बीवाइडीले बनायो ३० लाख ‘न्यू इनर्जी भेहिकल’- बजार - कान्तिपुर समाचार
कान्तिपुर वेबसाईट
AdvertisementAdvertisement

बीवाइडीले बनायो ३० लाख ‘न्यू इनर्जी भेहिकल’

कान्तिपुर संवाददाता

काठमाडौँ — गत हप्ता बीवाइडी कम्पनीले न्यू इनर्जी भेहिकल उत्पादन ३० लाख युनिट पूरा गरेको छ । चिनियाँ ग्लोवल ब्राण्ड बीवाइडीले  आफ्नो हेडक्वार्टर सान्जेन चाइनामा ३० लाख युनिट 'रोलआउट' गरेको  खुसियालीमा विशेष कार्यक्रम आयोजना गरेको थियो । 

बीवाइडीले न्यू इनर्जी भेहिकलको क्षेत्रमा ३० लाख युनिट विश्वकै लागि ठूलो उपलब्धिको संकेत भएको जनाएको छ । चिनियाँ निर्माताले पहिलो १० लाख युनिट कार उत्पादन गर्न झण्डै १३ वर्ष लागेको थियो । त्यसपछिको अर्को १० लाख युनिट एक वर्षमा पुरा गरेको कम्पनीले अन्तिम १० लाख युनिट उत्पादन र बिक्री ६ महिनामा पूरा गरेको हो । कम्पनीले पछिल्ला १८ महिनामा २० लाख युनिट कार उत्पादन गरेर बजारमा पठाएको छ । यो उत्पादन र बिक्री आँकडाबाट न्यू इनर्जी भेहिकलको बढोत्तरीलाई पुष्टि गर्छ ।


प्रकाशित : मंसिर ८, २०७९ १३:२३
प्रतिक्रिया
पठाउनुहोस्

एमाले र माओवादीका महासचिव पराजित 

जयसिंह महरा

काठमाडौँ — कम्युनिस्ट पार्टिभित्र व्यवस्थापकीय र सांगठनिक हिसाबले शक्तिशाली मानिने पदमा रहेका एमाले र माओवादीका महासचिव संसदीय निर्वाचनमा पराजित भएका छन् । एमालेका महासिचव शंकर पोखरेल दाङ २ मा माओवादी केन्द्रकी रेखा शर्मासँग पराजित भए । लमजुङमा माओवादीका महासचिव देवप्रसाद गुरुङ एमालेका उपमहासचिव पृथ्वीसुब्बा गुरुङसँग पराजित भएका हुन् ।

गतवर्ष भएका एमाले र माओवादीका महाधिवेशनबाट महासचिवको रूपमा उदाएका दुवै नेताले संसदीय चुनावमा भने हार बेहोरेका हुन् ।

दाङमा एमालेका महासचिव पोखरेललाई माओवादीकी शर्माले १ सय ९६ मतको अन्तरले पराजित गरेकी हुन् । शर्माले २६ हजार ८ सय ७७ मत प्राप्त गर्दा एमाले महासचिव पोखरेलले २६ हजार ६ सय ८१ मतमात्रै प्राप्त गरेका थिए ।

उता लमजुङमा एमाले उपमहासचिव गुरुङले ३४ हजार ९ सय ६९ मत प्राप्त गरेर जित हासिल गर्दा माओवादी महासचिव गुरुङ ३ हजार १ सय ८८ मतान्तरले पराजित भए । माओवादी महासचिव गुरुङले ३१ हजार ७ सय ८१ मतमात्रै ल्याएका थिए ।

एमाले महासचिव पोखरेल यसअघि लुम्बिनी प्रदेशका मुख्यमन्त्री थिए । माओवादी महासिचव गुरुङ भने माओवादीको प्रमुख सचेतकको रूपमा संघीय संसदमा सक्रिय थिए ।

एमाले अध्यक्ष केपी शर्मा ओली र माओवादी अध्यक्ष पुष्पकमल दाहालले आफूपछिको नेतृत्व लिनसक्ने नेताको रूपमा गत वर्षका महाधिवेशनबाट पोखरेल र गुरुङलाई आ-आफ्नै जोडबल र रुचीमा पार्टीको भूमिकामा बढोत्तरी गरेका थिए ।

महाधिवेशन प्रतिनिधिहरूले प्रत्यक्ष निर्वाचित गर्ने अवसर नदिई ओली र दाहालले आफ्नै तजबिजीमा उनीहरूलाई पदमा पुर्‍याएका थिए । प्रक्रिया पूरा गर्नका लागि मात्रै एमालेको महाधिवेशनमा निर्वाचनको औपचारिकता निभाइएको थियो । सौराहामा भएको महाधिवेशनमा अध्यक्षद्वारा प्रस्तुत पदाधिकारी र केन्द्रीय सदस्यको नामावलीलाई हलले निर्वाचित गरेको थियो ।

माओवादीमा भने त्यति औ‍पचारिकता पनि पूरा गरिएको थिएन । राष्ट्रिय सम्मेलन भनी प्रतिनिधिलाई काठमाडौं बोलाएर प्रज्ञाप्रतिष्ठानमा सम्मेलन सुरु हुनु केही घण्टा पहिला मात्रै महाधिवेशनमा परिणत गर्दै अध्यक्ष बाहेकका पदाधिकारीबिनाको केन्द्रीय कमिटी चयन गरिएको थियो । पदाधिकारी चयन गर्ने जिम्मा आफ्नो हातमा लिएर अध्यक्ष दाहालले ९ महिनापछि गत भदौमा गुरुङलाई महासचिवको जिम्मेवारी दिएका थिए । उनलाई जिम्मेवारी दिनुअघि पार्टीभित्र अन्य नेताहरूबीच महासचिवका लागि चर्को प्रतिस्पर्धा थियो । यो निर्णयमा असन्तुष्टि जनाउँदै महासचिवका आकांक्षी नेता जनार्दन शर्माले असहमति राखेका थिए ।

त्यस्तै, एमालेमा पनि पोखरेललाई महासचिव बनाएकोमा पार्टीभित्र असन्तुष्टि थियो । महाधिवेशनका बेला नेता विष्णु पौडेलले उक्त पदमा आकांक्षा राखेका थिए । पोखरेल कि पौडेललाई महासचिव बनाउने भन्ने विषयले पार्टीभित्र छद्म अन्तरविरोध सिर्जना गरेको थियो । तर दुवै नेता अध्यक्ष ओली निकट भएकाले बाहिर देखिने गरी ठूलो असहमति प्रकट भएन । पौडेल उपाध्यक्ष बन्न राजी भएपछि पोखरेललाई महासचिव बन्न सहज भएको थियो ।

लुम्बिनी प्रदेशको राजधानी सार्ने विषयले पनि दुई नेताबीच ठूलो विवाद थियो । त्यसबेला पोखरेल मुख्यमन्त्री भएकाले लुम्बिनी प्रदेशको राजधानी आफ्नै गृहजिल्ला दाङ लैजाने निर्णय प्रदेशसभाबाट गराएका थिए । जुन निर्णय रोक्नका लागि पौडेलले पार्टीभित्र र बाहिर तीव्र लबिइङ गरेका थिए । त्यो विषयलाई लिएर लुम्बिनी प्रदेशभित्र पौडेल र पोखरेलको आन्तरिक मनमुटाव छरपष्ट भएको थियो । उक्त विषयलाई लिएर यसपटक निर्वाचन प्रचारप्रसारका क्रममै पौडेल र पोखरेलबीच परस्पर विरोधी अभिव्यक्ति आएका थिए । पौडेलले दाङबाट राजधानी बुटवल ल्याउने अभिव्यक्ति दिइँरहँदा पोखरेलले एकपटक दाङ आइसकेको राजधानी कसैले पनि फिर्ता लान नसक्ने भन्दै अभिव्यक्ति दिएका थिए ।

महासचिव गुरुङ यसअघि एमाले र माओवादीको वाम गठबन्धनको बलमा लमजुङबाट निर्वाचित भएका थिए । त्यसबेला उनका चुनावी सारथीको रूपमा गण्डकी प्रदेशसभा सदस्यमा एमालेका पृथ्वीसुब्बा गुरुङ पनि उम्मेदवार थिए । त्यसपटक दुवैले जितेका थिए । एमालेका गुरुङ गण्डकीको मुख्यमन्त्री भए । माओवादीका गुरुङ २०७० सालको चुनावमा मोहन वैद्य नेतृत्वको माओवादीमा लागेर निर्वाचन बहिष्कारमा लागेका थिए ।

प्रकाशित : मंसिर ८, २०७९ १३:१८
पूरा पढ्नुहोस्
प्रतिक्रिया
पठाउनुहोस्
x
×