बल्खु बाटोको यो हालत

शिल्पा कर्ण

काठमाडौँ — बल्खुस्थित वाग्मती नदीको दुवै किनारामध्ये ललितपुरतर्फ मात्र बनेको छ करिडोर । काठमाडौंतर्फ भने झन्डै ५ सय मिटर हिलाम्मे बाटो छ । वर्षामा त झन् हिँड्न मुस्किल । बीचमा पानी जमेको छ । साना गाडीले त्यो बाटो प्रयोग गर्नै सक्दैनन् । 

बल्खुस्थित जागरण टोलमा हिलाम्मे सडकमा हिँड्दै सर्वसाधारण । तस्बिर : कान्तिपुर 



‘बीचबाट हिँड्न सकिने ठाउँ नै छैन । अर्कोतिर गोदाम छन्, गाडीहरू निस्किरहेका हुन्छन्,’ विद्यालयबाट छोरी लिएर त्यही बाटो घर फर्किँदै गरेकी एक महिलाले भनिन्, ‘गाडी, मोटरसाइकल जे आए पनि हिलो छ्यापेर हिँड्छन् । यो बाटो हिँड्न पनि डर छ ।’
काठमाडौं महानगरपालिका वडा नं. १४ मा पर्ने जागरण टोल सुधार समितिका उपाध्यक्ष केबी राईले वडासँग पटकपटक बस्दा पनि ठोस निर्णय हुन नसकेको बताए ।

उनले भने, ‘दिनमा ३ सयभन्दा बढी गाडी यो बाटो भएर गुड्छन् । तर सडकको अवस्थाबारे भने सम्बन्धित निकायलाई चासो छैन ।’ शनिबारभन्दा बाहेक दैनिक ठूला मालवाहक ट्रक सामान ओसार्ने र अन्य गाडी पनि आवतजावत गर्ने गरेको उनी सुनाउँछन् । सुकुम्बासी बस्तीमा झन्डै साढे ४ सय घर छन् । खोलासँगै बस्ती र अर्कोतर्फ व्यापार संघ तथा गोदाम छन् । सडक बनाउने बेला ढल मात्र बनाएर छाडेकाले अन्य पानीको उचित निकासनहुने र सडक नै हिलाम्मे बनेको राईले बताए ।

उनले भने, ‘यहाँ १८ देखि २२ चक्के गाडीसम्म हुन्छन् । सामान, खाद्यान्न, फलफूल लिएर आउँछन् । तर कसैले सडकमा ध्यान दिएका छैनन् ।’ उक्त क्षेत्रमा ग्यारेज पनि सञ्चालित छन् । आकाशे पानीको निकास नभएको स्थानीयको भनाइ छ । वडाध्यक्ष शोभा सापकोटाले भने आफूले पटकपटक प्रयास गर्दा पनि त्यो सडक निर्माणमा सफल नभएको बताइन् । ‘वाग्मती सभ्यता आयोजनाले करिडोर बनाउने भनेर पप्पु कन्स्ट्रक्सनलाई ठेक्का दिएर ढल बनायो,’ उनले भनिन्, ‘तर मन्दिर, पेट्रोल पम्प, विद्यालय र बस्ती भएको त्यो ठाउँ अलपत्रै छाडियो । सडक निर्माणको कामै भएको छैन ।’

नजिकैको सामुदायिक विद्यालयमा उक्त क्षेत्रका प्रतिनिधिसभा सांसद, वाग्मती सभ्यता एकीकृत विकास समितिका प्रतिनिधि सबैलाई एक ठाउँ राखेर बैठक बस्दा पनि निष्कर्ष ननिस्केको उनले बताइन् । ‘८ मिटरभन्दा ठूलो बाटो महानगरपालिकाले हेर्ने नै होइन । त्यहाँ भएको सडक पनि भत्काएर ढल बनायो । तर घरको पानीको निकास भएन,’ सापकोटाले भनिन् ।

उनका अनुसार त्यो सडक ढलानमा ५० करोड हाराहारी लाग्छ । यो वडाको बजेटले नभ्याउने साथै वाग्मती आयोजनाको कार्यक्षेत्र पर्ने भएकाले कतैबाट केही गर्न नसकेको उनको गुनासो छ । उनी भन्छिन्, ‘स्कुल पढ्ने बालबच्चा पनि हिँड्न सक्दैनन् । त्यहीँका स्थानीयलाई पैसा हाल्न लाएर सडक बनाउन पनि सकिन्न । आफ्नो तर्फबाट पहल गर्दा पनि आयोजनाले बनाइदिएन गुनासो भने वडामा आइहेको छ ।’

प्रकाशित : जेष्ठ ३१, २०७६ ०७:३५
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

हनुमन्तेमा काम रोकियो

कान्तिपुर संवाददाता

भक्तपुर — हनुमन्ते खोला करिडोर निर्माणको काम स्थानीयबासीले बिहीबारदेखि रोकिदिएका छन् । खोलाको बहाव क्षेत्र र सीमांकन विवाद टुंगो नलगाई करिडोर बनाउन लागिएपछि स्थानीयले काम रोकेका हुन् ।

मध्यपुरथिमि नगरपालिका ३, ४ र सूर्यविनायक नगरपालिका ३ को सीमा सुन्दरबस्ती क्षेत्रमा दुई नगरका बासिन्दाबीच करिब ८ वर्षदेखि हनुमन्तेको बहाबकतापट्टि फर्काउने भन्ने विवाद छ ।

निर्माण कम्पनीले त्यसको टुंगो नलगाई विवादित क्षेत्रमा करिडोर खोल्न बिहीबार डोजर चलाएको थियो । करिडोर बनाउने नाममा नदी क्षेत्रको अध्ययन तथा सीमांकन नगरी प्रशासनको आडमा ठेकेदार कम्पनीले बहाब परिवर्तन गर्न डोजर लगाएको स्थानीय विजयकृष्ण श्रेष्ठले बताए ।

राधेराधेदेखि खोलाको बहाबअनुसार करिडोर निर्माण गर्दै आएको कम्पनीले विवादित क्षेत्रमा बहाब परिवर्तन गर्ने अभिप्रायले डोजर चलाएको उनको आरोप छ । एक पक्षले २०२१ सालको नापीअनुसार खोलाको बहाब परिवर्तन गर्ने तर्क राख्दै आएका छन् भने, अर्का पक्ष साविक बगेको खोलालाई हनुमन्ते खोलाको सार्वजनिक जग्गा मान्दै आएका छन् ।

कतिपयले खोलाको जग्गालाई अस्थायी लालपुर्जामा परिणत गराइसकेका छन् । २०२१ सालमा खोलाको नाममा भएको कतिपय जग्गा अतिक्रमण भइसकेको छ । खोला अतिक्रमण तथा खोला साँघुरिँदै जाँदा प्रत्येक वर्षातमा भक्तपुर डुबानमा पर्ने समस्या ताजा छ । जग्गा एकीकरणको प्रक्रिया नभइसकेको अवस्थामा अर्को पक्षले डोजर चलाउनु दुर्भाग्य भएको स्थानीय बताउँछन् ।

प्रकाशित : जेष्ठ ३१, २०७६ ०७:३४
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×