सम्पदा निर्माणमा ५ मेयर एक ठाउँ

कान्तिपुर संवाददाता

भक्तपुर — उपत्यकाका महानगर तथा नगरपालिकाहरू पुरातात्त्विक, ऐतिहासिक तथा सांस्कृतिक महत्त्वका संरचना निर्माणमा एकरूपता ल्याउन सहमत भएका छन् । भक्तपुर नगरप्रमुख सुनिल प्रजापतिको अगुवाइमा भएको नगरप्रमुखको भेलाले त्यसका लागि आइताबर सहमति गरेका हुन् ।

संरचना निर्माणमा जनसहभागिता जुटाउने, ऐतिहासिक प्रमाणका आधारमा मौलिक शैलीमा पुनर्निर्माण गर्ने, उपत्यकाका प्राचीन सहर समेटेर सांस्कृतिक संरक्षित केन्द्र बनाइने उल्लेख छ ।

नगरप्रमुखहरूको टोलीले भक्तपुर नगरभित्रको निर्माणाधीन सम्पदाहरूको अवस्था, नगरपालिकाद्वारा सञ्चालित ख्वप कलेज, ख्वप मावि, ख्वप पोलिटेक्निक, ख्वप इन्जिनियरिङ कलेजको स्थलगत अवलोकनसमेत गरेका छन् । नगर प्रमुखहरूलाई भक्तपुर नगर–उपप्रमुख जोशीले सम्पदा र शैक्षिक अवस्थाको बारे जानकारी गराइन् ।

काठमाडौं महानगरपालिकाका मेयर विद्यासुन्दर शाक्यले पुरातात्त्विक तथा सांस्कृतिक सम्पदाको पुनर्निर्माणका लागि भक्तपुरबाट सिक्नुपर्ने बताएका छन् । आइतबार काठमाडौं, ललितपुर, कीर्तिपुर र मध्यपुर थिमि नगरप्रमुखले भूकम्पले क्षतिग्रस्त निर्माणाधीन सम्पदाको अवलोकन गर्दै सांस्कृतिक सम्पदा बचाउन भक्तपुर नगरको पहलको प्रशंसा गरे । ‘भक्तपुर नगरबाट अन्य नगरपालिकाले सम्पदा संरक्षणको शिक्षा लिनुपर्छ,’ काठमाडौं महानगरप्रमुख विद्यासुन्दर शाक्यले भने, ‘सम्पदा संरक्षण गरी पर्यटनसँग जोड्न र उपत्यकाको एकीकृत विकासका लागि नगरहरूबीच छलफल हुनुपर्छ ।’

ललितपुर महानगरप्रमुख चिरीबाबु महर्जन, कीर्तिपुर नगरप्रमुख रमेश महर्जन, मध्यपुर थिमि नगरप्रमुख मदनसुन्दर श्रेष्ठलगायतले भक्तपुरले सम्पदा संरक्षण र शिक्षामा गरेको कार्यको प्रशंसा गरे । उनीहरूले धार्मिक, सांस्कृतिक, ऐतिहासिक महत्त्वका सम्पदा संरक्षणमा जोड दिने प्रतिबद्धता जनाए ।

प्रकाशित : श्रावण १४, २०७५ ०८:२१
प्रतिक्रिया
पठाउनुहोस्

दसैंअघि नै नयाँ घर

कान्तिपुर संवाददाता

सिन्धुपाल्चोक — पुनर्निर्माणलाई तीव्र बनाउन ३ नगर र ९ गाउँपालिका जनप्रतिनिधि सहमत भएका छन् । गाउँका प्राय: स्थानीय जनप्रतिनिधिले पीडितलाई दसैंअघि नै भूकम्प प्रतिरोधी घरमा भित्र्याउने लक्ष्य लिएका हुन् ।

सिन्धुपाल्चोकको त्रिपुरासुन्दरी गाउँपालिकामा पुनर्निर्माण सकेका धुस्कुनका भूकम्पपीडितलाई प्रमुख भूपेन्द्र श्रेष्ठबाट प्रमाणपत्र दिइँदै । तस्बिर : अनिश तिवारी । कान्तिपुर

भौतिक पूर्वाधारलगायत अन्य कामभन्दा अहिले जनप्रतिनिधि पुनर्निर्माण सक्न वडा या गाउँपालिका बनाउने होडमा लागेका छन् । गाउँपालिका प्रमुखभन्दा वडाध्यक्ष यसमा हतारोमा लागिरहेको भेटिन्छ । उनीहरू गाउँगाउँ पुगेर सहजीकरण गरिरहेका छन् ।

त्रिपुरासुन्दरी गाउँपालिकअन्तर्गत धुस्कुनले दसैंअघि पुनर्निर्माणका सबै काम सक्ने लक्ष्य लिएर गतिविधि अघि बढाएको छ । १ हजार ६२ भूकम्पपीडितमा हजार ४५ ले घर निर्माणका काम धमाधम अघि बढाएको वडाध्यक्ष शुकदेव रिसालले बताए ।

जाइकाका टिम लिडर तोमोयोकी मियानोले भर्खरै निर्माण सकेका ३ सय भूकम्पपीडितलाई शुक्रबार आवास सकेको प्रमाणपत्र दिए । ‘११ जना छुटेको बाहेक अरू सबैले घरको कामलाई निरन्तरता दिइरहेका छन्,’ उनले भने । जिल्लामा पहिलोपटक आफ्नै वडामा आवास निर्माण सम्पन्न प्रमाणपत्र दिलाएको उनले सुनाए ।

जुगल गाउँपालिका बराम्चीका वडाध्यक्ष सनत अधिकारी पनि पुनर्निर्माण अभियानमा व्यस्त छन् । गाउँभर भूकम्पप्रतिरोधी घर निर्माण अभियान अघि सारेर टोलटोलमा गइरहेको उनले बताए । ‘किस्ताको समस्या भएकालाई कागजातसहित आफैं चौतारा पुग्ने, मिलाउनेजस्ता सेडुल बनाएको छु, दसैंअघि पुनर्निर्माण सक्ने लक्ष्य राखेर यहा दौडिरहेको छु,’ उनले भने ।

बराम्चीमा झन्डै ८० प्रतिशतले आवास निर्माणलाई तीव्रता दिएका छन् । इन्द्रावती गापाले गाउँभर होमस्टे र एक तरकारी खेती एक घरजस्ता कृषिसँग जोडेर पुनर्निर्माणलाई सक्ने विशेष प्राथमिकतामा पहल गरेको छ । ‘कृषि उत्पादनसँगै शौचालय, आवासदेखि स्वस्थकर वातावरणका लागि अपरिहार्य छ, त्यसैले अभियानसँगै पुनर्निर्माण थाल्दै छौं,’ इन्द्रावती गाउँपालिका प्रमुख वंशलाल तामाङले भने । इन्द्रावतीको अधिकांश गाउँमा किस्ता लिनेवाला ९० प्रतिशतले घर निर्माण अन्तिम चरणमा पुर्‍याएका छन् ।

पाँचपोखरीको थाङपाल, थाङपालकोट, भोताङजस्तै हेलम्बु गाउँपालिकाको किउल, शेर्माथान, महाँकाललगायत दर्जनौं विकट बस्तीमा बर्खापछि सडक ठप्प हुने गरेको छ । सडकका कारण पुनर्निर्माणमा पछाडि नपरोस् भनेर बाह्रै महिना चल्ने स्थायी सडकका लागि काम थालिएको हेलम्बु गाउँपालिकाका निमाग्याल्जेन शेर्पाले बताए ।

प्रकाशित : श्रावण १४, २०७५ ०८:२०
पूरा पढ्नुहोस्
प्रतिक्रिया
पठाउनुहोस्