नबिलको पहिलो शाखारहित बैंकिङ सेवा सुर्खेतमा- बजार - कान्तिपुर समाचार

नबिलको पहिलो शाखारहित बैंकिङ सेवा सुर्खेतमा

कान्तिपुर संवाददाता

काठमाडौँ — नबिल बैंकले सुर्खेतको बराहताल गाँउपालिका-२, रानीघाटमा पहिलो शाखारहित बैंकिङ सेवा सञ्चालनमा ल्याएको छ । गाँउपालिकाका अध्यक्ष भीमबहादुर भण्डारी र नबिल बैंकका वरिष्ठ नायब प्रमुख कार्यकारी अधिकृत सुजित कुमार शाक्यले शाखारहित बैंकिङ सेवाका प्रतिनिधि मनोज कुमार थापालाई बीएलबी मसिन र प्रमाणपत्र हस्तान्तरण गरेर शाखारहित बैंकिङ सेवाको सुरुवात गरिएको थियो ।

शाखारहित बैंकिङ सेवामार्फत खाता खोल्न, खातामा नगद जम्मा तथा भुक्तानी गर्न, रकमान्तर गर्न, ग्राहकको खातामा रहेको रकमको सोधपुछका साथै कारोबारको संक्षिप्त विवरण हेर्न, विप्रेषण भुक्तानी गर्न, कर्जा रकम भुक्तानी गर्न तथा किस्ता रकम जम्मा गर्न सकिने बै‌ंकले जनाएको छ । यसका साथै नबिल बैंकले सुर्खेतको वीरेन्द्रनगर नगरपालिकामा डिजिटल बैंकिङ तथा वित्तीय पहुँचसम्बन्धी जानकारीमूलक कार्यक्रम सम्पन्न गरेको छ । उक्त कार्यक्रम विशेषत: स्थानीय क्षेत्रको कृषि प्रवद्धन, युवा तथा महिला उद्यमशिलता, डिजिटल बैंकिङ र वित्तीय साक्षरता विषयमा केन्द्रित थियो । नेपाल सरकारले अवलम्बन गरेको दिगो विकासको लक्ष्यलाई सघाउन २०७८ असार १५ गते धान दिवसको दिन नबिलले दिगो बैंकिङको सुरुवात गरेको हो । सुरुमा १७ वटा शाखाबाट सुरु गरेको दिगो बैंकिङ हाल १०० शाखामा विस्तार भएको छ ।

प्रकाशित : आश्विन १०, २०७९ १७:०७
प्रतिक्रिया
पठाउनुहोस्

अध्यक्ष राई र पूर्वमन्त्री अन्सारीपत्नी पनि जसपा समानुपातिक सूचीमा

कान्तिपुर संवाददाता

काठमाडौँ — आगामी मंसिरमा हुने आमनिर्वाचनका लागि जनता समाजवादी पार्टीले संघीय परिषद् अध्यक्ष अशोक राईकी श्रीमती सुशीला श्रेष्ठ र पूर्वमन्त्री असिम मियाँ अन्सारीकी श्रीमती हसिना खानसहितको नाम समानुपातिक उम्मेदवारमा सिफारिस गरेको छ ।

जसपाले उनीहरूसहित ११० जनाकै नाम सिफारिस गरेको हो । एमालेबाट तत्कालीन संविधानसभा निर्वाचनमा प्रतिस्पर्धा गरेकी रञ्जु ठाकुर पनि यसपटक जसपाबाट प्रतिनिधिसभामा समानुपातिक उम्मेदवारको सिफारिसमा परेकी छन् ।

यस क्रममा जसपाले सुशीला श्रेष्ठ, रेखा यादव थापा क्षेत्री, सहनाज रहनाम, मञ्जु शर्मा, हसिना खान, प्रकाश अधिकारी, युवराज कार्की, रनध्वज कन्दङ्वा लिम्बू, शिवलाल थापालगायतका नाम समानुपातिक उम्मेदवारको रुपमा सिफारिस गरेको जसपाका एक नेताले जानकारी दिए ।

निर्वाचन आयोगले असोज २ र ३ गते सबै दललाई समानुपातिक उम्मेदवारको बन्दसूची पठाउन समय अवधि दिएको थियो ।

प्रकाशित : आश्विन १०, २०७९ १७:०७
पूरा पढ्नुहोस्
प्रतिक्रिया
पठाउनुहोस्
×