रानीपोखरी विवाद सुल्झिएन

कान्तिपुर संवाददाता

काठमाडौँ — रानीपोखरीको बालगोपालेश्वर मन्दिर विज्ञको सुझावविपरीत पुरातत्त्व विभागले पुनर्निर्माण सुरु गरेपछि उत्पन्न विवाद जटिल बन्दै गएको छ । प्रताप मल्लकालीन गुम्बज शैलीमा बनाउन माग गर्दै सम्पदा संरक्षण अभियन्ताले दबाब दिएपछि काम फेरि रोकिएको छ ।

यसको निर्माणबारे सहमित जुटाउन राष्ट्रिय पुनर्निर्माण प्राधिकरणले पुरातत्त्व विभाग, विज्ञ, अभियन्ता लगायतसँग छलफल गर्‍यो । तर सहमति भने जुटेन ।


छलफलका क्रममा केही विज्ञले रानीपोखरी मल्लकालीन शैलीमा बनाउनुपर्ने धारणा व्यक्त गरे भने केहीले पुनर्निर्माणलाई अवसरका रूपमा लिँदै पहिलेकै शैलीमा बनाउनुपर्ने बताए । ‘रानीपोखरी गैरजिम्मेवार रूपमा निर्माण रोकिएको छ,’ विज्ञ समितिका सदस्य प्राध्यापक सुदर्शनराज तिवारीले भने, ‘समितिले सरकारलाई दिएको प्रतिवेदनमा उल्लेख भएअनुसार काम भएकाले यसलाई पुरातत्त्व विभागको स्टान्डर्डअनुसार बनाएको भन्न मिल्दैन ।’


केही विज्ञले त्यसमा फरक धारणा राखे । ‘रानीपोखरीलाई प्रताप मल्लको शैलीमा बनाउने हो भने उपत्यकाको अन्य सम्पदा पनि पुरानै शैलीमा बनाउनुपर्छ,’ इतिहासविद् रमेश ढुंगेलले भने । उनको भनाइको तिवारीले प्रतिवाद गरे । पुरातत्त्वविद् साफल्य अमात्यले अहिलेको पुस्ताले जस्तो देखे, त्यही शैलीमा बनाउनुपर्ने धारणा राखे ।

प्रकाशित : भाद्र २५, २०७५ ०८:५९
प्रतिक्रिया
पठाउनुहोस्

गोविन्दा नेपाल आउँदै

कान्तिपुर संवाददाता

काठमाडौँ — वरिष्ठ फिल्मकर्मी किशोर राना र बलिउड अभिनेता गोविन्दा पुरानै साथी हुन् । १५ वर्ष मुम्बईमा बिताएका किशोरले हिन्दी फिल्मसँगै भोजपुरी फिल्ममा समेत काम गरे ।

अहिले मृगौलाको उपचार गरिरहेका किशोरलाई एउटा अवार्ड दिन उनकै पुरानो मित्र गोविन्दा नेपाल आउने भएका छन् । आउँदो आइतबार राजधानीमा हुन लागेको ‘एलजी सिनेमा सर्कल अवार्ड’ को विशेष पाहुनाका रूपमा गोविन्दा आउन लागेका हुन् । उनैले किशोरलाई लाइफटाइम अचिभमेन्ट अवार्ड दिनेछन् ।


सिनेमा सर्कलका अध्यक्ष दिनेश डीसीका अनुसार, गोविन्दा शनिबार आइपुग्नेछन् । उनीसँगै छोरा यश पनि हुनेछन् । पत्नी सुनीता र छोरी टिना भने शुक्रबारै नेपाल आउँदै छन् । ‘गोविन्दाको नेपाल बसाइ तीन दिनको हुनेछ,’ डीसीले भने, ‘सपरिवार होटल याक एन्ड यतीमा बस्नेछन् ।’ अवार्ड समारोहको भोलिपल्ट बिहान पशुपतिनाथको पूजाआजाको कार्यक्रम रहेको डीसीले बताए । अवार्डको यो तेस्रो संस्करण हो ।


मनोनयन सार्वजनिक
एलजी सिने सर्कल अवार्डको विधागत उत्कृष्टको नाम पनि आइतबार सार्वजनिक गरिएको छ । जसमा उत्कृष्ट फिल्मतर्फ सात फिल्महरू ‘छक्का पञ्जा २’, ‘पञ्चायत’, ‘शत्रुगते’, ‘लिलिबिली’, ‘भुइँमान्छे’, ‘मंगलम’ र ‘तिमीसँग’ प्रतिस्पर्धामा रहेका छन् । उत्कृष्ट निर्देशकतर्फ पनि यिनै फिल्मबाट क्रमश: दीपाश्री निरौला, शिवम् अधिकारी, प्रदीप भट्टराई, मिलन चाम्स, नवराज बुढाथोकी, नवल नेपाल र शिशिर राणा परेका छन् ।


फिल्म निर्देशक किशोर रानालाई लाइफटाइम एचिभमेन्ट अवार्ड प्रदान गर्न लागिएको उक्त अवार्डमा अभिनेतातर्फ दयाहाङ राई, अनमोल केसी, प्रदीप खडका, पुष्प खडका, सरोज खनाल, राज कटुवाल र नाजिर हुसेनबीच प्रतिस्पर्धा चल्दा अभिनेत्री विधातर्फ साम्राज्ञी राज्यलक्ष्मी शाह, नीता ढुंगाना, बेनिशा हमाल, शिल्पा पोखरेल र प्रियंका कार्कीमध्ये एकले अवार्ड थाप्नेछन् । अवार्डमा उत्कृष्ट अनस्क्रिन जोडी, चर्चित अभिनेता, अभिनेत्रीदेखि उत्कृष्ट स्टन्ट, भीएफएक्स, ट्रेलर, पोस्टरजस्ता विधासहित २२ विधामा अवार्ड दिइने उल्लेख छ ।

प्रकाशित : भाद्र २५, २०७५ ०८:५४
पूरा पढ्नुहोस्
प्रतिक्रिया
पठाउनुहोस्