क्षेत्रीय प्रशासन कार्यालयमा घेराउ

रमेशचन्द्र अधिकारी

धनकुटा — प्रदेश नं.१ को राजधानी धनकुटालाई कायम गरिनु पर्ने भन्दै स्थानीयबासीले आइतवार पुर्वाञ्चल क्षेत्रीय प्रशासन कार्यालय घेराउ गरेका छन् ।

 
जुलुश सहित सयौको संख्यामा पुगेको समुहले कार्यालयको मुल गेटमा धर्ना दिएको थियो । धर्नासँगै उनीहरुले क्षेत्रीय प्रशासन कार्यालय मार्फत प्रधानमन्त्री तथा गृहमन्त्री समक्ष जिल्लालाई राजधानी कायम गरिनु पर्ने व्यहोराको ज्ञापनपत्र बुझाएका छन् । उप क्षेत्रीय प्रशासक सेवन्तराज दाहाल समक्ष ज्ञापनपत्र बुझाएका हुन् । आन्दोलन संघर्ष समिति संयोजक उमेश घिमिरे नेतृत्वको टोलीले उप–क्षेत्रीय प्रशासक दाहाललाई ज्ञापनपत्र हस्तान्तरण गरे । 
 
धर्ना पश्चात आयोजित कोणसभालाई संबोधन गर्दै पाख्रीवास नगरपालिकाका मेयर बिर्षबहादुर राई, आन्दोलन संघर्ष समिति संयोजक घिमिरे, नागरिक समाजका अध्यक्ष द्रोणप्रसाद गुरागाई लगायतले पर्याप्त पुर्वाधार रहेको भन्दै जिल्लामा राजधानी कायम गर्न माग गरेका थिए । यस अघि प्रशासनिक गौडा हुदै पुर्वाञ्चल विकासक्षेत्रको सदरमुकाम समेत रहेकोले पर्याप्त भौतिक संरचना, उपयुक्त हावापानी, मजवुत सुरक्षा ब्यवस्था लगायत कारणले राजधानीका लागि उपयुक्त रहेको वक्ताहरुको दावी थियो ।
 
कार्यालयको हातामा नेपाल प्रहरी तथा सशस्त्र प्रहरीको बाक्लो उपस्थिति थियो । विगत तीन दिनदेखि स्थानीयबासीले जिल्लामा प्रदर्शन गर्दै आएका छन् । माग पुरा नहुन्जेल शसक्त आन्दोलन जारी रहने संयोजक घिमिरेले बताए । यसअघि बृहत जनप्रदर्शन र ब्याङ्ग्यात्मक रुपमा मैनबत्ती जुलुश प्रदर्शन गरिएको थियो । 

प्रकाशित : पुस २, २०७४ १८:००
प्रतिक्रिया
पठाउनुहोस्

गुवाहाटीमा नेपाली भाषा–साहित्य विमर्श

कान्तिपुर संवाददाता

काठमाडौं — समकालीन नेपाली साहित्यिक लेखन तथा डायस्पोरिक साहित्यिक स्थितिका बारेमा परामर्श गर्न आसामाको गुवाहाटीस्थित नेपाली मन्दिरमा बृहत छलफल कार्यक्रमको आयोजना गरिएको छ ।

बरिष्ठ साहित्यकर्मी लीलबहादुर क्षत्रीको उपस्थितिमा शनिबार आयोजित छलफलमा भारतीय नेपाली लेखकहरुले नेपालबाट प्रकाशित र प्रचारित पुस्तक, रचना, सामग्री सहजै उपलब्ध हुन नसकिरहेको कठीनाइका बारेमा धारणा राखेका थिए ।

छलफलका प्रमुख अतिथि समालोचक डा.गोविन्दराज भट्टराईले अहिले नेपाल प्रज्ञा प्रतिष्ठानअन्तर्गत भैरहेको अनुवाद परिचय कोषका बारेमा जानकारी दिंदै देश–भूगोल भिन्न भएपनि भाषिक र साहित्यिक डोरीले नेपालीभाषी हुनुको बृहत आयामलाई समेटिरहेको धारणा राखेका थिए । 

डा.भट्टराईले नयाा चेतना र विम्वको प्रयोगसहित आइरहेको नेपाली डायस्पोरिक लेखनको क्षितिज दिनानुदिन फराकिलो बन्दै गएको भन्दै यो आयामलाई नेपाल प्रज्ञा प्रतिष्ठानसहितका सम्बद्ध निकायले अझ समेटेर लैजानुपर्ने बताएका थिए ।  

असम नेपाली साहित्य सभा तथा नेपाली मन्दिर आयोजक रहेको समारोहमा प्रखर लेखक नव सापकोटा, दुर्गा खतिवडा, मुक्ति उपाध्याय बराल, डा.इन्दुप्रभा देवी, गोमा शर्मा, लक्ष्मी सुवेदीसहितले नेपाली भाषा र साहित्यिक सृजनाको स्थितीका बारेमा मन्तव्य राखेका थिए ।

 

प्रकाशित : पुस २, २०७४ १७:५७
पूरा पढ्नुहोस्
प्रतिक्रिया
पठाउनुहोस्