त्रिवि पुस्तकालय पुनर्निर्माण हुने

कान्तिपुर संवाददाता

काठमाडौँ — भारतले भूकम्पबाट क्षतिग्रस्त भएको त्रिभुवन विश्वविद्यालय केन्द्रीय पुस्तकालय भवन निर्माण गर्न अनुदान सहयोग गर्ने भएको छ ।

आउँदो वर्ष २०१९ देखि निर्माण सुरु हुने पुस्तकालय दुई वर्षभित्र निर्माण सम्पन्न हुनेछ । त्यसनिम्ति नेपालस्थित भारतीय दूतावासले प्राविधिक नापजाँच गराइसकेको छ भने नेपाली वास्तुकलाअनुसारको नक्सा पाससमेत गराइसकिएको छ ।


नेपाल र भारतीय सहयोग मिसनले २०२४ सालमा निर्माण गरेको पुस्तकालय भवन ०७२ को भूकम्पले जीर्ण तुल्याएको छ । उक्त जीर्ण भवनलाई पुनर्निर्माण गरिनेछ । साथै, बीच भागमा रहेको विद्यमान ठूलो भवनलाई यथावत् राखेर त्यसको पश्चिम–दक्षिणको खुला मैदानमा नयाँ भवन निर्माण गरिने भएको छ ।


‘भारतीय सरकारका प्रतिनिधि तथा प्राविधिक टोलीले नापजाँच गरिसकेका छन्,’ पुस्कालयका उपप्रमुख पूर्णलाल श्रेष्ठले कान्तिपुरसित भने, ‘१६ करोड रुपैयाँ लागत लाग्ने अनुमान छ ।’ पश्चिमी मोहडामा बन्ने भवनको लम्बाइ १ सय १४ फिट र चौडाइ ८० फिट रहनेछ । उक्त बजेटले भवन निर्माणसँगै फर्निचर, पुस्तकालयका निम्ति आधुनिक प्रविधि जडानसमेत गरिनेछ ।


पुस्तकालयको पुरानो भवनको माथिल्लो तलाको पूर्वतर्फको कक्ष पूरा खाली छ । पश्चिमतर्फ केही पुस्तक र जीर्ण फर्निचर तथा स्टिल दराजहरू थुपारिएका छन् । भुइँतलाको पश्चिमतर्फ आधा फिट धसिएको पूरै कक्ष खाली छ । भूकम्पबाट भाँचिएका तीन सयभन्दा बढी पुस्तकालय र्‍याकका पुस्तक अन्यत्र सारेर सुरक्षित राखिएका छन् । बीच भागको ठूलो भवनमा पाठकले पढ्ने स्थल कायम छ । त्यसका अलावा भूकम्पपछि सात कोठे प्रिफ्याब टहरामा पुस्तक पढ्ने व्यवस्था गरिएको छ ।

प्रकाशित : आश्विन १२, २०७५ ०८:१४
प्रतिक्रिया
पठाउनुहोस्

छानिए १० हिल–स्टेसन

प्रताप विष्ट

मकवानपुर — प्रदेश ३ मा आन्तरिक एवं बाहय पर्यटक आकर्षित गर्न प्रदेशको उद्योग, पर्यटन र वन तथा वातावरण मन्त्रालयले १० वटा हिल–स्टेसनको छनोट गरेको छ ।

विश्व पर्यटन दिवसका अवसरमा बिहीबार मकवानपुरको उत्तरी क्षेत्रमा पर्ने थाहा नगरपालिका १ ऐतिहासिक बस्ती एवं पर्यटकीय स्थल कुन्छालका बासिन्दाले मु्ख्यमन्त्री डोरमणि पौडेल लगायतलाई बाजागाजासहित आफ्नो गाउँको अवलोकन गराउँदै । तस्बिर : प्रताप

विश्व पर्यटन दिवसका अवसरमा पर्यटन मन्त्रालयले मुडे, जिरी, शिवालय, खुर्कोट (सिन्धुलीगढी) चित्लाङ–कुलेखानी, ककनी, रुबी भ्याली, सोमदह लगायत १० उच्च स्थानलाई बिहीबार हिल–स्टेसन घोषणा गरेको छ ।


‘एउटा हिल–स्टेसनमा, एक भ्युटावर, एक होमस्टे, एक सामुदायिक लज, बगैँचा, मनोरञ्जन घर र कोसेली घर निर्माण गरिनेछ,’ उनले भने । छनोट भएका हिल–स्टेसनको पूर्वाधारहरू निर्माण गर्न ३० करोड रुपैयाँ बजेट विनियोजन गरेको छ । प्रदेशको पर्यटन मन्त्रालयले आन्तरिक एवं बाहय पर्यटकलाई आकर्षित गर्न स्थानीय तहसँग समन्वय गरेर पर्यटकीय क्षेत्रको विकास गर्ने पर्यटन मन्त्री नेपालले बताए । ‘ओझेलमा परेका पर्यटकीय क्षेत्रको विकास र प्रसारमा पनि जोड दिनेछांै,’ उनले भने ।


राजा पृथ्वीनारायण शाहले मकवानपुरको चन्द्रागिरिको डाँडामा उभिएर उपत्यका आक्रमण गर्ने सोच बनाएको स्थलमा २० मिटर उचाइको भ्यु टावर निर्माण गर्ने भएको छ । भ्यु टावर निर्माण गर्न यो वर्ष २ करोड रुपैयाँ विनियोजन गरेको छ । उक्त भ्यु टावरको मुख्यमन्त्री डोरमणि पौडेलले बिहीबार शिलान्यास गरे ।


कर्मचारीलाई घुमफिर खर्च प्रदेश सरकारले कर्मचारीलाई एक साताको बिदा दिएर एक महिना बराबरको तलब उपलब्ध गराउने भएको छ । प्रदेश ३ सरकारले आन्तरिक पर्यटन प्रवद्र्धन गर्ने उद्देश्यले प्रदेश मातहतका कर्मचारीलाई एक महिनाको तलब उपलब्ध गराएर घुमफिर गर्न पठाउने भएको हो ।


आन्तरिक पर्यटन प्रवद्र्धन गर्न र ‘रिफ्रेस’ हुन प्रदेश सरकारले कर्मचारीलाई एक साताको बिदा दिएर एक महिना बराबरको तलब पनि उपलब्ध गराउने भएको हो । ‘आन्तरिक पर्यटन प्रवद्र्धन गर्न र प्रदेश मातहतका कर्मचारी प्रोत्साहित गर्ने उद्देश्यले उक्त नीति लिएको’ मुख्यमन्त्री डोरमणि पौडेलले भने । मातहतका कर्मचारीलाई आन्तरिक पर्यटन प्रवद्र्धन गर्न एक साताको बिदा र एक महिना बराबरको तलब उपलब्ध गराई प्रोत्साहित गर्ने उनले बताए ।


प्रदेश सरकारले असार १ गतेसम्म प्रदेश कार्यालयमा उपस्थित भएका कर्मचारीलाई यो सुविधा उपलब्ध गराउने जनाएको छ । पछि आएका कर्मचारीले चालू आवमा यो सुविधा नपाउने कार्यविधिमा उल्लेख छ । घुमफिर गर्न रकम लिएका कर्मचारीले सम्बन्धित प्रदेश राजधानी र आफ्नो ठेगानाभन्दा अन्यत्र पर्यटकीय स्थलमा घुम्न जानुपर्ने व्यवस्था गरेको छ ।

प्रकाशित : आश्विन १२, २०७५ ०८:१३
पूरा पढ्नुहोस्
प्रतिक्रिया
पठाउनुहोस्