झारफुक बहानामा बलात्कृत

कान्तिपुर संवाददाता

भक्तपुर — मध्यपुर थिमि नगरालिका-१ लोकन्थलीमा झारफुकको बहानामा एक १३ वर्षीया बालिका बलात्कृत भएकी छन् । महानगरीय प्रहरी वृत्त ठिमीले झारफुकको बहानामा बालिका बलात्कार गर्ने मकवानपुरगढी गाउँपालिका घरभई चाँगुनारायण-८ बस्ने ३५ वर्षीय गुरु रोशन भन्ने हिरामणि घिमिरेलाई पक्राउ गरेको छ । 

मंगलबार दिउँसो पीडितको बाबुलाई झारफुक गर्ने बहानामा १३ वर्षीया बालिकालाई बलात्कार गरेको खुलेको वृत्त प्रमुख डीएसपी मिलन केसीले बताए । झारफुकको बहानामा घिमिरेले पीडित बालिकाका बाबुलाई आँखामा पट्टी बाँधेर बालिकालाई बलात्कार गरेको उनले बताए । बालिकालाई जबरजस्ती करणी गरी फरार रहेका घिमिरेलाई बिहीबार कटुञ्जेबाट पक्राउ गरेर भक्तपुर जिल्ला अदालतमा पेस गरेको प्रहरीले जनाएको छ ।

प्रकाशित : चैत्र २१, २०७५ २०:५२
प्रतिक्रिया
पठाउनुहोस्

बारा र पर्साका हुरी प्रभावितको घर निर्माणको जिम्मा नेपाली सेनालाई 

कान्तिपुर संवाददाता

काठमाडौँ — सरकारले बारा र पर्साका हवाहुरी प्रभावितहरुको घर निर्माणको जिम्मा नेपाली सेनालाई दिएको छ । मन्त्रिपरिषद्को बिहीबार साँझ बसेको बैठकले वर्षायाम सुरु हुनुअघि नै प्रभावितहरुको घर निर्माण सक्नका लागि सेनालाई दिने निर्णय गरेको हो ।

घर निर्माणका लागि प्रदेश २ का प्रमुख सचिवको संयोजकत्वमा बारा र पर्साका प्रमुख जिल्ला अधिकारी, सहरी विकास र रक्षा मन्त्रालयका प्रतिनिधि रहेको समिति गठन गरिएको सञ्चार तथा सूचना प्रविधिमन्त्री एवं सरकारका प्रवक्ता गोकुल बाँस्कोटाले जानकारी दिए ।
प्रभावितहरुको घर निर्माणको सम्पूर्ण खर्च सरकारले बेहोर्ने छ । तत्कालै बर्खा लाग्ने भएकाले छिटो निर्माण सक्नका लागि सरकारले सेनालाई जिम्मा दिएको हो । बिहीबार बिहान सातै प्रदेशका मुख्यमन्त्रीहरुसँग प्रधानमन्त्रीले यो विषयमा कुरा गरेका थिए । प्रधानमन्त्रीसहितको छलफलमा प्रदेश २ का मुख्यमन्त्री लालबाबु राउतसमेत थिए । राउतले समेत छिटो घर निर्माणको आवश्यक औल्याउँदै विशेष व्यवस्था गर्नुपर्ने सुझाव प्रधानमन्त्रीलाई दिएका थिए ।

बिहीबार बिहानको बैठकमै सेनालाई जिम्मेवारी दिनेबारे छलफल भएको थियो । त्यही छलफलको आधारमा साँझको मन्त्रिपरिषद् बैठकले उक्त निर्णय गरेका हो । प्रभावितहरुलाई घर निर्माणसहित उपचार खर्च पनि सरकारले नै बेहोर्ने निर्णय यसअघि नै भइसकेको छ । प्रदेश र केन्द्र सरकारले समन्वयात्मक रुपमा प्रभावित क्षेत्रमा पुनर्स्थापना कार्यक्रम समेत सञ्चालन गर्नेछन् ।

प्रकाशित : चैत्र २१, २०७५ २०:२९
पूरा पढ्नुहोस्
प्रतिक्रिया
पठाउनुहोस्