काठमाडौँ — आगामी मंगलबारदेखि काठमाडौंमा रोजगार मेला हुने भएको छ । नेपाल उद्योग वाणिज्य महासंघले आयोजना गर्न लागेको मेला दुई दिनसम्म चल्नेछ । महासंघको सचिवालय, टेकुमा हुने रोजगार मेलामा श्रम रोजगार तथा सामाजिक सुरक्षा मन्त्रालय र अन्तराष्ट्रिय श्रम संगठनको सहयोग रहेको छ । 

मेलामा काठमाडौं, ललितपुर महानगरपालिका, भक्तपुर नगरपालिका, भक्तपुर र ललितपुर उद्योग वाणिज्य संघको सहकार्य रहेको छ । कामको खोजीमा रहेका युवाहरुलाई प्रमुख कम्पनीहरुमार्फत कामको अवसर जुटाईदिन पहल गर्ने उद्देश्यले मेला आयोजना गरिएको महासंघले जनाएको छ ।

‘नयाँ अवसरहरुको खोजी गर्न सघाउने, आवश्यक सीप पहिचानसहित युवा जनशक्तिलाई स्वदेशमै काम गर्ने वातावरण बनाउने उद्देश्यले रोजगार मेला आयोजना हुन लागेको हो’ महासंघद्वारा जारी विज्ञप्तिमा उल्लेख छ । महासंघका अनुसार रोजगार मेलामा १०० भन्दा बढी कम्पनीहरुको सहभागिता रहने छ । त्यस्तै कामको खोजीमा रहेका ५ हजार भन्दा बढी युवाहरुलाई मेला अवलोकन गराउने लक्ष्य राखिएको छ । कार्यक्रममा रोजगारी, सीप एवम् जनशक्ति विकास लगायतका विषयमा विभिन्न परामर्श 'सेसन' समेत आयोजना हुने छन् । कामको खोजीमा रहेकाहरूले महासंघको वेबसाइटमा गई कार्यक्रममा सहभागिताका लागि दर्ता गर्नुपर्नेछ ।