ग्लोबल आईएमई बैंकको ‘मेरी उनीलाई’ मुद्दती खातामा थप सुविधा
काठमाडौँ — ग्लोबल आईएमई बैंकले नयाँ विशेषता र परिमार्जनका साथ ‘मेरी उनीलाई’ मुद्दती खाता योजना ल्याएको छ । महिलाको नाममा बचत गर्ने बानी बसाल्न, व्यक्तिगत खातामा महिलालाई राम्रो प्रतिफल दिन र आर्थिक रुपमा सशक्त बनाउने उद्देश्यले यो खाता सञ्चालनमा ल्याइएको बैंकले जनाएको छ ।
दुई लाख रुपैयाँ न्यूनतम मौज्दातमा खोल्न सकिने ‘मेरी उनीलाई’ मुद्दती खातामा आकर्षक ब्याज दिइने बैंकले जनाएको छ । यो खाता ६ महिनादेखि २ वर्षसम्मका लागि खोल्न सकिनेछ । यस खातासँगै बैंकले निक्षपकर्ताको ५ लाख रुपैयाँसम्म दुर्घटना बीमा, २ लाख रुपैयाँसम्म गम्भीर रोग बीमा र १ लाख रुपैयाँसम्मको औषधि–उपचार बीमा उपलब्ध गराइदिनेछ ।
बैंकका अनुसार योजनाअन्तर्गत खाता खोल्ने ग्राहकलाई निःशुल्क डेबिट कार्ड (पहिलो वर्ष), लकर शुल्कमा शतप्रतिशत छुट (पहिलो वर्ष) र निःशुल्क मोबाइल तथा इन्टरनेट बैंकिङ सेवा (पहिलो वर्ष) उपलब्ध गराइने छ । बीचमा रकम चाहिएमा बैंकले साविक बचतको ९० प्रतिशतसम्म ऋण सुविधा पनि उपलब्ध गराउने जनाएको छ ।
