बागदरबार जोगाउन गुहार

कान्तिपुर संवाददाता

काठमाडौँ — ऐतिहासिक बागदबार काठमाडौं महानगरले मास्न लागेको भन्दै त्यसलाई जोगाउन प्रधानमन्त्री केपी ओलीलगायत निकायमा सम्पदाप्रेमीले गुहारेका छन् । बागदरबार मास्न पुरातत्त्व विभागले काठमाडौं महानगरपालिकालाई दिएको अनुमतिपत्रलाई विज्ञहरूले दुराशयपूर्ण भनेका छन् ।

कुनै कालखण्डको महत्त्व दर्साउने सम्पदालाई जोगाउनुपर्ने निकायले भत्काउने अनुमति दिएकामा उनीहरूले आपत्ति जनाएका हुन् ।

‘बागदरबार भत्काउन रोक्न पुरातत्त्व विभाग आफैंले पत्र पठाएको छ,’ पुरातत्त्वविद् भीम नेपाल भन्छन्, ‘फेरि किन भत्काउने अनुमति दियो ? यो पत्रमा विभागको दुराशय देखिन्छ । बागदरबार भत्काउन हुँदैन ।’ बागदरबार नभत्काउन विभाग आफैंले दिएको निर्देशनलाई काट्ने गरी काठमाडौं महानगरपालिकालाई भत्काउन अनुमति दिएको थियो ।

महानगरले बागदरबार भत्काउन २०७४ भदौ २२ मा बोलपत्र आह्वान गरिसेको थियो । पहिलाको बोलपत्र रद्द गरी पुन: अर्काे आह्वान गर्ने तयारी गरेको महानगरपालिकाले जनाएको छ । महानगरले तोकेको समयभित्र कम्पनीका बोलपत्र आह्वान भएका थिए । यससम्बन्धी समाचार सार्वजनिक भएपछि चौतर्फी विरोध भएको थियो । विरोध भएपछि यसलाई भत्काउन पुरातत्त्व विभाग, राष्ट्रिय पुनर्निर्माण प्राधिकरणले रोक लगाएका थिए ।

रोकिएको झन्डै १० महिनापछि विभागले फेरि भत्काउन अनुमति दिएपछि विज्ञहरूले चासो राखेका हुन् । ‘पहिला किन रोक्यो ?’ सम्पदा अभियन्ता सञ्जय अधिकारी भन्छन्, ‘अहिले फेरि किन दियो ? सम्पदा जोगाउने निकायले यसरी आफूखुसी गर्न पाइन्छ ?’ पहिला रोकेको विभागले अहिले प्राचीन स्वरूप नमासिने गरी, प्राचीन निर्माण सामग्री प्रयोग गर्ने गरी निर्माण गर्न अनुमति दिएको छ ।

‘भवनको मौलिक स्वरूपमा परिवर्तन नगरी परम्परागत निर्माण सामग्री प्रयोग गरी, प्राचीन स्मारक संरक्षण ऐन २०१३, प्राचीन स्मारक संरक्षण नियमावली, कार्यविधि, निर्देशिकाअनुसार भत्काउँदा प्राप्त भएका पुन: प्रयोगमा आउन सक्ने सामग्रीहरूको विस्तृत डकुमेन्टेसन तयार पारी उपयुक्त सामग्री प्रयोग गर्ने गरी बागदरबार पुनर्निर्माण गर्ने सहमति प्रदान गर्नेसम्बन्धी विभागीय निर्णयअनुसार कार्य गर्न गराउनु हुन अनुरोध गर्दछु,’ विभागका संग्रहालय अधिकृत पुरुषोत्तम आचार्यले चलानी नं. २६०१ मा लेखेको पत्रमा उल्लेख छ ।

प्रकाशित : असार २९, २०७५ ०८:२३
प्रतिक्रिया
पठाउनुहोस्

नेटोको सुरक्षा बजेट बढाउने सहमति

बीबीसी/एएफपी

ब्रसेल्स — अमेरिकी राष्ट्रपति डोनाल्ड ट्रम्पले उत्तर एटलान्टिक सन्धि संगठन (नेटो) का गठबन्धन राष्ट्रहरू सुरक्षा खर्च बढाउन सहमत भएको जनाएका छन् ।

अमेरिकी राष्ट्रपति डोनाल्ड ट्रम्प क्रोएसियाली समकक्षी कोलिन्दा ग्राबर किटारोभिचका साथ नेटो सम्मेलनमा । तस्बिर : रोयटर्स

ब्रेल्जियमको राजधानी ब्रसेल्समा भएको दुई दिने नेटो सम्मेलनपछि बोल्दै ट्रम्पले गठबन्धन राष्ट्रहरू रक्षा खर्च बढाउन सहमत भएको दाबी गरे । उनका अनुसार नेटो आवद्ध राष्ट्रहरू आफ्नो वार्षिक कुल गार्हस्थ उत्पादनको २ प्रतिशतभन्दा बढी बजेट थप गर्न सहमत भएका हुन् ।

राष्ट्रपति ट्रम्पले नेटोको कुल खर्चमा अमेरिकाको तुलनामा अन्य सदस्य राष्ट्रले निकै कम बेहोरेको भन्दै आलोचना गर्दै आएका थिए । ‘हामी आज निकै ठूलो उपलब्धि हासिल गर्‍यौं,’ बैठकपछि संवाददातासँग बोल्दै ट्रम्पले भने, ‘बैठक कक्षभित्र त्यो निकै गजबको क्षण थियो ।’ यसअघि ट्रम्पले नेटो साझेदार राष्ट्रले कुल गार्हस्थ उत्पादनको कम्तीमा ४ प्रतिशतसम्म सुरक्षा खर्चमा वृद्धि गर्न आग्रह गरेका थिए ।

जर्मन चान्सलर एन्जेला मर्केलले ‘नेटो आवद्ध राष्ट्रबाट बजेट थप गर्ने विषयमा प्रस्ट प्रतिबद्धता’ रहेको जनाइन् । ट्रम्पले नेटोको बजेटमा अरू देशको तुलनामा जर्मनीले कम खर्च बेहोर्ने गरेको भन्दै जर्मनीको तीव्र आलोचना गर्दै आएका थिए ।

ट्रम्पले आफ्नो कारणले बजेट वृद्धि भएको भन्दै नेटो प्रमुख जेन्स स्टोल्टेनवर्गले प्रशंसा गरेको दाबी गरे । यद्यपि, स्टोल्टेनवर्गले भने यसबारे केही उल्लेख गरेका छैनन् । उनले लक्षित २ प्रतिशतको लक्ष्यलाई प्राथमिकता दिनुपर्नेमा जोड दिएको जनाइएको छ ।

रक्षा बजेट रकम वृद्धिसम्बन्धी पत्रकारको प्रश्नको जवाफमा स्टोल्टेनवर्गले भने, ‘२ प्रतिशतको लक्ष्य नै भेट्न नसकिएको अवस्थामा हालका लागि त्यसतर्फ केन्द्रित हुनु राम्रो हो ।’

अफगानिस्तान र सिरियाबारे छफफल

बेल्जियमको राजधानी ब्रसेल्समा मंगलबार र बिहीबार भएको नेटो सम्मेलनमा अफगानिस्तान तथा सिरियाको सुरक्षाका विषयमा समेत छलफल भएको छ । सम्मेलनमा अफगानिस्तानमा नेटो सैनिक भए पनि हिंसा अन्त्य हुन नसकेको भन्दै नेटो साझेदार राष्ट्रबीच कुराकानी भएको हो । त्यसैगरी सम्मेलनका क्रममा साझेदार राष्ट्रबीच सिरियामा जारी गृहयुद्धबारे पनि कुराकानी भएको छ । उक्त छलफलमा लिबियामा जस्तै सिरियामा पनि नेटो सेनाको तैनाथ गर्नुपर्ने विषय उठेको थियो ।

प्रकाशित : असार २९, २०७५ ०८:२१
पूरा पढ्नुहोस्
प्रतिक्रिया
पठाउनुहोस्