उपाय सिटी कार्गोले थाल्यो 'फुलफिल्मेन्ट' सर्भिस - बजार - कान्तिपुर समाचार

उपाय सिटी कार्गोले थाल्यो 'फुलफिल्मेन्ट' सर्भिस 

कान्तिपुर संवाददाता

काठमाडौँ — उपाय सिटी कार्गोले 'फुलफिल्मेन्ट' सर्भिस थालेको छ । ‘उपाय अन डिमाण्ड’ र ‘मेरो उपाय’जस्ता सेवाहरुको सफलतापछि तेस्रो सर्भिसको रुपमा 'फुलमेन्ट' ल्याइएको कम्पनीले जनाएको छ । कम्पनीका अनुसार ‘फुलफिल्मेन्ट सर्भिस’ अन्तर्गत एकैसाथ धेरै ठाउँमा सामान डेलिभरी गर्न सकिन्छ ।

यो सेवा प्रदान गर्न रुट प्लानिङ सिस्टमको प्रयोग गरिने र यसले ढुवानीमा लाग्ने समय तथा पैसा दुबैको बचत हुन गई ग्राहकलाई फाइदा हुने कम्पनीको दाबी छ । हाल उपायको 'फुलफिल्मेन्ट' सर्भिसले काठमाडौंमा साना वस्तुहरूको लागि डेलिभरी सेवाहरू प्रदान गरिरहेको छ । आगामी दिनमा नेपालका ३०० सहरमा आफ्नो डेलिभरी सेवा पुर्‍याउने योजना रहेको उपाय सिटी कार्गोका एमडी सुमन रायमाझीले बताए ।


प्रकाशित : श्रावण १९, २०७९ १७:१४
प्रतिक्रिया
पठाउनुहोस्

उम्मेदवारी दिएपछि सांसदको पद स्वतः सकिन्छ :  प्रमुख निर्वाचन आयुक्त

कान्तिपुर संवाददाता

काठमाडौँ — प्रमुख निर्वाचन आयुक्त दिनेश थपलियाले प्रतिनिधिसभा सदस्य र प्रदेश सभा सदस्यको पद उम्मेदवारी दर्ता गरेसँगै सकिने बताएका छन् । उनले त्यसको कानुनी व्याख्या गरेर आयोगले सार्वजनिक गर्न पनि बताएका छन् । 

मंसिर ४ गतेका लागि निर्वाचन मिति तोकिएपछि आयोगको तर्फबाट बिहीबार पत्रकार सम्मेलन आयोजना गरेर प्रमुख निर्वाचन आयुक्त थपलियाले सबै उम्मेदवारका लागि समान प्रतिस्पर्धाको वातावरण बनाउनका लागि बहालवाला सांसदको पदावधिबारे टुंगो लगाइने बताएका हुन् ।

'आयोगले निर्वाचनमा सबै उम्मेदवारप्रति समान अवसर र समान खेल मैदानको अवसर उपलब्ध गराउनेछ । प्रतिनिधिसभा र प्रदेश सभाको पदमा उम्मेदवारी दिएपछि, दसैंलगत्तै उम्मेदवारी दर्ता गर्नुपर्ने गरी मिति तय गर्नुपर्ने देखिन्छ, उम्मेदवारी दिएपछि निजहरूको पद स्वतः सकिएको मानिनुपर्छ भन्ने आयोगको धारणा छ । कानुनसम्मत ढंगले व्याख्या गरेर अगाडि बढाउँछौं,' उनले भने ।

प्रदेश सभा र प्रतिनिधिसभाको कार्यकालको व्याख्या भने आयोगले नगर्ने थपलियाको भनाइ थियो । उनले निर्वाचित भएको मितिबाट कार्यकाल सुरु हुने र त्यसको पाँच वर्षमा सकिने व्यवस्था पनि स्मरण गराए ।

'प्रदेश सभा र प्रतिनिधिसभाको कार्यकालको व्याख्या आयोगले गर्ने होइन । निर्वाचित मितिबाट पदावधि प्रारम्भ हुन्छ भन्ने हो । आउँदो मंसिरको २१ गते पदावधि समाप्त हुन्छ भनेर लिखित रूपमा सरकारकहाँ पाँच पृष्ठको कागजात पेस गरेका थियौं,' उनले भने ।

सांसदहरूको पदावधि अन्तर्राष्ट्रिय मूल्य मान्यता, संसदीय अभ्यास, संविधान र कानुनी व्यवस्थाअनुसार हुनुपर्ने उनको भनाइ थियो ।

प्रकाशित : श्रावण १९, २०७९ १७:०७
पूरा पढ्नुहोस्
प्रतिक्रिया
पठाउनुहोस्
×