सिटिजन्स बैंकको चिरायु मुद्दती योजना, १० गुणासम्म प्रतिफल
काठमाडौँ — सिटिजन्स बैंकले मुद्दती निक्षेपको १० गुणासम्म प्रतिफल पाउनेगरी आकर्षक चिरायु मुद्दती योजना संचालनमा ल्याएको छ । चितवनमा आयोजित एक कार्यक्रममा बैंकका प्रमुख कार्यकारी अधिकृत गणेशराज पोखरेले यो योजना सुरुवात भएको घोषणा गरे ।
सिटिजन्स चिरायु मुद्दती योजनाअन्तर्गत ग्राहकले जम्मा भएको रकममा १३ वर्ष ४ महिनादेखि २२ वर्ष १ महिनासम्म एकमुष्ठ रुपमा चार गुणादेखि १० गुणासम्म निक्षेप रकम फिर्ता पाउने छन् । रेमिट्यान्स चिरायु मुद्दती योजनाअन्तर्गत ग्राहकले १२ वर्ष ३ महिनादेखि २० वर्ष ३ महिनासम्म एकमुष्ठ रुपमा चार गुणादेखि १० गुणासम्म निक्षेप रकम फिर्ता पाउने बैंकले जनाएकाे छ।
कुनै पनि शाखामार्फत न्यूनतम पचास हजार रुपैयाँ मौज्दातमा यी खाता खोल्न सकिने बैंकले जनाएको छ । यसैबीच बैंकले आफ्नो वेबसाइटमार्फत स्मार्ट सर्भिसेज सेवा समेत थालेको छ । यस सेवाअन्तर्गत बैंकको वेबसाइट मार्फत नै विभिन्न कार्डसम्बन्धी सेवाहरु, मोबाइल/ईबैंकिङ, सेयर तथा क्यूआर सम्बन्धी सेवाहरु प्राप्त गर्न सक्नेछन् । बैंकका देशभर १८० वटा शाखा संचालनमा छन् ।