मध्यपुर थिमिका सामुदायिक विद्यालयको शैक्षिक गुणस्तर बढाइने

भक्तपुरमा रहेको आदर्श जनप्रेमी इंग्लिस सेकेण्डरी स्कुलको ३०औँ स्थापना दिवसमा बोल्दै मेयर श्रेष्ठले यसका लागि संस्थागत विद्यालयसँग सहकार्य गरेर अघि बढ्ने बताए । उनले आफ्नो कार्यकालमा थिमी नगरपालिकाको सामुदायिक विद्यालयलाई नेपालकै नमूना विद्यालयको रुपमा विकास गराउने दाबी गरे । उनले भने, 'जहाँ पनि नीजि स्कुल राम्रा हुन्छन् । सामुदायिक स्कुल खस्किन्छन् भन्ने भ्रम छ। तर अब थिमीमा नगर निरीक्षकको व्यवस्था गरेर सामुदायिक स्कुलको पनि शैक्षिकस्तर उकासिने छ ।'

उनले यसको लागि थिमी नगरपालिकाले काम अघि बढाइसकेको बताए । नगरपालिकाले आवासीय विद्यालय अर्गनाईजेशन नेपाल (प्याब्सन) मध्यपुरसँगको सहकार्यमा नगर निरीक्षकको लागि आवेदन खुला गरिने उनले बताए । नगर निरीक्षकले सामुदायिक र संस्थागत विद्यालयको सहकार्य गर्ने र ती विद्यालयहरुको निरीक्षण गर्ने छ ।

यसैगरी मेयर श्रेष्ठले मध्यपुर थिमी नगरपालिकालाई शैक्षिक गन्तव्य बनाउने दाबी पनि गरेका छन् । मध्यपुरमा उत्कृष्ट शिक्षयालय रहेको र यी शिक्षालयलाई ब्रान्डिङ गरेर शैक्षिक हब बनाउनु पर्ने उनको धारणा थियो ।

यस्तै जनप्रेमीका प्रिन्सिपल एवं मध्यपुर प्याब्सन भक्तपुरका अध्यक्ष निलेश आचार्यले चाँडै नै सामुदायिक र संस्थागत विद्यालयबीचको खाडल कम हुने बताए । थिमी नगरपालिका भित्र रहेका विद्यालयका सबैको समान गुणस्तर रहने बताउँदै उनले त्यसपछि शिक्षामा एकरुपता आउने बताए । उनले भने, 'अब हामी नीजि र सरकारी भनेर शिक्षाको गुणस्तरमा भिन्नता हुने शिक्षा दिँदैनौं । सबैको गुणस्तरीय शिक्षा हुन्छ । यसको लागि नगरपालिका प्याब्सनसँग सहकार्य गरेर अगाडि बढिकसेकेको छ ।'

मानव कल्याण समाजकी अध्यक्ष सुमित्रा चौलागाईंले विद्यालय र अभिभावकबीच सम्बन्ध समधुर हुनुपर्ने बताइन् । उनले विद्यार्थीलाई घर र विद्यालयमा नै संस्कार सिक्ने भएकोले राम्रो संस्कार दिनुपर्ने बताइन् । उनले भनिन्, 'यदि शिक्षक र अभिभावकले नै सही संस्कार र शिक्षा दिन सकेनौं भने हाम्रो भविष्य अन्धरकार हुन्छ ।'

नगरपालिका भित्र १६ वटा सामुदायिक र ५० वटा भन्दा बढी संस्थागत विद्यालय छन् ।