सरकारविरुद्ध प्रदर्शन
काठमाडौँ — कांग्रेसको भातृसंस्था नेपाल विद्यार्थी संघ (नेविसंघ) को एक घटक सरकारविरुद्ध सडक प्रदर्शनमा उत्रिएको छ । वरिष्ठ नेता रामचन्द्र पौडेल निकट विद्यार्थीहरुले मंगलबारदेखि प्रदर्शन थालेका हुन् । उनीहरुले मिडिया काउन्सिल विधेयक, मानव अधिकार आयोग ऐन, वाइडबडी जहाज खरिद प्रकरण, सुन तस्करी, सरकारी जग्गा अतिक्रमण, ऐनसेल कर छली लगायत मुद्दा उठाएर सडक प्रदर्शन गरेका थिए ।
प्रदर्शनमा विद्यार्थी नेताहरु मोतीलाल भण्डारी, लिलावल्लभ दाहाल, शिव रिमाल लगायतको उपस्थिति थियो । उनीहरुले यस्तो प्रदर्शन जारी राख्ने बताए । पार्टी केन्द्रीय कार्यसमितिले तत्कालीन नैनसिंह महरको कार्यसमितिलाई हटाएपछि नेविसंघ भद्रगोल अवस्थामा छ । 'सरकारले यत्रो काण्डैकाण्ड मच्चाउँदा पनि नेविसंघको भूमिका कतै देखिएन, पार्टीले मुल नेतृत्व गठन नगरे पनि हामीले स्वत:स्फूर्त सरकार विरुद्धको प्रदर्शन थालेका हौं' विद्यार्थी नेता भण्डारीले बताए ।
विश्वविद्यालयको स्वायत्तता माथिको हस्तक्षेप र निजी विद्यालयले लिने चर्को शुल्क तथा शिक्षा क्षेत्रमा भएको बेथितिको विरुद्ध प्रदर्शन जारी राख्ने उनीहरुको योजना छ । मंगलबार शंकरदेव क्याम्पसबाट निस्केको जुलुस बागबजार, पुतलीसडक हुँदै पद्यकन्या क्यापसमा पुगेर सभामा परिणत भएको थियो ।
