कपिलवस्तुमा राजस्व शून्य

१० करोड ८५ लाखभन्दा बढी भन्सार राजस्व असुली प्रभावित बन्न पुगेको प्रमुख भन्सार अधिकृत ध्रुव विश्वकर्माले बताए। त्यसअघि साउन २८ देखि ३२ सम्म बन्दले राजस्व संकलन ठप्प थियो।

प्रदेश सीमांकनको विरोध गर्दै अनिश्चितकालीन बन्दका कारण सेवाग्राही नआउँदा राजस्व संकलन हुन नसकेको कार्यालयले जनाएको छ। कृष्णनगरमा भन्सार कार्यालयलाई नै लक्षित गरेर आन्दोलनकारीले कार्यालय अघि नै आन्दोलन गर्ने हुँदा थप समस्या भएको थियो। राजस्व नै प्रभावित गर्ने गरी सरकारलाई असहयोग गर्न आन्दोलनकारीको तारो भन्सार कार्यालय बनेको कर्मचारी बताउँछन्। दैनिक ३५ लाखभन्दा बढी राजस्व असुली हुने भन्सार कार्यालय ५ साता बढी भइसक्दा सुनसान छ। भदौमा १ रुपैयाँ पनि नउठदा राजस्व संकलन लक्ष्य पूरा नभएको कृष्णनगरका प्रमुख भन्सार अधिकृत विश्वकर्माले बताए। भदौमा ११ करोड ३३ लाख राजस्व असुलीको लक्ष्य थियो। बन्दका कारण सीमा क्षेत्रको भारतीय बजार बढनीमा ५ सयभन्दा बढी मालवाहक ट्रक रोकिएका थिए। बन्द अनिश्चित भएका कारण कतिपय ट्रकले भारतीय सीमावर्ती बजारमा समान अनलोड गरी फर्किए। कतिपय मालवाहक ट्रक नेपालगन्ज र भैरहवा हुँदै नेपाल भित्रिए। बन्दले जिल्लाका सुठौली र चाकलचौडा छोटी भन्सार कार्यालयको पनि राजस्व असुली शून्य रह्यो। भारतबाट कृष्णनगर भन्सार नाका हुँदै सिमेन्टका कच्चा पदार्थ क्लिंकर, फलाइअस, तयारी सिमेन्ट, कोइला र दालचामललगायत आयात हुने गर्छ। त्यस्तै लत्ताकपडा, मेसिनरी पार्टपुर्जा, इलेक्ट्रिक सामान र तरकारी फलफूल पनि आयात हुने गर्छ। नेपालबाट भारततिर रोजिन एन्ड टर्पेन्टाइन, प्लाइउड र वेस्ट पेपरलगायत निर्यात हुने गर्छ। साउन २७ देखि यहाँ अनिश्चितकालीन बन्द गरिएको छ। आन्तरिक राजस्व कार्यालय कृष्णनगरले भदौमा राजस्व संकलन गर्न सकेन। १० करोड राजस्व संकलन गर्ने लक्ष्य रहेको थियो।