भृकुटीमण्डपमा सुरु भयो स्टक क्लियरेन्स मेला- बजार - कान्तिपुर समाचार
कान्तिपुर वेबसाईट
AdvertisementAdvertisement

भृकुटीमण्डपमा सुरु भयो स्टक क्लियरेन्स मेला

कान्तिपुर संवाददाता

काठमाडौँ — दशैंका लागि एकै छानामुनी किनमेल गर्न सक्नेगरी काठमाडौंको भृकुटीमण्डपमा डीजी पे स्टक क्लियरेन्स मेला ‘ग्राण्ड सेल’ सुरु भएको छ । दशैंका लागि सस्तो मूल्यमा वस्तु तथा सेवा एकै छानामुनी उपलब्ध गराउने उद्देश्यका साथ इभेन्ट सोलुसन प्रालिले मेला सञ्चालन गरेको हो ।

मेलामा दैनिक उपभोग्य सामानहरू सस्तोमा उपलब्ध हुने इभेन्ट सोलुसनका प्रबन्ध निर्देशक विजय सागर प्रधानले जानकारी दिए । ‘मेलामा कपडा, जुत्ता, ह्याण्डीक्राफ्ट, इलेक्ट्रोनिक्स, मोटरसाइकलर होम अप्लाइन्सेज लगायतका स्टल छन्,’ उनले भने, ‘बजारको तुलनामा सस्तोमा स्वदेशी तथा विदेशी ब्राण्डका सामान खरिद गर्न सकिन्छ ।’ मेलामा नेपाल, भारत, चीन, बाङ्लादेश, पाकिस्तान, मलेसिया, जापान र युरोपेली मुलुकमा उत्पादित सामानहरू उपलब्ध रहेको उनले बताए । त्यहाँ १ वटा प्रदर्शनी कक्ष छन् ।

प्रधानका अनुसार मेलामा सामान खरिद गर्ने ग्राहकले डीजी पेमार्फत भुक्तानी गर्दा ५० प्रतिशतसम्म दशैं विशेष छुट पाउनेछन् । वर्षेनी आयोजना हुँदै आएको एक्स्पोलाई यस पटक निरन्तरता दिँदै ‘दशैंको बेला सस्तो मेला’ नाम दिइएको प्रधानले बताए । असोज ७ गते सुरु भएको मेला १० गतेसम्म चल्नेछ । बिहान १० देखि साँझ ६ बजेसम्म चल्ने मेलामा ५० हजार उपभोक्ता आउने अपेक्षा गरिएको छ ।

प्रकाशित : आश्विन ८, २०७९ १३:०१
प्रतिक्रिया
पठाउनुहोस्

राजनीति केन्द्रबाट सञ्चालित हुँदासम्म संघीयताको चाहना पूरा हुँदैन : रिजाल

कान्तिपुर संवाददाता

विराटनगर — नेपाली कांग्रेसका नेता मिनेन्द्र रिजालले राजनीति केन्द्रबाट सञ्चालित हुँदासम्म संघीयताको चाहना पूरा नहुने बताएका छन् । उनले प्रदेशले आफ्नै खुट्टामा उभिन सक्ने अवस्था सिर्जना नभएसम्म प्रदेश सरकारको सन्दर्भमा समस्याहरू उत्पन्न भइरहने बताएका छन् ।

कान्तिपुर मिडिया ग्रुपले विराटनगरमा गरेको ‘उज्यालो पूर्व’ कार्यक्रमको पहिलो सत्र ‘प्रदेशको परीक्षा’ मा बोल्दै नेता रिजालले प्रदेश १ को पहिचान अन्य प्रदेशहरूभन्दा भिन्न भए पनि त्यसलाई प्रदेश सरकारले अवलम्बन गर्न नसकिरहेको बताए ।

‘हामीले यो पाँच वर्षसम्म जे गर्‍यौँ, केन्द्रको सरकार अलिकति हल्लिनेबित्तिकै प्रदेशका सरकारहरू पनि हल्लिए । केन्द्रको सरकार फेरिँदा प्रदेश सरकार पनि फेरिए । त्यसरी फेरिने अवस्था रहँदासम्म केन्द्रसँग छुट्टिएर आफूलाई पुष्टि गरेर कुन प्रदेशले आफ्नो अलग्गै पहिचान बनाउन सक्ला र ?,’ रिजालले प्रश्न गर्दै अघि भने, ‘यहीकारण हो अहिले प्रदेश १ ले नामसमेत राख्न नसकेको । हामी एउटा गाउँको वडाध्यक्ष कसलाई बनाउने भनेर माथिबाट निर्णय गरिरहेका छौँ । त्यसैले जबसम्म राजनीति केन्द्रबाट सञ्चालित हुन्छ, तबसम्म न संघीयताको चाहना पूरा हुन्छ, न विकास र समृद्धिको चाहना नै पूरा हुन्छ ।’

उनले राजनीतिक दलले माथिबाट चलाउने कुरालाई अन्त्य गर्नुपर्ने बताए । ‘हाम्रो प्रदेश माथि ताप्लेजुङदेखि, सोलुखुम्बुदेखि तल केचनाकवलसम्म छ, यो प्रदेशले बेग्लै चरित्र समातेर रहेको छ । एउटा जातलाई मात्रै समातेर प्रदेशको पहिचान हुन सक्दैन,’ उनले भने, ‘यसको पहिचान अरु प्रदेशहरूभन्दा निकै फराकिलो छ । हामीले यसलाई हामीले बुझ्न जरुरी छ ।’

उनले संघीयता बलियो बनाउन प्रदेश सरकारहरू आर्थिक रुपमा सबल हुनुपर्ने बताए ।

‘जुन देशको राजस्वको ४० प्रतिशत रकम भन्सार विन्दुमा जम्मा हुन्छ भने त्यो देशका प्रदेशले के गर्ने ? प्रदेशले मेरो नाकामा आएको भन्सार जति सबै मेरो भन्नु पर्‍यो, होइन भने कसरी आर्थिकरुपमा सबल बन्न सम्भव छ ?,’ रिजालले भने, ‘त्यसैले सबैभन्दा पहिले त हामीले प्रदेशले आफ्नो खट्टामा आफैँ उभिन सक्ने अवस्था सिर्जना गर्नैपर्छ ।’

प्रकाशित : आश्विन ८, २०७९ १२:५५
पूरा पढ्नुहोस्
प्रतिक्रिया
पठाउनुहोस्
×