अब ईसेवामार्फत होटल बुक गर्न सकिने- बजार - कान्तिपुर समाचार

अब ईसेवामार्फत होटल बुक गर्न सकिने

कान्तिपुर संवाददाता

काठमाडौँ — ईसेवाले अनलाइनबाटै होटल बुक गर्न सकिने सेवा थालेको छ । योसँगै अबदेखि ग्राहकले सहजै ईसेवामार्फत होटल बुक गर्न सक्ने छन् । ग्राहकले ईसेवा एपमार्फत नेपालका कुनै पनि क्षेत्रका होटल बुक गर्न सक्नेछन् । ईसेवामा हाल होटलहरु सूचीकरण गर्ने कार्य भइरहेको कम्पनीले जनाएको छ ।

ईसेवामा भएका होटलहरुको सूची ईसेवा होटल डटकममा गएर हेर्न सकिनेछ । ईसेवा मार्फत शुक्रबार साँझ ६ बजेसम्म होटल बुक गरेमा ५० प्रतिशत छुटको व्यवस्था समेत रहेको कम्पनीले जनाएको छ । हाल यो सेवा एण्ड्रोइड मोबाइलमा मात्र उपलब्ध भएपनि केही दिनमा आईओएसमा समेत उपलब्ध हुने बताइएको छ ।

होटल सेवा सुरु भएसँगै ईसेवाका होटल विभाग प्रमुख अनुज विष्टले विविध सेवालाई एकै ठाउँमा ल्याएर डिजिटल नेपाल र कारोबारलाई बढवा दिने उद्देश्य रहेको बताए । यसले पर्यटन क्षेत्रको मन्दीलाई न्यूनीकरण गर्न समेत टेवा पुर्‍याउने उनको भनाइ छ । ‘भविष्यमा अन्तर्राष्ट्रिय होटलसँग पनि सहकार्य गरी अन्तर्राष्ट्रिय प्रयोगकर्ता र यहाँबाट बाहिर जाने व्यक्तिहरुलाई अनलाइनबाटै होटल बुक गर्ने व्यवस्था मिलाउनेछौं’ उनले भने ।

ईसेवाबाट इन्स्योरेन्सको प्रिमियम भुक्तानी, इन्टरनेट, बिजुली तथा खानेपानीको महशुल भुक्तानी, मोबाइल, टेलिफोन रिचार्ज तथा टपअप, हवाई जहाज, बसको टिकट, स्कुल कलेजको शुल्क लगायतका सेवाहरूको शुल्क भुक्तानी गर्न सकिन्छ । ईसेवामा हाल ५२ वटा बैंक तथा वित्तीय संस्था सदस्य छन् ।


प्रकाशित : श्रावण २०, २०७९ १४:३३
प्रतिक्रिया
पठाउनुहोस्

जंगली हात्तीको आक्रमणबाट एक महिलाकाे मृत्यु

कान्तिपुर संवाददाता

चितवन — जंगली हात्तीले आक्रमण गर्दा चितवनमा शुक्रबार एक जना महिलाकाे मृत्यु भएको छ ।

चितवन जिल्ला प्रहरी कार्यालयका प्रवक्ता डीएसपी नरहरि अधिकारीले भरतपुर महानगरपालिका-६ देवनगरकी ५१ वर्षीया माया विकलाई घाँस काट्न जंगल गएको बेलामा जंगली हात्तीले आक्रमण गर्दा मृत्यु भएकाे जानकारी प्राप्त भएकाे बताए ।

चितवन निकुञ्जकाे बरण्डाभार मध्यवर्ती उपभाेक्ता समितिका उपाध्यक्ष देवराज सापकाेटाका अनुसार दक्षिणकाली मध्यवर्ती सामुदायिक वनमा घाँस काट्न जाँदा यस्तो घटना भएकाे हाे ।

चितवन निकुञ्ज आसपासमा राेनाल्डाे, ध्रुबे, गाेविन्दे नाम गरेका जंगली भाले हात्तीहरू डुल्ने र बेलाबेला स्थानीयलाई पनि आक्रमण गर्ने गरेका छन् ।

देवनगर क्षेत्रका बस्तीमा भने पछिल्लो समय हात्तीकाे कुनै गतिविधि नदेखिएकाे तर अचानक यस्ताे घटना भएकाे उपाध्यक्ष सापकाेटाले बताए । स्थानीयहरूका अनुसार दिउँसाे १ बजेतिर विकलाई हात्तीले आक्रमण गरेको थियाे ।

निकुञ्ज आसपासमा वन्यजन्तुले आक्रमण गर्ने र स्थानीयकाे ज्यान जाने घटना बर्सेनि हुन्छन् । अघिल्लाे आर्थिक वर्षमा वन्यजन्तुकाे आक्रमणमा परेर चितवन निकुञ्जकाे मध्यवर्ती क्षेत्रमा २४ जनाकाे मृत्यु भएकाे थियाे । तिमध्ये १६ जनालाई बाघले, पाँच जनालाई गैंडाले र तीन जनालाई जंगली हात्तीले आक्रमण गरेकाे निकुञ्ज कार्यालयले जनाएकाे छ । याे आर्थिक वर्षमा वन्यजन्तु आक्रमणमा परेर स्थानीयकाे मृत्यु भएकाे याे पहिलाे घटना हाे ।

प्रकाशित : श्रावण २०, २०७९ १४:१७
पूरा पढ्नुहोस्
प्रतिक्रिया
पठाउनुहोस्
×