अलैंचीको प्रवर्द्धन गर्न रेसिपी बुक- बजार - कान्तिपुर समाचार

अलैंचीको प्रवर्द्धन गर्न रेसिपी बुक

कान्तिपुर संवाददाता

काठमाडौँ — वाह अलैंची अभियानले नेपालको अलैंची प्रयोग गरी तयार गरिने परम्परागत र फ्युजन नेपाली परिकारको रेसिपी बुक सार्वजनिक गरेको छ । पुस्तकमा मास्टरसेफ सन्तोष शाह र प्रशिक्षार्थी तथा अन्य सेफबाट विशेष रूपमा छानिएका ४० भन्दा बढी रेसिपीहरू समावेश गरिएका छन् ।

साथै रेसिपी बुकमा सेकुवा, चिया र खीर जस्ता सदाबहार व्यञ्जनका लागि मसलाहरू तयार गर्ने विधि पनि समावेश गरिएको नेपाल अलैंची व्यवसायी महासंघले जनाएको छ । नेपाल अलैंची व्यवसायी महासंघले प्रदेश १ को उद्योग, कृषि तथा सहकारी मन्त्रालय, स्वीस सरकार विकास सहयोग र होटल एसोसिएसन नेपालसँगको सहकार्यमा वाह अलैंची अभियान थालेको हो । यो अभियान घरेलु तथा व्यावसायिक उपभोक्ता माझ अलैंचीको प्रयोग र उपभोगमा सचेतना अभिवृद्धि गर्नमा केन्द्रित रहेको महासंघको दाबी छ । महासंघका अनुसार यो अभियानले नेपाली घरपरिवारलाई अलैंचीको फाइदा र स्वादबारे जानकारी गराउने लक्ष्य राखेको छ । वाह अलैंची अभियानले अब नेपाली बजार र घरघरमा अलैंचीको प्रयोग र उपभोगलाई प्रवर्द्धन गर्ने महासंघको भनाइ छ ।


प्रकाशित : माघ १५, २०७९ १९:२३
प्रतिक्रिया
पठाउनुहोस्

पर्यटनमन्त्री किरातीले भने- ‘जस्केलाबाट पसेर मलाई प्रलोभन नदिनू’

'पवित्र लुम्बिनी किन अपवित्र ?’
कान्तिपुर संवाददाता

काठमाडौँ — मन्त्रालय मातहतका निकायहरूबारे जानकारी लिने क्रममा रहेका संस्कृति, पर्यटन तथा नागरिक उड्डयनमन्त्री सुदन किरातीले पवित्र लुम्बिनीमा अपवित्र काम हुने गरेको भन्दै आक्रोश व्यक्त गरेका छन् ।

लुम्बिनीको बृहत्तर विकासका लागि ३७ वर्षअघि स्थापना भएको लुम्बिनी विकास कोषका पदाधिकारीहरुसँगको छलफल सकिएपछि आइतबार मन्त्रालयमा आयोजित कार्यक्रममा उनले विश्वले फोटोकपी गर्न नसक्ने लुम्बिनीलाई बदनाम गरिएको भन्दै आक्रोश पोखेका थिए ।

‘राज्यले विश्वास गरेर त्यो क्षेत्रको विकासको लागि पठाएका मान्छेहरुले आफ्नो भूमिकालाई बिर्सेर घिनलाग्दो काममा लिप्त भएका छन्,’ उनले पवित्र भूमि लुम्बिनीमा 'अपवित्र काम किन भइरहेको हो ?’ भन्दै प्रश्न गरेका थिए ।

आफू विदेश भ्रमणमा गएका बेला विदेशीले लुम्बिनी फोहोर भएको गुनासो सुनाएको भन्दै मन्त्री किरातीले लुम्बिनीमा गोबर र फोहोर भरिएको गुनासो आइरहेको बताएका थिए । ‘देश विदेशबाट मानिसहरुले लुम्बिनीलाई छुट्टै हिसावले सोचेका हुन्छन् । विश्वभरका बौद्ध धर्मालम्वीहरुको ढुकढुकी हो । लुम्बिनी सफा छैन । सयौं चौपाया चर्ने गौचरण बनाइएको छ । फोहोर र धुलै धुलो राख्ने ? आज विदेशमा लुम्बिनीको फोहोरको चर्चा चल्ने गरेको छ । मैले लुम्बिनीको फोहोरको चर्चा चीन भम्रणमा सुनेँ । संयोगवश यही मन्त्रालयको मन्त्री बन्न आइपुगेको छ । लुम्बिनी परिसर यथाशीघ्र सफा भएको हुनुपर्छ ।’

उनले कोषका पदाधिकारीलाई विकासका नाममा ‘मागी खाने भाँडो’ मात्रै बनाइएको आरोप लगाए । उनले त्यहाँ कोषले बनाउने योजना दोहोरिने गरेको, एउटा संरचना बनाएपछि त्यसको उपयोग नहुने गरेको, अनमियतता हुने गरेको बताए । उनले अबका दिनमा हरेक कामको तालिका बनाउन र आफूलाई रिपोर्टिङ गर्न कोषका पदाधिकारीहरुलाई निर्देशन दिए ।

कोषको अध्यक्षसमेत रहेका किरातीले त्यहाँ पर्याप्त बजेट भए पनि त्यस अनुसारको विकास नभएको भन्दै असन्तुष्टि व्यक्त गरेका थिए । उनले कोषका पदाधिकारी र कर्मचारीलाई आफूलाई प्रलोभन दिलाउन ‘झ्याल र जस्केला’बाट नछिर्न पनि चेतावनी दिए । ‘कतै झ्याल जस्केलाबाट छिर्ने दुस्साहस नगर्नुहोला । म एउटा किसानको छोरा हो । मलाई लोभ लालच छैन । मन्त्री बन्छु भनेर राजनीति गरेको पनि हैन । म कुनै रबाफ र प्रभावमा पर्नेवाला छैन । हामीलाई कसैले कुनै प्रभावमा पार्ने प्रयत्न तथा दुस्सहास नगर्नु होला ।’

प्रकाशित : माघ १५, २०७९ १९:२१
पूरा पढ्नुहोस्
प्रतिक्रिया
पठाउनुहोस्
×