काठमाडौँ — नाडा, अटोमोबाइल एसोसिएसन अफ नेपालले ट्राफिक प्रहरीलाई मोनिटरिङका लागि पाँच थान हाइटेक एडभान्स्ड सीपीयू तथा सम्बन्धित उपकरण हस्तान्तरण गरेको छ । नाडाले एक औपचारिक कार्यक्रममार्फत काठमाडौं उपत्यका ट्राफिक प्रहरी कार्यालय प्रमुख मिरा चौधरीलाई राजधानीको सेन्ट्रल ट्राफिक मोनिटरिङका लागि उक्त उपकरण सहयोग गरेको हो ।

सोही क्रममा नाडाले १०० थान ट्राफिक रिफ्लेक्टर ज्याकेट पनि हस्तान्तरण गरेको छ । सो अवसरमा नाडाका अध्यक्ष ध्रुव थापाले सामाजिक उत्तरदायित्व अन्तर्गत यो सहयोग प्रदान गरिएको बताए । राजधानीको ट्राफिक व्यवस्थापनलाई चुस्त बनाउन विगतको समयदेखि नै विभिन्न भौतिक सहयोग प्रदान गर्दे आएको थापाले बताए । उक्त कार्यक्रममा नाडाका उपाध्यक्ष राजनबाबु श्रेष्ठ, महासचिव सुरेन्द्रकुमार उप्रेति, कोषाध्यक्ष मिलनबाबु मल्ल, सहकोषाध्यक्ष पंकज अग्रवाल, केन्द्रीय कार्यसमिति सदस्य द्वय प्रकाश कपुरी तथा पुष्कर ओझा लगायतको उपस्थिति थियो ।