सानिमा बैंकको शैक्षिक छात्रवृत्तिको लागि आवेदन खुल्यो- बजार - कान्तिपुर समाचार

सानिमा बैंकको शैक्षिक छात्रवृत्तिको लागि आवेदन खुल्यो

कान्तिपुर संवाददाता

काठमाडौँ — सानिमा बैंकले उच्च माध्यमिक तह (प्लस टु) अध्ययन गर्नका लागि काठमाडाैं उपत्यका बाहिरका शाखाहरुबाट छात्रवृत्ति आवेदन खुला गरेको छ । उक्त छात्रवृत्ति अन्तर्गत शैक्षिक शुल्क, शैक्षिक सामग्री र नगदवृत्ति प्रतिमहिना २ हजार गरी प्रत्येक विद्यार्थीलाई ५० हजारसम्मको छात्रवृत्ति प्रदान गरिने बैंकले जनाएको छ  ।

छात्रवृत्ति आवेदन २०७९ भदौ ३१ गतेसम्म दिन सकिनेछ । यस छात्रवृत्ति सम्बन्धी विस्तृत जानकारी बैंकको वेबसाइट (नोटिस)मा उपलब्ध छ । बैंकले विगत लामो समयदेखि काठमाडौं उपत्यका बाहिरका प्रत्येक शाखाहरुबाट कक्षा ११ र १२ का लागि २–२ जना विद्यार्थीलाई विद्यार्थीकै रोजाइको शैक्षिक संस्था र विषयमा उच्च शिक्षा हासिल गर्न छात्रवृत्ति प्रदान गर्दै आइरहेको छ । सोही कार्यक्रमलाई यस पटक बैंकले निरन्तरता दिएको हो ।

संस्थागत सामाजिक उत्तरदायित्वलाई बहन गर्ने क्रममा शिक्षा, स्वास्थ्य लगायतका क्षेत्रहरुमा विपन्न वर्गका जनतालाई प्रत्यक्ष फाइदा हुने गरी कार्यक्रम संचालन गर्दै आइरहेको यस बैंककाे देशभर १२७ वटा कार्यालय तथा १२० वटा एटीएम सञ्चालनमा छन् ।


प्रकाशित : श्रावण २३, २०७९ १४:१९
प्रतिक्रिया
पठाउनुहोस्

पूर्वाधार विकास कार्यालय रौतहटका तत्कालीन प्रमुखविरुद्ध भ्रष्टाचार मुद्दा दायर

कान्तिपुर संवाददाता

काठमाडौँ — अख्तियार दुरुपयोग अनुसन्धान आयोगले पूर्वाधार विकास कार्यालय रौतहटका तत्कालीन निमित्त कार्यालय प्रमुख इन्जिनियर शिवजीप्रसाद रायसहित ५ जनाविरुद्ध विशेष अदालत काठमाडौंमा मु्द्दा दायर गरेको छ ।

प्रदेश सरकार भौतिक पूर्वाधार विकास मन्त्रालयबाट रकम निकासा गरी हिनामिना गरेको आरोपमा उनीहरूविरुद्ध मुद्दा दायर गरिएको हो । आयोगले इन्जिनियर रायसहित इन्जिनियर रामकिशोर साह‚ सब-इन्जिनियर प्रेमचन्द्र झाविरुद्ध विशेष अदालतमा मुद्दा दायर गरेको हो ।

आर्थिक वर्ष २०७५/०७६ मा रामवन गोटदेखि मलघट्टा हुँदै महिनाथपुर नहरसम्म ग्राभेलस्तरको सडक निर्माण गर्ने क्रममा गलत नापी किताब, भुक्तानी बिल र कार्य सम्पन्न प्रतिवेदन स्वीकृत गरी भुक्तानीसमेत दिई १६ लाख ५९ हजार ९ सय ७२ रुपैयाँ हिनामिना गरेको आरोपमा उनीहरूमाथि मुद्दा दायर गरेको अख्तियारले उल्लेख गरेको छ ।

उनीहरूविरुद्ध १६ लाख १६ लाख ५९ हजार ९ सय ७२ रुपैयाँ बिगो कायम गरी मुद्दा दायर गरिएको हो ।

त्यस्तै पूर्वाधार विकास कार्यालय रौतहटका लेखा अधिकृत महम्मद दाउद र सडक मर्मत तथा ग्राभेल निर्माण कार्य उपभोक्ता समितिका अध्यक्ष राजकुमार महतोविरुद्ध पनि अदालतमा भ्रष्टाचार मुद्दा दायर गरिएको छ ।

प्रकाशित : श्रावण २३, २०७९ १४:०६
पूरा पढ्नुहोस्
प्रतिक्रिया
पठाउनुहोस्
×