सिटिजन लाइफ इन्स्योरेन्सले प्रिमियममा आईपीओ निस्कासन गर्ने
काठमाडौँ — सिटिजन लाइफ इन्स्योरेन्स कम्पनीले प्रिमियम मूल्यमा सर्वसाधारण सेयर (आईपीओ) निस्कासन गर्ने भएको छ । काठमाडौंमा बसेको कम्पनीको पाँचौं वार्षिक साधारण सभाले प्रिमियम मूल्यमा आईपीओ निस्कासन गर्ने प्रस्ताव पारित गरेको हो ।
त्यस्तै सञ्चालक समितिको आर्थिक वर्ष २०७७/०७८ को वार्षिक प्रतिवेदनमाथि छलफल गरी सभाबाट पारित भएको छ । साथै लेखापरीक्षकको प्रतिवेदनसहित आर्थिक वर्ष २०७७/०७८ को वासलात, नाफा नोक्सान हिसाब, आयव्यय हिसाब, इक्युटीमा भएको परिवर्तन सम्बन्धी विवरण तथा नगद प्रवाह विवरण र सो सँग सम्बन्धित अनुसूचीहरु सहितको वित्तीय विवरण पारित भएको छ ।
सभाले आर्थिक वर्ष २०७८/०७९ को लागि कम्पनीको लेखापरीक्षकमा जोशी एण्ड भण्डारी, चार्टर्ड एकाउन्टेन्टस् (वर्तमान लेखापरीक्षक) लाई नियुक्ति गरेको छ । कम्पनीको सञ्चालकमा दाबा फूटी शेर्पा र अभिनव ज.व.राणाको नियुक्ति अनुमोदन गरेको छ । त्यस्तै स्वतन्त्र सञ्चालकमा श्रीमान कार्की नियुक्त भएका छन् ।