरकी कुन्तीकुमारी राई जग्गा रोक्काकै लागि मालपोत कार्यालय धाएको चार दिन भयो । कम्प्युटर/इन्टरनेटमा समस्या भएको बाहनामा कर्मचारीले काम नै नगर्ने उनको गुनासो छ । ‘दिनहुँ मालपोत आयो, पालो कुर्‍यो, काम बन्ने होइन,’ उनले भनिन्, ‘इन्टरनेट र सर्भरको नाममा सेवाग्राहीलाई सास्तीको चाङ ।’

भूमिसुधार तथा मालपोत कार्यालयमा दिनहुँ सेवाग्राहीको भीड लाग्छ । बिहान १० बजे खुल्ने कार्यालयमा पालो कुर्न ८ बजेदेखि नै सेवाग्राही उपस्थित भइसकेका हुन्छन् । इन्टरनेट सेवा सुचारु गरे पनि सेवा प्रवाहमा भने झनै ढिलासुस्ती भइदिँदा सेवाग्राही मर्कामा परेका छन् ।

जग्गा नामसारी गर्ने काममा आएका सूर्यविनायक नगरपालिका ६ नयाँबस्तीका राज श्रेष्ठले भने, ‘लेखापढी नभई सेवाग्राहीले मालपोतको काम गर्नै सकिन्न, इन्टरनेटको समस्या देखाउँदै कर्मचारीले कामै गर्न छोडेकोछ ।’ चार दिनदेखि मालपोत धाउँदासमेत काम पूरा नभएको उनको गुनासो छ ।

समयमा काम नहुँदा दिनहुँ कार्यालय धाउने सेवाग्राही झनै मर्कामा परेका छन् । सेवाग्राहीहरू लामो समयसम्म पनि काम नभएपछि कार्यालयभित्रै सुस्ताइरहेका हुन्छन् । कम्प्युटर शाखामा सेवाग्राहीको भीड लागेको छ । ‘इन्टरनेटको समस्या भन्दै कोठा/कोठा चहार्नुपरेको देख्दा, पहिले हातैले लेख्ने काम सजिलो भएजस्तो छ,’ उनले भने ।

इन्टरनेट सेवाअन्तर्गत व्यक्तिगत विवरण इन्ट्री गर्ने, रजिस्टेसन गर्ने, जग्गापास, लालपुर्जा बनाउने, मोठ भिडाउने, जग्गा रोक्का राख्ने, नामसारी गर्नेलगायतको काम सबै कम्प्युटरबाटै गर्नुपर्छ । तर, इन्टरनेट कनेक्सन बेला/बेलामा टुटिरहँदा काम प्रभावित हुने गरेको कर्मचारी बताउँछन् ।

मालपोतमा जडान गरेको सुविसुको प्राइमरी लाइनमा समस्या आएपछि सेकेन्डरी लाइन राख्दासमेत प्रभावकारी रूपमा काम नभएको भूमिसुधार तथा मालपोत कार्यालय भक्तपुर प्रमुख दीपक कोइरालाले बताए । नियमित इन्टरनेट सेवामा समस्या नआइदिने हो भने मात्रै पनि काममा निकै छरितोपन आउने उनी बताउँछन् । ‘जुनसुकै काम गर्दा पनि जग्गा रोक्का भए/नभएको, कागजात मिले/नमिलेको काम सबै कम्प्युटरबाटै हेर्नुपर्छ, एकैछिन् मात्रै इन्टरनेट बन्द भइदियो भने पनि काम रोकिहाल्छ,’ उनले भने ।

भूमिसुधार तथा मालपोत कार्यालयले इन्टरनेट प्रणालीबाट काम/कारबाही थालेको करिब २ वर्ष भयो । आइतबारदेखि इन्टरनेटमा समस्या देखिएको र इन्टरनेटको समस्याका कारण सेवाग्राहीको काममा ढिलासुस्ती भएको कार्यालयले स्वीकार गरेको छ । ‘इन्टरनेट नभएपछि केही काम हुँदैन,’ उनले भने, ‘लिखत अनलाइन रजिस्टेसनको सम्पूर्ण काम इन्टरनेट प्रणालीबाट हुने हो ।’

विभागले मूलुकभर अनलाइन सेवा विस्तार गर्दै लगेको र डाढाहरू अपडेट गर्दै जाँदा भक्तपुर मालपोतमा मात्र नभई मुलुकभरको कार्यालयमा जीआईडीसीमा समस्या आएको उनले बताए । मालपोत कार्यालयमा दिनहुँ एक हजारभन्दा बढी सेवाग्राही आउने गर्दछन् ।

सर्भर तथा इन्टरनेट समस्यासँगै जनशक्तिसमेत अपुग रहेको मालपोत भक्तपुरले जनाएको छ । ‘दरबन्दीकै कर्मचारीसमेत अपुग छ,’ प्रमुख मालपोत अधिकृत कोइरालाले भने, ‘४ कम्प्युटर अधिकृतको दरबन्दी छ, जसमध्ये २ समायोजनमा गएको र १ ले राजीनामा गरेकाले १ जना कम्प्युटर अधिकृत मात्र हुनुहुन्छ । कार्यालयले करारमा कर्मचारी राखेर कार्य गराएको छ ।’

६ मालपोत अधिकृतको दरबन्दीमा ४ पूर्ति, १८ सुब्बाको दरबन्दीमध्ये १६ पूर्ति, ८ खरिदारको दरबन्दीमध्ये २ रिक्त, १३ कार्यालय सहयोगीको दरबन्दी मध्ये १ अख्तियारले छानबिनका लागि लगेको र १ राजीनामा गरी २ रिक्त रहेको प्रमुख मालपोत अधिकृत कोइरालाले बताए ।

मालपोत र भूमिसुधार कार्यालय समायोजन भएपछि भक्तपुरमा दुईतिरकार्यालय भएकाले समेत कर्मचारी दुईतिरको काममा व्यस्त हुँदा जिम्मेवारीथपिएको उनले बताए ।

प्रकाशित : श्रावण ३०, २०७६ ०९:०३
पूरा पढ्नुहोस्
प्रतिक्रिया
पठाउनुहोस्