नेपाल लाइफ इन्स्योरेन्सको १५.७८ प्रतिशत लाभांश पारित - बजार - कान्तिपुर समाचार

नेपाल लाइफ इन्स्योरेन्सको १५.७८ प्रतिशत लाभांश पारित 

कान्तिपुर संवाददाता

काठमाडौँ — नेपाल लाइफ इन्स्योरेन्सको वार्षिक साधारणसभाले आर्थिक वर्ष २०७७/७८ को वितरणयोग्य मुनाफाबाट चुक्ता पुँजीको १५.७८९५ प्रतिशतका दरले हुन आउने १ अर्ब २९ करोड रुपैयाँ बराबरको नगद लाभांश (लाभांश कर समेत) दिने प्रस्ताव सर्वसम्मतिले पारित गरेको छ ।

त्यस्तै कम्पनीले आर्थिक वर्ष २०७८/७९ को लागि एसएआर एसोसिएट्सलाई लेखापरीक्षकको रुपमा पुनर्नियुक्ति गर्दै संचालक समितिले गरेको स्वतन्त्र संचालक पारुल ढकालको नियुक्तिलाई अनुमोदन गरेको छ । बिहीबार कम्पनीका सञ्चालक समितिका अध्यक्ष गोविन्दलाल संघईको अध्यक्षतामा वीरगन्जमा साधारणसभा सम्पन्न भएको हो ।

साधारणसभाबाट आर्थिक वर्ष २०७७/७८ को वार्षिक प्रतिवेदन छलफल गरी पारित भएको छ । लेखापरीक्षकको प्रतिवेदन सहित आ.व.२०७७/७८ को वासलात, नाफा–नोक्सान हिसाव र सोही अवधिको नगद प्रवाह विवरण लगायतका वित्तीय विवरण उपर छलफल गरी स्वीकृत गरिएको छ ।

कार्यक्रममा कम्पनीका प्रमुख कार्यकारी अधिकृत प्रवीण रमण पराजुलीले कम्पनीको व्यवसाय वृद्धिमा दत्तचित्तका साथ काम गरिरहेको र कम्पनीले नेपाल बीमा प्राधिकरणबाट जारी लगानी निर्देशिकाको परिधिभित्र रही दिगो तथा भरपर्दो लगानीका क्षेत्रहरुमा लगानी विस्तार तथा विविधीकरण गर्दै जाने बताए । नेपाल लाइफले २०७९ असोज मसान्तसम्ममा लगानी १ खर्ब ४९ अर्ब ७६ करोड पुगेको छ । जीवन बीमाकोषमा १ खर्ब ४२ अर्ब ९ करोड सञ्चित भएको कम्पनीले जनाएको छ ।

प्रकाशित : मंसिर ९, २०७९ १३:३०
प्रतिक्रिया
पठाउनुहोस्

बाजुरा घटनामा मानव अधिकार आयोगले थाल्यो अनुसन्धान

कान्तिपुर संवाददाता

काठमाडौँ — राष्ट्रिय मानव अधिकार आयोगले प्रतिनिधिसभा र प्रदेशसभा सदस्य निर्वाचनको क्रममा बाजुरामा दुई जनाको ज्यान जाने गरी भएका घटनामा अनुसन्धान थालेको छ । आयोगले घटनाको विषयमा स्थलगत छानबिन तथा अनुसन्धान गर्न आयोगका उपसचिवको नेतृत्वमा छानबिन तथा अनुसन्धान गर्न टोली परिचालन गरेको हो ।

मंसिर ४ गते निर्वाचनको क्रममा बाजुरामा विवाद हुँदा दुई जनाको ज्यान गएको थियो । आयोगका प्रवक्ता टीकाराम पोखरेलले आयोगले घटनाको विषयमा छानबिन गर्न टोली पठाएको जानकारी गराउँदै अनुसन्धानमा सहयोग पुर्‍याउन सबै राजनीतिक दल र सरोकारवालाहरूलाई आग्रह गरेका छन् ।

मंसिर ४ गते मतदानको दिन त्रिवेणी नगरपालिका–७ स्थित दम्था मतदानस्थलमा एक जना स्थानीयले मतपेटिका खोस्न खोज्दा उत्पन्न विवादपछि झडप हुँदा प्रहरीले फायरिङ गरेको थियो ।

त्यसक्रममा सुरक्षाकर्मीले चलाएको गोली लागेर सञ्जिव अएडीको मृत्यु भएको थियो भने चेतन अएडीको उपचारका लागि जिल्ला अस्पताल लैजाने क्रममा मृत्यु भएको थियो । त्यहाा मतदान रोकिएपछि अहिलेसम्म पनि पुनः मतदान हुनसकेको छैन ।

प्रकाशित : मंसिर ९, २०७९ १३:२९
पूरा पढ्नुहोस्
प्रतिक्रिया
पठाउनुहोस्
×